Read tshwa Jeremia 10 Bible Online

Jeremia 10 - tshwa bible

Jeremia 10

¹Zwanani a mhaka leyi Jehova a yi wulako ka nwina va yindlu ya Israeli.

²Jehova i ngalo: Mu nga gonzi a mahanyela ya vamatiko, Mu nga chaviswi hi zikombiso za le tilweni, Hakuva a vamatiko va chavisiwa ha zona. [66]

³A vamatiko va kholwa hi vanungungulu va hava. Hakuva i sinya yi tsemilweko le khwatini, Yi tiriwa hi zihloka xa muvatli;

⁴Va yi bombisa hi siliva ni nzalama, Ni ku yi tiyisa hi tikhokho ni hamela, Kasi yi nga gutlagutli.

⁵A zifananiso zi kotisa a mhanze sinwini ga maranga, Zi yima kona kanilezi a zi wula wuli; Zona zi lava ku pakatsiwa, hakuva a zi zi koti ku famba. Mu nga zi chavi, hakuva a zi tivi ku maha kubiha, Hambu a kuva ni ntamu wo maha zinene.

⁶A nga kona a fananako na wena, O Jehova; U wa hombe, a vito ge wena ga hombe hi ntamu.

⁷O Hosi ya matiko, himani a nga ku chaviko? U fanele ku chabyiwa, Hakuva xikari ka tontlhe titlhari ta vamatiko, Ni ka mifumo yabye yontlhe, Cima a nga kona loyi; a fananako na wena. [67]

⁸Vontlhe va hungukile ni kuva zipumbu, A gonzo ya zifananiso i tsanza ntsena.

⁹A siliva yi bethilweko yi nehilwe hi le Tarxixi, Ni nzalama ya le Ufazi; I ntiro wa nyamandlamitiro ni mufuli wa nzalama. Zi ambele a wukuxe ni ziwunguwungu, Zontlhe lezi i ntiro wa vanhu va tlharihileko. [68]

¹⁰Kanilezi Jehova i Nungungulu wa zinene, I Nungungulu loyi a hanyako, a Hosi ya pinzukelwa; A misava yi rurumela zangeni yakwe, A matiko a ma na ku yima mahlweni ka khulo gakwe.

¹¹Mu ta va byelisa lezi, muku: A vanungungulu lava va nga vangangiko a tilo ni misava va ta nwalala tikweni ni lahasi ka tilo.

¹²Yena i vangile misava hi ntamu wakwe, A seketela tiko hi wutivi gakwe, Hi kupima kakwe i tshambulutile tilo, [69]

¹³Loku a tlakusa a gezu gakwe A mati ma dzuma le matilweni, A maha marefu mata hi le magunweni ya misava; I rumela zingwalangwanza zinwe ni vula, Ni ku humesa a mheho lomu mabakweni yakwe.

¹⁴Loku va zi wona a vanhu va yima vaku kaye, va nga pimi nchumu; Ni vafuli va nzalama va wisiwa tingana hi zifananiso zabye zi vatlilweko; Hakuva a zifananiso zabye mawunwa, a zi na muhefemulo.

¹⁵Zona a zi nyawuli, mitiro ya wu khohlisi; A xikhatini xa kutsayiswa zi ta lova.

¹⁶Loyi a nga xiavelo xa ka Jakobe a nga fanani na zona; Hakuva hi yena muvangi wa zilo zontlhe; Israeli lixaka la tshomba yakwe, Jehova wa tiyimpi hi vito gakwe. [70]

¹⁷Bola a nhunzu ya wena, u yi humesa tikweni, Wena loyi u akileko mutini wu vimbezelweko.

¹⁸Hakuva Jehova i ngalo: Lexi xikhati nzi ta cukumeta kule a vaaki va tiko, Nzi ta va xanisa va kala va zizwa, vaku:

¹⁹Yowee! nzi tshovekile! A mbanga ya mina ya panza. Kanilezi nzi ngalo: Hakunene, hi gona khombo ga mina, Nzi fanele a ku gi rwala.

²⁰A tenda ga mina gi hahlulwe, Ni tingoti tontlhe ta mina ti tsemekile. A vana va mina va nzi pfhukile, a va kona; A nga kona a nzi gwimbelako a tenda ga mina, Ni ku haxa a michachalato ya mina.

²¹Hakuva a varisi va hungukile, A va hlotangi Jehova; Hikwalaho a va humelelangi, Yontlhe a mitlhambi yabye yi hangalakile.

²²Hi nga zwani, ku zwala guwa, A dzolonga ga hombe gi tako hi le Nwalungu, A ku ta hunzulusa a miti ya ka Juda yiva marumbi, A wutshamu ga mahlolwa.

²³O Jehova, nza zi tiva lezaku a ndlela ya munhu a yi le ntanwini wakwe, Kambe a munhu a nga zi koti ku lulamisa a mazambo yakwe.

²⁴O Jehova, nzi tsayise, Kanilezi hi lipimo li nzi ringeneko, Na ku nga hi zanga ya wena, lezaku u nzi lovisa. [71]

²⁵Chulula a khulo ga wena hehla ka vamatiko lava va nga ku tiviko, Ni hehla ka tixaka leti ti nga vitanako a vito ga wena. Hakuva va khadamule Jakobe, va mu mita, va mu heta, Ni muti wakwe va wu mahile rumbi.