Read tshwa Levi 5 Bible Online

Levi 5 - tshwa bible

Levi 5

¹Loku a munhu a onha laha a hlambanyiswako, na a kustumunya hi lezi a zi wonileko hambu lezi a zi tivako, loku a nga wuli lezi a zi wonileko kutani lezi a zi tivako, yena i ta rwala a nanzu wa kona.

²Kutani loku a munhu a khumba a xilo xo yila na a nga xi tivi, ku khwatsi hi xirumbi xa xihari xi yilako, kutani xirumbi xa xifuyo xi yilako, hambu a xirumbi xa xikokakoka xi yilako, na a nga zi tivi, i tava a ti nyenyezisile, ava ni nanzu.

³Loku a munhu a khumbile a chaka ga munhu na a nga gi tivi, hambu ni xihi xilo xi nyenyezisako, loku a ta zi tiva i tava ni nanzu.

⁴Loku a munhu a funga hi nomu wakwe, a hlambanya hi xikhanzakanya lezaku i ta maha zobiha kutani zo saseka, kutani hi xihi lexi a munhu a wulako mahala, a hlambanya na a nga zi tivi, laha a ta nga zi tiva, i tava ni nanzu.

⁵A munhu loyi a onhileko kota lezo, i ta wulela kuonha kakwe;

⁶i ta neha ka Jehova a munyikelo wa kuonha kakwe, a kati wa xifuyo xa xitsongwani, hambu yi hi yivu, kutani i mbuti, kasi yi maha muphahlo wa ku susa nanzu. Zonake a mupristi i ta mu mahela a nzhiho wa xionho xakwe.

⁷Kasi loku a vumala a yivu kutani i mbuti, i ta neha ka Jehova a muphahlo wa xionho xakwe a matuva mambiri, kutani mavinyani mambiri ya zipomba, ginwe ga muphahlo wa kuonha, ni ginwani ga muphahlo wa kuhiswa.

⁸I ta ma neha ka mupristi, loyi a ta nga ranga a nyikela legi ga munyikelo wa kuonha. A mupristi i ta gi sukuruta hloko hi laha xikari ka nhamu, kanilezi a nga yi hambanyisi ni miri wa kona;

⁹zonake i ta nwatsekela lomu mareveni ya alati hi nkhata wa muphahlo wa kuonha; ni nkhata lowu wu seleko i ta wu kamela laha zikhatelweni xa alati. Lowu muphahlo wa kuonha.

¹⁰A xinyanyani lexi xa wumbiri, i ta maha muphahlo wa kuhiswa hi nayo wa kona. Hi ndlela leyo a mupristi i ta maha a nzhiho wa xionho lexi a munhu loye a xi mahileko, zonake i ta tsetselelwa.

¹¹Loku a vumala a matuva mambiri, kutani mavinyani mambiri ya zipomba, loye a onhileko i ta neha a munyikelo wakwe hi za wukhume ka efa ya mapa yo basa, ma tava muphahlo wa kuonha. A nga dzuki a chela mafura hehla ka wona, hambu ni libani lo nuhela, hakuva muphahlo wa kuonha.

¹²I ta neha ka mupristi, ni mupristi i ta nusa ka wona a canja ginwe, a ma hisa alatini khwatsi hi miphahlelo leyi yi hiselwako Jehova; lowu muphahlo wa kuonha.

¹³A mupristi i ta maha a nzhiho wa xionho xa munhu loye, a nzhiho wa nanzu lowu a wu mahileko wa xinwe xa lezi zi wulilweko, zonake i ta tsetselelwa. A mapa lawa ma salako ma tava ya mupristi, khwatsi hi lezi zi mahiwako ka miphahlelo ya zakuga.

¹⁴Jehova i lo byela Mosi, aku:

¹⁵Loku a munhu a hambunyeta a onha hi kuhoheta, hi ku kala a nga humesi lezi zi basiselweko Jehova, i ta neha a munyikelo wa nzhiho, a hamba yi nga hiko na bawa, yi hlawulweko lomu tlhambini, zinwe ni mali ya xekeli, gi nga xekeli ga lipimo la wutshamu go basa; ku tava muphahlelo wa nzhiho.

¹⁶Yena i ta humesa a mali ya ku riha lezi a tekileko za wutshamu go basa, a engetela za wuntlhanu ka zona, a zi nyika mupristi, loyi a ta nga mu mahela a muphahlo wakwe wa nzhiho hi hamba leyi a humesileko a kuva ya muphahlo wa nzhiho, zonake i ta tsetselelwa.

¹⁷Loku a munhu a onhile, a mahile lezi zi nga vumelwiko hi nayo wa Jehova, hambu loku a zi mahile na a nga zi tivi, i onhile, i ta rwala a nanzu wa kona.

¹⁸I ta neha ka mupristi a nzhiho wa nanzu wakwe, a hamba yi nga hiko na bawa, yi hlawulweko lomu tlhambini wakwe, leyi u yi ringanyisileko; a mupristi i ta mu mahela a muphahlo wa hamba hi kota ya nanzu lowu a nga wu maha na a nga zi tivi; zonake i ta tsetselelwa.

¹⁹Lowu hi wona a muphahlo wa nzhiho, wa munhu loyi a onhileko ka Jehova.