Read tshwa Jeremia 19 Bible Online

Jeremia 19 - tshwa bible

Jeremia 19

¹Jehova i te ngalo: Famba ka muwumbi u ya ti xavela a mbita ya wumba; zonake teka a masingalakati yo kari ya tiko ni ya vapristi,

²huma uya nkoveni wa nʼwana wa Hinnome, kusuhani ni nyangwa ya Zirengele, u kanela seyo a timhaka nzi to ku byela.

³Uku: Zwanani a mhaka ya Jehova, nwina tihosi ta Juda, na nwina vaaki va Jerusalema; Jehova wa tiyimpi, a Nungungulu wa ka Israeli i ngalo: Langutani, nzi ta neha khombo wutshanwini legi, lego kani hi mani a to gizwa a tindleve takwe ti ta tinga. [107]

⁴Hakuva va nzi tsikile, va hanahanisa a wutshamu legi, hakuva lomu va hisile tibani ka vanwani vanungungulu, lavo va nga va tivangiko, vona ni vakoko vabye ni tihosi ta ka Juda; va tatisile legi wutshamu hi nkhata wa va nga hiko na nanzu;

⁵na va akele Baali a matshamu ma tlakukileko, kasi va hisa kona a vana vabye hi nzilo a kuva miphahlo yo hiswa ya Baali; lezi nzi nga va layangiko, hambu a ku va byela, ne ni ku zi alakanya.

⁶Hikwalaho a masiku ma tshinele, ku wula Jehova, lezaku legi wutshamu gi nga ta ha vitanwa ku Tofete, hambu kuva Nkova wa nʼwana wa Hinnome, kanilezi i Nkova wa Silaho.

⁷A ka legi wutshamu nzi ta hangalasa a makungo ya Juda ni ya Jerusalema; nzi ta va maha vawa hi supado ya valala vabye, hi mandla ya lava va hlotako wutomi gabye. A zirumbi zabye zi ta giwa hi tinyanyani ta tilo ni zihari za khwati.

⁸Nzi ta maha muti lowu wuva xirewukiso ni xiruko; wihi ni wihi a to hunza ha kona i ta rewuka le go kala aba noti hi ku hlamala hi kota ya wontihe a makhombo lawo.

⁹Nzi ta va maha vaga a nyama ya vana vabye va xinuna ni va xisati, munwe ni munwani i taga a nyama ya xaka gakwe a xikhatini xa kuvimbezelwa kabye ni kumanyiwa kabye, loku va ta nga ku wa tshidi hi valala lava va hlotako a wutomi gabye. [108]

¹⁰Zonake u ta faya a mbita mahlweni ka vanhu lava va nga ku pangalata,

¹¹uku kabye; Jehova wa tiyimpi i ngalo: Nzi ta pswhandlasa legi tiko ni lowu muti, a ku fanana ni loku ku fayiwa a mbita ya muwumbi, yi nga ha zi kotiko ku tlhanganyisiwa kambe. Ku ta lahlelwa laho Tofete, hi ku vumala wutshamu ginwani.

¹²Hi lezo nzi to maha hi legi wutshamu, ku wula Jehova, ni ka vaaki va kona; nzi ta maha ku fanana ni Tofete.

¹³A tiyindlu ta Jerusalema, ni tiyindlu ta tihosi ta ka Juda, ti tava ni chaka kota a wutshamu ga Tofete, ti nga tiyindlu tontlhe leti ku hisilweko langweni ya tona a libani ka butho gontlhe ga tilo, laho va nyikeleko a minyikelo ya zakunwa ka vanwani vanungungulu.

¹⁴Zonake Jeremia i lo wuya hi le Tofete, laho Jehova a nga mu rumile ku ya profeta, i lo ta yima hubyeni ya yindlu ya ka Jehova, a byela vanhu vontlhe, aku:

¹⁵Jehova wa tiyimpi, a Nungungulu wa ka Israeli i ngalo: Nzi ta neha hehla ka muti lowu ni hehla ka zimitana za wona a makhombo wontihe lawa nzi phofuleko ha wona; hakuva va nonohisile a tinhamu tabye, kasi va ngazwi a timhaka ta mina.