Read tshwa Jeremia 22 Bible Online

Jeremia 22 - tshwa bible

Jeremia 22

¹Jehova i te ngalo: Relela ndlwini ya hosi ya ka Juda, u ya wula kona mhaka leyi:

²Zwana a mhaka ya Jehova, wena hosi ya ka Juda, u tshamileko a xitshanwini xa wuhosi xa Davida, wena ni malanza ya wena, ni vanhu va wena lava va enghenako hi tinyangwa leti.

³Jehova i ngalo: Lamulani hi fanelo ni kululama, mu ponisa loyi a phangiwako a mandleni ya loyi a mu tsimbeketako; mu nga xanisi a muluveli, ni xisiwana, ni noni, mu nga va tsimbeketi, hambu ku halata nkhata wa lava va nga hiko na nanzu wutshanwini legi.

⁴Hakuva loku mu ingisa mhaka leyi, zonake ku ta engheniwa hi tinyangwa ta yindlu leyi a tihosi ti tshamileko a xitshanwini xa wuhosi xa Davida, na ti khilele a tikareta ni mahaxi, zinwe ni malanza ya tona ni vanhu va tona.

⁵Kanilezi loku mu nga ingisi leti timhaka, nza hlambanya hi wutsumbu ganga, ku wula Jehova, lezaku a yindlu leyi yi tava rumbi.

⁶Hakuva Jehova i wula xungetano hi leyi yindlu ya hosi ya ka Juda, aku: A ka mina u kotisa Gileadi ni hloko ya Lebanoni, Kanilezi nzi ta ku hunzula uva xiwula, A miti yi nga hiko na vanhu.

⁷Nzi ta ku vitanela a valovisi, A munwe ni munwani i tava ni matlhari yakwe; Va ta tsema a tisedare ta wena to saseka, Va ti hoxa nzilweni.

⁸A matiko yo tala ma ta hunza hi ka muti lowu, A ginwe gi ta wutisa ka ginwani, giku: Hikuyini Jehova a mahileko lezo ka muti lowu wa hombe ke? [115]

⁹Zonake va ta hlamula, vaku: Hakuva va tsikile a xivumelwano xa Jehova Nungungulu wabye, Va ya khozela vanwani vanungungulu, ni ku va tirela.

¹⁰Mu nga rileli loyi a fileko, Mu ngabi nkosi hi kota ya yena; Kanilezi rilelani loyi a sukako, Hakuva a nga ta ha wuya, A ta wona a tiko legi a belekilweko ka gona.

¹¹Hakuva Jehova i wula lezi xungetano ha Xallumi nʼwana Josia, a hosi ya ka Juda, loyi a nga fumela wutshanwini ga raru wakwe, a sukileko ka legi wutshamu, aku: Yena a nga ta ha wuya kambe laha.

¹²Kanilezi i ta ya fela a wutshanwini va mu yisileko kona kukhonweni, a nga ta ha wona tiko legi.

¹³Khombo ka munhu loyi a akako yindlu yakwe hi kungalulami, Ni tikwaruto ta yona hi kusoholoka, Loyi a tirisako munhu-kulobye handle ka hakhelo, A nga mu rihi; [116]

¹⁴Loye a nge ngalo: Nzi ta ti akela yindlu ya hombe, Ni tikwaruto to anama, A bhoxa tinjhanela; A ti nameketa hi tisedare, Ni ku yi penda hi penda yo pswhuka.

¹⁵Xana u ta fuma hilezi u ti tsitsiritako ntirweni wa tisedari ke? A raru wa wena i gile ni kunwa, Kanilezi i lo lamula hi nongameto ni fanelo, I lo humelela hi kota ya lezo. [117]

¹⁶I lamule a mhaka ya lava va tsimbeketilweko ni ku vumala, Hi kota ya lezo i wa humelela. Xana lezo a hi ku nzi tiva ke? Ku wula Jehova,

¹⁷Kanilezi a mahlo ya wena ni mbilu ya wena zi navela bhinzu ntsena, Ni ku halata nkhata wa loyi a nga hiko na nanzu, U maha hi ku tsimbetela ni tihanyi.

¹⁸Hikwalaho Jehova i wula xungetano ha Jehoiakimu a nʼwana Josia, hosi ya ka Juda, aku: Va nga ta mu rilela, vaku: Yowe nakulori! Yowe makweru! Va nga taba nkosi ha yena, vaku: Yowe hosi! kutani, Yowe a wudumo gakwe!

¹⁹I ta lahliwa ku fanana ni mbongola, I ta ruruvisiwa, a ya hoxiwa handle ka tinyangwa ta Jerusalema.

²⁰Kanziha Lebanoni, u kanyuluka, Tlakusa gezu ga wena le Baxani! Kanyuluka na u hi le Abarime, Hakuva a varanziwa va wena vontlhe va lobyisilwe.

²¹Nzi wulawulile ka wena kuvuvumeni ka wena, Kanilezi uku: Nzi nga ta ingisa. Hi wona a mahanyela ya wena kusukela wuhlangini, Yaku, u nga tazwa a gezu ga mina.

²²A varisi va wena va ta hahisiwa hi mheho, Ni varanziwa va wena va ta yiswa wukhumbini; Zonake u taku koyo tingana, U xeveka hloko hi kota ya kubiha ka wena.

²³Wena loyi u akileko Lebanoni, U nga ni xisaka xa wena maravini ya tisedare, Kuxaniseka ka kuyini u tova nako Loku u humelwa hi makhombo, A kubayisa kota a wasati a lunwako;

²⁴Khwatsi hi lezi nzi hanyako, ku wula Jehova, loku ku wo khwatsi Koma a nʼwana Jehoiakimu, hosi ya ka Juda, a wa hi phera yi mehelweko canjeni ga mina ga xinene, hambu zi hi tano ngha nzi mu konole kwalaho. [118]

²⁵Nzi ta ku nyikela canjeni ga vona lava va hlotako a wutomi ga wena, ni canjeni ga lavo u rurumelako mahlweni kabye, a nga yena Nebukadrezzare a hosi ya Babuloni ni mandleni ya maKaldea.

²⁶Nzi ta ku hlongola, wena ni mamani wa wena loyi a nga ku beleka, muya ka ginwani tiko, laho mu nga belekiwangiko kona, kwaseyo mu ta ya fela kona. [119]

²⁷Kanilezi a tiko legi va xuvako ku tlhelela kona, va nga ta wuya ka gona.

²⁸Xana a munhu loyi Konia, xibya xi fayekileko ni ku nyenyiwa, lexi xi nga vuniko nchumu ke? xana i tsikelwa yini ni vanana vakwe, va ya hoxiwa ka tiko va nga gi tiviko ke?

²⁹O tiko, tiko, tiko! ingisa a mhaka ya Jehova!

³⁰Jehova i ngalo: Tsalani a vito ga munhu loyi lezaku a nga na vana, munhu a to kala ku vuvuma masikwini yakwe. Hakuva ku nga ta humelela ni munwe wa vana vakwe, lezaku a nyikwa ku tshama xitshanwini xa wuhosi xa Davida, a fumela Juda.