Read tshwa Levi 6 Bible Online

Levi 6 - tshwa bible

Levi 6

¹Jehova i lo wulawula ka Mosi, aku:

²Loku munhu a onhile, a mahile lezi zi nga faneliko mahlweni ka Jehova, hi kukhohlisa muakelane wakwe hi zilo zi vekilweko mandleni yakwe, kutani hi zilo zi lombilweko, kutani hi lezi zi wutlilweko, kutani i yivile a zilo za muakelane wakwe,

³kutani i thumbile a xilo xi lahlekileko, a ala naxo, zo kala a hlambanya mawunwa ka zilo zo maha lezo, kani hi xihi xilo lexi a munhu xi mu onhisako;

⁴loku a onhile kota lezo, ava ni nanzu, i yimelwe hi ku tlhelisa a zilo lezi a nga wa zi wutlile kutani ku yiva, kutani a zilo lezi zi nga wa vekilwe kakwe, hambu ni zilo lezi zi nga wa lahlekile a zi thumba;

⁵hambu ni zihi lezi a nga khohlisa a hlambanya mawunwa ha zona; i ta zi tlhelisa zontlhe, a engetela hi za wuntlhanu za kona, a zi nyikela ka nwinyi wa zona hi siku lego a ta nga maha muphahlo wakwe wa nzhiho.

⁶Yena i ta neha ka mupristi a muphahlo wakwe wa nzhiho ka Jehova, yi tava hamba yi nga hiko na bawa ya lomu tlhambini, zinwe ni tsengo u wu ringaniseleko nanzu wakwe.

⁷A mupristi i ta mu mahela a nzhiho wa wuyiselelo mahlweni ka Jehova, zonake i ta tsetselelwa ka zontlhe lezi yena a onhileko.

⁸Jehova i lo wulawula ka Mosi; aku:

⁹Leletela Aroni ni vana vakwe, uku ka vona: Lowu hi nayo wa munyikelo wa kuhiswa: A munyikelo wa kuhiswa wu ta tshama khombarini ga alati wusiku gontlhe kala gica, na nzilo wu kari wu vura.

¹⁰A mupristi i ta ambala a hembe ga wukene, ni bhuluku ga wukene, a fenengeta a nyama yakwe; zonake i ta wola a khuma ga nzilo lowu wu nga hisa muphahlo laha alatini, a gi veka hi tlhelo ga alati.

¹¹Anzhako ka lezo i ta tlhatlha a tinguwo takwe, a ambala tinwani, zonake i ta ya halata a khuma lahandle ka wugovelo, wutshanwini gi basileko.

¹²Kanilezi a nzilo wu ta simamisa wu vura laha alatini, wu nga timeki. Wontihe masiku ni mixo, a mupristi i ta hlanganyeta tihunyi, a longisa muphahlo wa kuhiswa hehla ka tona, a hisa a mafura ya miphahlo ya kurula.

¹³A nzilo wu ta vura wontihe masiku laha alatini, wu nga dzuki wu timeka.

¹⁴A nayo wa munyikelo wa zakuga hi lowu: A vana va Aroni va ta wu neha mahlweni ka Jehova, a mahlweni ka alati.

¹⁵Zonake va ta nusa a canja ga mapa yo saseka ya munyikelo ni mafura ya kona, ni yontlhe mipepo ya libani yi nga hehla ka munyikelo wa zakuga, zonake va ta zi hisa laha alatini, ziva masema yo nuhela mahlweni ka Jehova.

¹⁶Lezi zi to sala zi ta giwa hi Aroni ni vana vakwe. Va ta ziga ni zibaba zi nga comelwangiko wutshanwini go basa, lomu hubyeni ya tabemakeli ga mutlhangano.

¹⁷Va nga dzuki va zi bhika ni comelo. Lexi hi xiavelo lexi nzi va nyikileko xa lomu ka miphahlo ya mina leyi yi hiswako hi nzilo. Zilo zi basileko nguvu, khwatsi hi muphahlelo wa kuonha, ni muphahlelo wa milanzu.

¹⁸Vontlhe vavanuna va vana va Aroni; va ta ziga. Xiavelo xabye kala kupinzuka ka zizukulwana za nwina ka miphahlo leyi yi hiselwako Jehova. Kani hi wihi loye a ta nga zi khumba i tava a basile.

¹⁹Jehova i lo byela Mosi, aku:

²⁰A munyikelo wa Aroni ni vana vakwe, lowu va ta nga nyikela a siku ga ku totiwa hi lowu: A xipanze xa wukhume xa efa ga mapa yo saseka, wu tava muphahlo wa zakuga a masiku ni masiku; va ta nyikela a khihlanya ni mixo, ni khihlanya laha gambyeni,

²¹Ma ta katingwa lomu ka pani hi mafura, u ta ma neha na ma khemilwe zipanzana, ma tava masema yo nanziha ka Jehova.

²²A nʼwana wakwe loyi a ta nga totiwa ku maha mupristi xikhundleni xakwe, hi yena a ta nga nyikela munyikelo lowo. Lezi xileletelo xa Jehova xa kala kupinzuka; a munyikelo lowo wu ta hiswa wontihe.

²³Hakuva a minyikelo yontlhe ya zakuga ya vapristi, yi ta hiswa yontlhe, yi nga dzuki yi giwa.

²⁴Jehova i lo wulawula ka Mosi, aku:

²⁵Byela Aroni ni vana vakwe, uku ka vona: Lowu hi nayo wa muphahlo wa kuonha. Ka wutshamu legi va tlhavelako kona zihari za miphahlo ya kuhiswa, hi kona laho va ta nga tlhavela kona a zihari za miphahlo ya kuonha mahlweni ka Jehova. Zi basile nguvu.

²⁶A mupristi loye a nyikelako munyikelo wa kuonha, hi yena a ta nga wuga; wu ta gelwa wutshanwini legi go basa, hubyeni ya tabemakeli ga mutlhangano.

²⁷Kani hi wihi loye a ta nga khumba a nyama ya kona i tava loyi a basileko, ni loku a nkhata wa kona wu phandlukele laha ka nguwo, u ta yi hlaza laha wutshanwini ga kubasa.

²⁸A mbita ya wumba leyi va bhikeleko ka yona yi ta fayiwa; kanilezi loku va bhikele lomu ka mbita ya suku, yona yi ta kutliwa, yi hlaziwa hi mati.

²⁹A vavanuna vontlhe xikari ka vapristi va taga muphahlo lowo. Wu basile nguvu.

³⁰Kanilezi ngha ku nga giwi a muphahlo wa kuonha, lowu va nehileko a nkhata wa wona lomu ka tenda ga mutlhangano a ku ta maha a nzhiho lomu ka Wutshamu go Basabasa; wona wu ta hiswa nzilweni. [5]