Read tshwa Levi 8 Bible Online

Levi 8 - tshwa bible

Levi 8

¹Jehova i lo leletela Mosi, aku:

²Teka Aroni ni vana vakwe, ni tinguwo, ni mafura yo tola, ni nkuzi ya muphahlo wa kuonha, ni tihamba timbiri, ni xirunzu xa zibaba zi nga hiko na comelo.

³Zonake u ta tsombanyisa a ntlhangano wontihe laha nyangweni ya tabemakeli ga mutlhangano.

⁴Mosi i lo maha khwatsi hi lezi Jehova a mu leleteleko, a ntlhangano wu lo tsombana laha nyangweni ya tabemakeli ga mutlhangano.

⁵Zonake Mosi aku ka ntlhangano: Lezi Jehova a nga nzi leletela ku zi maha, hi lezi.

⁶Zinghaho Mosi i lo tshineta Aroni ni vana vakwe, a va hlaza hi mati.

⁷I lo ambexa Aroni a hembe, a mu boha hi bhandi, ni ku mu ambexa ni nghanju, zonake i lo mu ambexa ni efode, a yi tiyisa hi ngoti ya kona.

⁸I lo mu ambexa ni ngenge laha xifuveni, a vekela ka yona Urima na Tumima.

⁹I lo mu vekela ni xihuku laha hlokweni, le mahlweni ka xihuku i lo vekela a mubhodi wa nzalama, xi nga xidlodlo xo basa, kota lezi Jehova a leleteleko Mosi.

¹⁰Zonake Mosi a teka mafura yo tola, a tota a tabemakeli ni zontlhe lezi zi nga ka gona, a zi basisa.

¹¹I lo nwatsekela ha wona ntlhanu wa makhati ni mambiri laha alatini, a tota a alati ni zontlhe zibya za gona, ni xinamelo ni xikhatelo xa kona, kasi zi basa.

¹²I lo chela mafura yo tola hlokweni ka Aroni kasi ku mu basisa.

¹³Zonake Mosi i lo vitana a vana va Aroni, a va ambexa tinguwo, a va boha mabhandi, a va vekela zihuku, kota lezi Jehova a leleteleko Mosi.

¹⁴I lo neha a nkuzi ya muphahlo wa kuonha, Aroni ni vana vakwe va lo tlhateka a mandla yabye hlokweni ya nkuzi ya muphahlo wa kuonha.

¹⁵Mosi i lo yi tlhava, a teka a nkhata wa kona, laha na petile litiho lakwe lomu nkhateni i lo tota timhonzo ta alati matlhelo wontihe, a basisa a alati; zonake i lo chulula a nkhata lahasi ka alati, a gi basisa kasi gi fela ku mahelwa a nzhiho.

¹⁶Zonake i lo teka a mafura wontihe ma pomeleko marumbu, ni pambani wa zivinzi, ni tiswa timbiri ni mafura ya tona, a zi hisa alatini.

¹⁷Kanilezi a nkuzi ni bhebhe ga yona, ni nyama ya kona, ni swanyi wa kona, i loya zi hisa lahandle ka wugovelo, khwatsi hi lezi Jehova a leleteleko Mosi.

¹⁸Zonake i lo neha a hamba ya munyikelo wa kuhiswa; Aroni ni vana vakwe va lo tlhateka mandla yabye hlokweni ya hamba.

¹⁹Mosi i lo yi tlhava, a nwatsekela a alati hi nkhata, wontihe matlhelo.

²⁰Kanilezi a hamba i lo yi tsemelela hi ziro za yona, Mosi i lo hisa a hloko ni ziro ni mafura,

²¹I lo hlaza marumbu ni masonzo lomu matini. Zonake Mosi i lo hisa a hamba yontlhe laha alatini. Wu lo maha a muphahlo wa kuhiswa wa masema yo nuhela, lowu wu hiselwako Jehova, khwatsi hi lezi Jehova a leleteleko Mosi.

²²Anzhako ka lezi i lo neha a hamba ya wumbiri, a hamba ya ku wumbela wupristi, zonake Aroni ni vana vakwe va lo tlhateka a mandla yabye hlokweni ya hamba.

²³Mosi i lo yi tlhava, a teka a nkhata, a tota magumo ya ndleve ya xinene ya Aroni, ni ka litiho la hombe la nkonzo wa xinene wa Aroni.

²⁴Zonake i lo vitana a vana va Aroni, Mosi i lo tota hi nkhata a magumo ya tindleve tabye ta xinene, ni titiho ta hombe ta mandla yabye ya xinene, ni titiho tabye ta hombe ta mikonzo ya xinene; zonake Mosi i lo nwatsekela a nkhata matlhelo wontihe ya alati.

²⁵I lo teka a mafura ni nkila, ni mafura wontihe ya marumbu, ni pambani wa xivinzi, ni tiswa ta timbiri ni mafura ya tona, ni nenge wa xinene.

²⁶Kambe i lo teka a xikhekhetselo xi nga hiko na comelo, ni xikhekhetselo xi chelilweko mafura, ni xibaba lomu xirunzwini xa zibaba lezi zi nga mahlweni ka Jehova; a zi veka le hehla ka mafura ni hehla ka nenge wa xinene.

²⁷Zonake i lo beka zontlhe lezi zilo mandleni ya Aroni, ni mandleni ya vana vakwe, a zi nziwitela mahlweni ka Jehova.

²⁸Zonake Mosi i lo zi teka lomu mandleni yabye a zi hisa alatini, le hehla ka munyikelo wa kuhiswa. Wu wa hi muphahlo wa ku wumbela, lowu wu nga ni masema yo nanziha; wu nga muphahlo wu hiselwako Jehova.

²⁹Zonake Mosi i lo teka a xifuva xa hamba ya ku wumbela; a xi nziwitela khwatsi hi munyikelo wa ku nziwitela mahlweni ka Jehova; zonake xi maha xiavelo xa Mosi, kota lezi Jehova a wulileko ka Mosi.

³⁰Mosi i lo teka a mafura yo tola, ni nkhata lowu wu nga alatini, a nwatsekela ha wona Aroni ni vana vakwe, zinwe ni tinguwo tabye, a basisa Aroni ni tinguwo takwe, ni vana vakwe ni tinguwo ta vana vakwe.

³¹Mosi a byela Aroni ni vana vakwe; aku: Bhikani nyama laha nyangweni ya tabemakeli ga mutlhangano, mu yi gela kwalaho ni zibaba lezi zi nga lomu xirunzwini xa miphahlo ya ku wumbela, kota lezi nzi wulileko lezaku zi ta giwa hi Aroni ni vana vakwe.

³²Lezi zi ta nga sala ka nyama ni zibaba, mu ta zi hisa nzilweni.

³³Lomu ka ntlhanu wa masiku ni mambiri mu nga humi laha nyangweni ya tabemakeli ga mutlhangano, kala ma tatiseka masiku ya kuwumbelwa ka nwina, hakuva masiku ya kuwumbelwa ka nwina ma tava ntlhanu ni mambiri.

³⁴Lezi zi mahilweko nyamutlha, Jehova i lo leletela lezaku mu mahelwa a nzhiho wa wuyiselelo.

³⁵Mu ta tshama ntlhanu wa masiku ni mambiri laha nyangweni ya tabemakeli ga mutlhangano, mumu ni wusiku, mu hlayisa lezi Jehova a leleteleko zona, kasi mu ngafi; hakuva nzi byelisilwe lezo.

³⁶Aroni ni vana vakwe va lo maha zontlhe lezo Jehova a nga leletela ha Mosi.