Read tshwa Jeremia 34 Bible Online

Jeremia 34 - tshwa bible

Jeremia 34

¹A mhaka leyi yi tileko ka Jeremia hi ka Jehova, laha Nebukadnezzare hosi ya Babuloni ni yontlhe a yimpi yakwe, ni yontlhe a mifumo ya misava leyi yi nga fumiwa hi yena, ni matiko wontihe va ngalwa va vukela Jerusalema ni yontlhe a miti ya gona, [172]

²yiku: Jehova a Nungungulu wa ka Israeli i ngalo: Famba u ya byela Zedekia hosi ya ka Juda, uku: Jehova i ngalo: Languta, nzi ta nyikela lowu muti canjeni ga hosi ya Babuloni, yena i ta wu hisa hi nzilo.

³Wena u nga ta pona canjeni gakwe, futsi u ta khomiwa u nyikelwa a canjeni gakwe; u ta wonana ni hosi ya Babuloni, yena i ta xuxa na wena nomu ni nomu, zonake u taya Babuloni.

⁴Hambu lezo, zwana a mhaka ya Jehova, wena Zedekia hosi ya ka Juda, Jehova i wula ha wena: U nga ta dawa hi supado.

⁵U tafa hi kurula; u tava ni malahlelwa ya kuhiswa khwatsi hi kuhiswa ka vararu va wena, a tihosi ta kaleloko leti ti nga hi mahlweni ka wena; va ta ku rilela, vaku: Yowee, hosi! Hakuva hi mina nzi wulileko lezo, ku wula Jehova. [173]

⁶Jeremia muprofeti i lo byela Zedekia hosi ya ka Juda tontlhe leti timhaka le Jerusalema,

⁷laha a yimpi ya hosi ya Babuloni yi ngalwa ni Jerusalema ni yontlhe a miti ya ka Juda leyi yi nga sele, yi nga Lakixe na Azeka, hakuva hi yona yoce a miti ya makhokhola leyo yi yi nga sele xikari ka miti ya ka Juda.

⁸Leyi hi mhaka ya Jehova yi ngata ka Jeremia anzhako na hosi Zedekia a mahile a xivumelwano ni vontlhe vanhu va nga hi Jerusalema, lezaku vaba hungu ga kutlhatlheka;

⁹lezaku munwe ni munwani a tlhatlha a nanza gakwe ga xinuna ni ga xisati, loku a hi muHeberu wa xinuna kutani muHeberu wa xisati; lezaku ku nga hi na munhu a tirisako muJuda-kulobye kota khumbi.

¹⁰A tihosana ni vanhu vontlhe, lava va enghenileko ka xivumelwano lexo, va lo vumela lezaku munwe ni munwani a tlhatlha a nanza gakwe ga xinuna ni ga xisati ma ti fambela, va nga ha ma tirisi kambe; va lo ingisa, va ma tlhatlha.

¹¹Kanilezi anzhako va lo hunzuluka, va tlhela va vitana a malanza yabye ya xinuna ni ya xisati ma wuya, lawo va nga ma tsikile ma tlhatlheka, va lo ma khonela a wukhumbi, a vavanuna ni vavasati,

¹²Zonake a mhaka ya Jehova yi lota ka Jeremia hi ka Jehova, yiku:

¹³Jehova, a Nungungulu wa Israeli, i ngalo: Nzi lo maha xivumelwano ni vakoko va nwina a sikwini lego nzi nga va humesa a tikweni ga Gipite, a ndlwini ya wukhumbi,

¹⁴nziku: A kumbheleni ka ntlhanu wa malembe ni mambiri a munwe ni munwani i ta tlhatlha muHeberu-kulobye loyi a ti xavisileko ka nwina; i ta ku tirela a ntlhanu wa malembe ni ginwe, zonake u ta mu tsika a tlhatlheka; kanilezi a vakoko va nwina a va nzi ingisangi, hambu ni ku panga tindleve. [174]

¹⁵Makunu mu wa hunzulukile, mu maha lezi zi lulamileko mahlweni ka mina, hi kuba hungu hi kutlhatlheka munwe ni munwani ka muakelwane wakwe; mu wa mahile a xivumelwano zinwe na mina lomu ndlwini leyi yi vitwako hi vito ga mina.

¹⁶Kanilezi mu tlhelile nzhako, mu hanahanisa a vito ga mina, munwe ni munwani a wuyisa nanza gakwe ga xinuna ni ga xisati, lawo mu nga ma tlharihile ma ti fambela; mu ma khonele kambe a wukhumbi lezaku ma mu tirela.

¹⁷Hikwalaho Jehova i ngalo: Nwina a mu nzi ingisangi, a mu bangi hungu ga kutlhatlheka a munwe ni munwani ka makabye wakwe, ni munwe ni munwani ka muakelwane wakwe. Langutani, nza mu bikela kutlhatlheka, ku wula Jehova, nzi tlhatlha matlhari, ni ntungu, ni ndlala; nza mu nyikela mu xaniswa xikari ka yontlhe mifumo ya misava.

¹⁸Nzi ta nyikela a vanhu lava va nga hambunyeta a xivumelwano xa mina, va nga hlayisangiko a zileletelo za xivumelwano lexi va nga xi maha mahlweni ka mina, laha va nga panza role hi laha xikari, va hunza xikari ka zipanze za kona; [175]

¹⁹va nga tihosana ta ka Juda ni ta Jerusalema, ni tinduna, ni Vapristi, ni vontlhe vanhu va tiko lava va nga hunza hi laha xikari ka role;

²⁰nzi ta va nyikela canjeni ga valala vabye, ni canjeni ga lavo va va xuvelako a kufa, a zirumbi zabye zi ta giwa hi tinyanyani ta tilo ni zivanza za misava. [176]

²¹Na Zedekia hosi ya ka Juda, zinwe ni tihosana takwe nzi ta va nyikela canjeni ga valala vabye ni canjeni ga lava va va xuvelako kufa, ku nga canjeni ga yimpi ya hosi ya Babuloni, leyi yi sukileko ka nwina.

²²Languta, nzi ta va leletela lezaku va wuyela ka lowu muti, ku wula Jehova, va talwa nawo, va wu khozisa, va wu hisa hi nzilo; ni miti ya ka Juda nzi ta yi maha xiwula, ku nga hi na muaki ka wona. [177]