Read tshwa Jeremia 21 Bible Online

Jeremia 21 - tshwa bible

Jeremia 21

¹A mhaka yi tileko ka Jeremia hi ka Jehova, loku hosi Zedekia a mu rumela Paxuri a nʼwana Malkia, na Zefania a nʼwana Maaseya a mupristi, va yaku:

²Hi nga hi wutisela a ka Jehova, hakuva Nebukadrezzare, a hosi ya Babuloni, wa hi hlasela; kutani Jehova i ta hi mahela a masingita yakwe, lezaku yena a suka ka hina.

³Zonake Jeremia i lo va hlamula, aku: Mu ta byela Zedekia, muku:

⁴Jehova, a Nungungulu wa ka Israeli i ngalo: Langutani, nzi ta tlhelisela a matlhari lawa ma nga mandleni ya nwina, lawa mu lwako ha wona le handle ka tigingitsi mu vukela a hosi ya Babuloni ni maKaldea lava va mu vimbezeleko, nzi ta ma hlengeletela a mutini lowu.

⁵Mina wutsumbu nzi talwa na nwina hi canja gi tlakusilweko, hi woko ga ntamu, ni zanga, ni khulo ni xiviti xa hombe. [113]

⁶Nzi ta hlasela a vaaki va muti lowu, a vanhu ni zihari; va tafa hi ntungu wa hombe.

⁷Anzhako ka lezo, ku wula Jehova, nzi ta nyikela Zedekia, a hosi ya ka Juda, ni malanza yakwe, zinwe ni vanhu lavo va ta ngava va ponile ntungu a mutini lowu, ni ku pona a supado ni ndlala, nzi va nyikela canjeni ga Nebukadrezzare hosi ya Babuloni, ni canjeni ga valala vabye ni ga lava va hlotako wutomi gabye. Yena i ta va lamata hi supado, a nga ta va nyenyeletela, hambu a ku va zwela, hambu ni kuva ni tipswalo havona.

⁸U ta byela lava vanhu, uku: Jehova i ngalo: Langutani, nza veka a ndlela ya wutomi ni ndlela ya kufa mahlweni ka nwina.

⁹Loyi a to sala ka muti lowu i tafa hi supado, ni ndlala, ni ntungu; kanilezi loyi a to huma handle, aya ti nyikela ka maKaldea, lava va mu vimbezeleko, i ta hanya; a wutomi gakwe i ta gi wutla kukotisa muphango.

¹⁰Hakuva nzi langutele lowu muti hi kubiha, na ku nga hi kusaseka, ku wula Jehova. Wu ta nyikelwa canjeni ga hosi ya Babuloni, yi ta wu hisa hi nzilo.

¹¹U taku ka yindlu ya hosi ya ka Juda: Zwanani a mhaka ya ka Jehova:

¹²Nwina yindlu ya ka Davida, Jehova i ngalo: Lamulani hi kululama na ga hi mixo; mu ponisa loyi a phangiwako mandleni ya loyi a mu tsimbeketako; kasi a zanga ya mina yi nga vuri kota nzilo, yi hisa lezaku ku vumaleka ni mutimeli, zi maha lezo hi kota ya kubiha ka zimaho za nwina.

¹³Languta, nzi na ni xisolo na wena muaki wa le nkoveni, lomu khokholeni ga livala, ku wula Jehova; nzi ni mhaka na nwina lava mu nge: Himani a to relela a ta hi vukela? himani a to enghena wuakelweni ga hina ke?

¹⁴Nzi ta mu tsayisa maringano ni mbhanzu wa zimaho za nwina, ku wula Jehova. Nzi ta dzivela nzilo khwatini ga nwina, wu ta lambuxa zontlhe zi nga lahandle ka muti. [114]