Read tshwa Jeremia 39 Bible Online

Jeremia 39 - tshwa bible

Jeremia 39

¹Hi hweti ya wukhume ya lembe ga wu 9 ga kufuma ka Zedekia a hosi ya ka Juda, Nebukadrezzare a hosi ya le Babuloni i lota ni yimpi yakwe yontlhe a ta vukela Jerusalema, a gi vimbezela. [185]

²zonake hi lembe ga wukhume ni ginwe ga Zedekia, ka hweti ya wumune, hi siku ga wuntlhanu ni mune, a muti wu lo botelwa;

³ku enghena tontlhe a tihosana ta hosi ya Babuloni ti lo ya yima nyangweni ya laha xikari, va nga vaNergal-xarezeri, na Samgar-nebo, na Sarsekimu, na Rab-sarisi, na Nergal-xarezeri, ni wahombe wa titlhari, ni tontlhe tinwani tihosana ta hosi ya Babuloni.

⁴Kute loku Zedekia hosi ya ka Juda, ni vontlhe vavanuna va yimpi va va wonile, va lo pfowola va kinzimuka mutini ni wusiku, hi ndlela ya xivina xa hosi, hi nyangwa yi nga xikari ka makhurisi mambiri, va huma hi ndlela ya Araba.

⁵Kanilezi a yimpi ya maKaldea yi lo va hlongolisa, vaya kamanyeta Zedekia le minkoveni ya Jeriko, va mu yisa ka Nebukadrezzare hosi ya Babuloni, le Ribla a tikweni ga Hamate, a ya lamuliwa kona.

⁶A hosi ya Babuloni yi lo daya a vana va Zedekia a mahlweni kakwe le Ribla; ni vahombe vontlhe va vaJuda a hosi ya Babuloni yi lo va daya.

⁷I lo thodola a mahlo ya Zedekia, a mu roja hi mangenje kasi ku mu yisa le Babuloni.

⁸Ni maKaldea ma lo hisa hi nzilo a yindlu ya hosi ni tiyindlu ta vanhu va tiko, va gidlimusela a tigingisi ta Jerusalema.

⁹A vanhu va nga sala mutini, ni lava va seleko lomu tikweni, zinwe ni vapfowoli lava va nga ti nyikele, va lo yiswa Babuloni hi Nebuzaradani a nduna ya vanyakasani.

¹⁰Kanilezi a vanhu va nyalidede ni vanyakeke, Nebuzaradani a nduna ya vanyakasani i lo va tsika lomu tikweni ga Juda, a va nyika siku gwalego a zivina ni masimu.

¹¹Nebukadrezzare hosi ya Babuloni, i wa sina a rumisile Nebuzaradani a nduna ya vanyakasani ha Jeremia, aku:

¹²Mu teke, u mu hlayisa, u nga dzuki u mu mahela kubiha; kanilezi maha kakwe lezo a to ku byela.

¹³Zonake Nebuzaradani a nduna ya vanyakasani, na Nebuxazbani, Rabsarisi, na Nergal-xarezeri, ni wahombe wa titlhari ni tontlhe tinduna ta hombe ta hosi ya Babuloni,

¹⁴ya lo rumisa a ku ya humesa Jeremia a hubyeni ya vanyakasani, va mu hendleleta a mandleni ya Gedalia nʼwana Ahikamu, nʼwana Xafani, lezaku aya naye kaya; lezo i lo tshama xikari ka vanhu.

¹⁵A mhaka ya ka Jehova yi lota ka Jeremia na a ba khotselwe hubyeni ya vanyakasani, yiku:

¹⁶Famba u ya byela Ebed-meleki a muEtiopia, uku: Jehova wa tiyimpi, a Nungungulu wa Israeli i ngalo: Languta, nzi ta tatisa a timhaka ta mina hehla ka lowu muti hi kubiha, na ku nga hi kusaseka; ti ta tatiseka kuwoneni ka wena hi lego siku.

¹⁷Kanilezi nzi ta ku ponisa hi lego siku, ku wula Jehova, u nga ta nyikelwa a mandleni ya vanhu lavo u va chavako.

¹⁸Futsi nzi ta ku hlanguta, u nga ta dawa hi supado; kanilezi a wutomi ga wena u ta gi wutla kukotisa muphango, hakuva u nzi tsumbile, ku wula Jehova.