Read tshwa Jeremia 3 Bible Online

Jeremia 3 - tshwa bible

Jeremia 3

¹Ve ngalo: Loku a wanuna a hlongola sati wakwe, loye wasati a ti fambela, a ya tekiwa hi munwani wanuna, xana loyi wanuna a nga zi kota ku mu tlhelela kambe ke? A tiko lego gi nga ta swariswa hi ku maha lezo ke? Kanilezi wena loyi u gengileko hi wubhayi ni zigango zo tala, xana u ta tlhelela ka mina, ku wula Jehova. [19]

²Tlakusa mahlo ya wena migangeni Hi kwihi laha wena u nga etleliwiko kona ke? U tshamele vona le tindleleni, a ku fanana ni muArabia le xiwuleni, U nyenyezisile tiko hi wubhayi ga wena ni kubiha ka wena. [20]

³Hikwalaho a tivula ti beletelwe, Zonake a vula yo ranga a yi nangi; Kanilezi a ximombo xa wena xi wa hi xa xibhayi, Lezaku u nga vumeli kuzwa tingana. [21]

⁴Ni lezi wa ha rila ka mina, uku: Dada! U wa hi munghana wa wuswa ga mina.

⁵Xana i tava ni khulo gakwe kala kupinzuka ke? I ta simamisa nago kala magumo ke? Wena u wulile a zakunghahi, Kanilezi u maha zilo zi bihileko u kala u zi mbhetisa.

⁶Jehova i lo wula ka mina masikwini ya hosi Josia, aku: Xana u wonile lezi Israeli a wasati loyi a hambukileko a nga zi maha ke? Yena i kanzihile a zitsunga zontlhe zi tlakukileko, ni hasi ka tontlhe tisinya to nyuka, kwalomo i na si hutsetse wubhayini. [22]

⁷Mina nzi wa alakanya nziku: Anzhako na mahile zontlhe lezi i ta wuya ka mina. Kanilezi a nga wuyangi. Makunu Juda, a makabye a nga tsumbekangiko, i lo zi wona.

⁸Nzi lo wona lezaku hambu lezi nzi nga hlongole Israeli, nzi mu nyika a papilo ga kuhambana hi kota ya wubhayi gakwe, Juda a makabye wakwe loyi a nga tsumbekangiko, a nga chavangi, kanilezi yenawu i lo famba a ya maha gona wubhayi. [23]

⁹Yena i lo nyenyezisa a tiko hi wubhayi gakwe go tshisa, hakuva i lo rembana ni maribye ni zibho.

¹⁰Hambu ka zontlhe lezo, Juda, a makabye wakwe loyi a nga tsumbekangiko, a nga wuyangi ka mina hi mbilu yakwe yontlhe, kanilezi hi wukhohlisi, ku wula Jehova.

¹¹Jehova i te ngalo ka mina: Israeli loyi a hambukileko i kombisile kululama ku hunza Juda loyi a nga tsumbekangiko.

¹²Yana, u ya kanela mahungu laya le Nwalungu, uku: Wuya Israeli, wena loyi u hambukileko, ku wula Jehova. Nzi nga ta ha mu zangarela, hakuva mina nzi na ni tipswalo, ku wula Jehova, nzi nga ta simamisa nzi zangara kala kupinzuka.

¹³Ntsena u fanele ku vumela a kubiha ka wena, lezaku u tsikile Jehova, a Nungungulu wa wena, na u tsutsumela matlhelo wontihe uya ka vanungungulu va vamatiko a hasi ka tisinya tontlhe to nyuka; a mu ingisangi a gezu ga mina, ku wula Jehova.

¹⁴Wuyani, nwina vanana va hluwukileko, ku wula Jehova, hakuva nzi nwinyi wa nwina. Nzi ta mu tekela a munwe ka muti ni muti, ni vambiri ka lixaka ni lixaka; nzi ta mu yisa le Zioni.

¹⁵Nzi ta mu nyika varisi va tsakisako mbilu ya mina, lava va ta nga mu gisa hi wutivi ni kupima.

¹⁶Laha nwina na mu enzeleka mu tala tikweni ka lawo masiku, ku wula Jehova, cima ku nga ta ha wuliwa kambe hi arke ga xivumelwano xa Jehova; va nga ta ha gi alakanya hambu kuzwa kuhulukela, kambe va nga ta maha ginwani.

¹⁷A ka xikhati lexo va ta vitana Jerusalema aku xitshamu xa wuhosi xa Jehova; a matiko wontihe ma ta tsombana le Jerusalema a vitweni ga Jehova; cima va nga ta ba famba hi kunonoha ka timbilu tabye.

¹⁸A ka lawo masiku a yindlu ya ka Juda yi ta longoloka zinwe ni yindlu ya ka Israeli; va tata hi wumbiri gabye hi le tikweni ga Nwalungu, vata ka tiko legi nzi nyikileko vararu va nwina a kuva tshomba yabye.

¹⁹Nzi waku: Nzi ta ku veka xikari ka vanana va mina, Nzi ta ku nyika a tiko gi xuvekako, A tshomba yo saseka nguvu xikari ka matiko. Nziku: Mu ta nzi vitana, muku: Dadani; Mu nga ta ha hambuka mu nzi siya.

²⁰Hizinene kota lezi a wasati a mahako wubhemba ngangweni wakwe, Hizalezo, yindlu ya ka Israeli, mu wa nga tsumbeki ka mina, ku wula Jehova.

²¹Lomu migangeni ku zwakala a gezu ga zirilo ni kutsikwila ka vana va ka Israeli; Hakuva vona va bihisile tindlela tabye, Va rivele Jehova, a Nungungulu wabye.

²²Wuyani, nwina vanana va hluwukileko, Mina nzi ta chuma a kuhambuka ka nwina. Hi hina valava, hi tile ka wena; Hakuva wena u Jehova a Nungungulu wa hina.

²³Hizinene hi tsumbile mahala a kuhanyiswa loku ku tako hi lomu migangeni, Ni ngholovanya ya lomu zitsungeni a yi vuni nchumu. Hizinene a kuhanyiswa ka Israeli kuta hi ka Jehova a Nungungulu wa hina.

²⁴A nungungulu wa tingana i gile ntiro wa vadadani va hina A ku sukela wusweni ga hina; A tiyivu tabye ni tihomu ta bye, A varisanyana vabye ni vanhanyana vabye. [24]

²⁵A hi weni hasi tinganeni ta hi na, Hi fenengela tona; Hakuva hi onhele Jehova a Nungungulu wa hina, Hina zinwe ni vadadani va hina kusukela wusweni kala nyamutlha; A hi ingisangi a gezu ga Jehova a Nungungulu wa hina.