Read tshwa Jeremia 32 Bible Online

Jeremia 32 - tshwa bible

Jeremia 32

¹Hi leyi a mhaka yi tileko ka Jeremia hi ka Jehova, hi lembe ga wukhume ga Zedekia hosi ya ka Juda, a lembe lego gi wa hi ga wu 18 ga Nebukadrezzare

²A ka xikhati lexo a tiyimpi ta hosi ya Babuloni ti lo vimbezela Jerusalema. A muprofeti Jeremia i wa valelwe hubyeni ga vanyakasani, a ndlwini ya hosi ya ka Juda. [158]

³Hakuva Zedekia hosi ya ka Juda i wa mu valele kona, aku: U profetela yini uku: Jehova i ngalo: Nzi ta nyikela muti lowu canjeni ga hosi ya Babuloni, yi ta enghena ka wona;

⁴na Zedekia a hosi ya ka Juda a nga ta pona a mandleni ya maKaldea; futsi i ta nyikelwa mandleni ya hosi ya Babuloni, kasi a wulawula nayo, va wonana hi mahlo;

⁵i ta yisa Zedekia le Babuloni, a ya tshama kona kala mina nzimu enzela, ku wula Jehova. Loku muiwa ni maKaldea mu nga ta humelela?

⁶Jeremia aku: A mhaka ya Jehova yi tile ka mina, yiku:

⁷Languta Hanameli nʼwana Xalume, a nakulobye wa raru wa wena, i tata ka wena aku: Ti xavele a simu ga mina gi nga le Anatote, hakuva u ni fanelo ku gi tirula u gi xava. [159]

⁸Zonake Hanameli, a raru tsongwani wa mina, i lota ka mina lomu hubyeni ga vanyakasani kota lezi Jehova a wulileko, aku ka mina: Xava a simu ga mina gi nga le Anatote, le tikweni ga Benjamini, hakuva u na ni fanelo yoga tshomba, ni yo gi tirula, ti xavele gona. Zonake nzi lo pima lezaku i gezu ga Jehova.

⁹Nzi lo xava a simu ga Hanameli, a nʼwana raru tsongwani wa mina, legi gi nga le Anatote; nzi lo mu pimela a mali, a 17 wa maxekeli ya siliva.

¹⁰Nzi lo tsala a papilo ga xavo, nzi gi tiyisa, na nzi hi ni timboni; zonake nzi lo pima mali xikalweni.

¹¹Nzi lo teka a papilo ga xavo, legi gi tiyisilweko hi tirela ni nayo, ni legi gi nga tiyiswangiko;

¹²nzi lo hendleleta a papilo ga xavo ka Baruke a nʼwana Neria, a nʼwana Maseya, a mahlweni ka Hanameli a nʼwana raru tsongwani, wa mina, ni mahlweni ka vakustumunyu lava va sinarileko papilo ga xavo, ni mahiwani ka vontlhe vaJuda lava va nga tshama hubyeni ya vanyakasani.

¹³Zonake nzi lo laya Baruke a mahlweni kabye, nziku:

¹⁴Jehova wa tiyimpi, a Nungungulu wa ka Israeli i ngalo: Teka mapapilo laya, a papilo legi gi tiyisilweko, ni legi gi nga valiwangiko, u ma chela mbiteni ya wumba, kasi ma fela ku hlayiseka masiku yo tala.

¹⁵Hakuva Jehova wa tiyimpi, a Nungungulu wa ka Israeli, i ngalo: Ma ha ta xava a tiyindlu ni masimu ni zivina a tikweni legi.

¹⁶Anzhako na nzi nyikile a papilo ga xavo ka Baruke a nʼwana Neria, nzi lo kombela ka Jehova, nziku:

¹⁷Hosi Jehova, hi wena u vangileko a tilo ni misava hi ntamu wa wena wa hombe ni woko ga wena gi nawulutilweko; a ku na nchumu xi tsanzako ka wena; [160]

¹⁸wena loyi u maheleko wuxinji ka makume mazana, u tlhelisa a kubiha ka vadadani zifuveni za vana vabye anzhako kabye; u wa hombe, Nungungulu nyamintamu, Jehova wa tiyimpi hi vito ga wena. [161]

¹⁹U wa hombe makungwini, u ni ntamu kumaheni; a mahlo ya wena ma wona a mahanyela wontihe ya vana va vanhu, kasi ku nyika ka munwe ni munwani kukotisa a hanyela gakwe, ni kukotisa a mbhanzu wa mitiro yakwe.

²⁰Wena u mahile ziwoniso ni mahanjalati le tikweni ga Gipite, ni hehla ka Israeli, ni xikari ka vanhu vanwani kala nyamutlha lezi; u ti mahele a vito legi u nga nago legi siku;

²¹u lo humesa vanhu va wena va Israeli hi le tikweni ga Gipite hi ziwoniso ni mahanjalati, hi canja ga ntamu ni woko gi nawulutilweko, ni kuchavisa ko tshisa. [162]

²²U va nyikile tiko legi u nga gi hlambanya ka vararu vabye lezaku u ta va nyika gona, a tiko gi khulungako a masi ni wulombe;

²³va lota va gi khozisa, kanilezi a va ingisangi gezu ga wena, hambu a ku famba hi nayo wa wena; ni zontlhe lezi u nga va layile a ku zi maha, a va zi mahangi; u kala u va humesela wontihe makhombo lawa.

²⁴Hi nga wona a tigingisi va vimbezeleko muti ha tona kasi ku wu teka; a muti wu nyikelwe mandleni ya maKaldea lava va lwako nawo, hi kota ya tisupado ni ndlala ni ntungu. Lezi u nga zi wula za tatiseka, wa zi wona.

²⁵Hosi Nungungulu, hambu zi hi tano, u wa te ngalo ka mina: Ti xavele a simu legi, u va ni timboni, kasi lezo a muti wu nyikilwe mandleni ya maKaldea.

²⁶Zonake a mhaka yi lota ka Jeremia hi ka Jehova, yiku:

²⁷Hi mina Jehova, a Nungungulu wa nyama yontlhe; xi kona leʼxi nga nzi tsanzako ke? [163]

²⁸Hikwalaho Jehova i ngalo: Languta, nzi ta nyikela lowu muti a mandleni ya maKaldea, ni canjeni ga Nebukadrezzare hosi ya Babuloni, i ta wu teka.

²⁹A maKaldea ma vimbezelako muti lowu, va ta enghena ka wona va wu hisa hi nzilo, va hisa ni tiyindlu tontlhe leti ku hiselweko ka tona a tibani ka Baali, ni ku nyikelwa a minyikelo ya kunwa ka vanungungulu vanwani, kasi ku nzi zangarisa.

³⁰Hakuva a kusukela wusweni gabye a vana va Israeli ni vana va ka Juda va mahile kubiha ntsena mahlweni ka mina, hakuva a vana va Israeli va nzi zangarisile ntsena hi mitiro ya mandla yabye, ku wula Jehova.

³¹Hakuva lowu muti wu vindlusile a zanga ya mina ni xiviti xa mina a kusukela a siku lego va nga wu aka kala nyamutlha lezi; kasi nza fela ku wu susa mahlweni ka mina,

³²hi kota ya kubiha kontlhe ka vana va Israeli ni vana va ka Juda, loku va ku mahileko kasi ku nzi zangarisa, vona ni tihosi tabye, ni tihosana tabye, ni vapristi vabye, ni vaprofeti vabye, ni vanhu va ka Juda ni vaaki va Jerusalema. [164]

³³Va nzi fularele, a va nzi langutangi; hambu lezi nzi nga va gonzisa kambe ni kambe, a va ingisangi lezaku va kawukiwa.

³⁴Kanilezi va yimisile a manyala yabye a ndlwini leyi yi vitwako hi vito ga mina, va yi nyenyezisa. [165]

³⁵Va akele Baali a matshamu yo tlakuka le koveni wa nʼwana Hinnome, lezaku kasi va hisela Moloki a vana vabye va xinuna ni va xisati; lezo nzi nga va rumangiko zona, hambu a kuva kupimeni ka mina lezaku va maha manyala lawa, va maha Juda a onha.

³⁶Hikwalaho Jehova, a Nungungulu wa Israeli, i ngalo makunu xungetano hi muti lowu, mu wu wulako, muku: Wu nyikelwe canjeni ga hosi ya Babuloni hi tisupado, ni ndlala, ni ntungu.

³⁷Langutani, nzi ta va tsombanyisela hi le matikweni wontihe, lawo nzi va hlongoleleko kona a zangeni ya mina ni xiviti xa mina ni khulo ga hombe; nzi ta tlhela nzi va wuyisa ka legi wutshamu, nzi va maha va tshamiseka. [166]

³⁸Vona va tava vanhu va mina, na mina nzi tava Nungungulu wabye.

³⁹Nzi ta vaha mbilu yinwe nzi va gonzisa ndlela yinwe, ya ku nzi chava kala kupinzuka; va ta kateka, vona ni vana vabye anzhako kabye,

⁴⁰Nzi ta maha navo a xivumelwano xi nga gumelwiko, lezaku nzi nga ta va fularela, nzi nga tsiki ku va katekisa; nzi veka xichawo xa mina timbilwini tabye, lezaku va nga ha nzi fulareli.

⁴¹Nzi ta tangaliswa ha vona, nzi va katekisa; futsi nzi ta va zimeka tikweni legi hi mbilu ya mina yontlhe ni muhefemulo wa mina wontihe. [167]

⁴²Hakuva Jehova i ngalo: Khwatsi hilezi nzi nehileko a hehla ka lava vanhu a khombo legi ga hombe, hizalezo nzi ta neha hehla kabye wontihe makatekwa lawa nzi va tsumbisileko wona.

⁴³Ka ha ta xabyiwa masimu a ka legi tiko, legi nwina mu nge ngalo: Xiwula, a ku na munhu hambu xihari ka gona, gi nyikelwe canjeni ga maKaldea.

⁴⁴Va ta xava masimu hi mali, va tsala mapapilo ya xavo, va ma tiyisa, va vitana timboni, lomu tikweni ga Benjamini ni le matlhelweni ya Jerusalema, ni le mitini ya ka Juda, ni le mitini ya lomu zitsungeni, ni le mitini ya tiluwa, ni le mitini ya Dzonga; hakuva nzi ta wuyisa a vakhonwiwa vabye, ku wula Jehova.