Read tshwa Jeremia 24 Bible Online

Jeremia 24 - tshwa bible

Jeremia 24

¹Anzhako ka kuve Nebukadrezzare, a hosi ya Babuloni, a yisile kukhonweni Jekonia, a nʼwana Jehoiakimu hosi ya ka Juda, ni tihosana ta ka Juda, ni vavatli ni vabethi va nyunzu, vota hi Jerusalema, va yiswa Babuloni, Jehova i lo nzi wonisa a zirunzu zimbiri za makuwu, na zi vekilwe nyangweni ya tempeli ya Jehova. [128]

²A xirunzu xinwe xi wa hi ni makuwu yo saseka nguvu, ku fanana ni makuwu lawa yo ranga ku buva; a xinwani xirunzu xi wa hi ni makuwu yo swara nguvu, lawa ma nga zi kotiko ku giwa, hakuva ma wa bihile nguvu.

³Jehova i te ngalo ka mina: U wona yini Jeremia? Nzi lo hlamula, nziku: Nza wona makuwu; a makuwu yo saseka, ma nene nguvu; a ya ku biha ma bihile nguvu, a ma na ku giwa, hakuva ma bihile nguvu.

⁴Zonake a mhaka ya Jehova yi lota ka mina, yiku:

⁵Jehova a Nungungulu wa Israeli i ngalo: Kota lezi vanhu va tsakako hi makuwu laʼma nene, hizalezo nzi ta tsaka hi vaJuda lava va bohilweko, nzi hlayisa khwatsi lava nzi va humesileko wutshanwini legi nzi va yisa tikweni ga maKaldea.

⁶Nzi ta va langutela hi ku xalala, nzi ta tlhela nzi va wuyisa ka legi tiko. Nzi ta va akisa, nzi nga va wisi hasi; nzi ta va byala, nzi nga va tsuwuli.

⁷Nzi ta vaha timbilu to nzi tiva lezaku hi mina Jehova; vona va tava vanhu va mina, mina nzi tava Nungungulu wabye, loku va tlhelela ka mina hi mbilu yabye yontlhe. [129]

⁸Kanilezi kota lezi ku mahiwako hi makuwu yo biha, lawa ma nga zi kotiko ku giwa; kunene Jehova i ngalo: Nzi ta maha lezo ha Zedekia, a hosi ya ka Juda, ni ka tihosana takwe, ni misalelwa ya Jerusalema, leyi yi seleko ka legi tiko, ni ka lava va akileko tikweni ga Gipite. [130]

⁹A ka matlhelo wontihe va tava xichaviso ni khombo a ka matiko wontihe ya misava, va tava xihlekiso, ni vingu, a xixovo, ni xiruko lomu nzi ta nga va hangalasela kona. [131]

¹⁰Nzi ta va rumela supado, ni ndlala, ni ntungu, kala vaku bhi a tikweni legi nzi nyikileko vona ni ka vararu vabye.