Read tshwa Jeremia 40 Bible Online

Jeremia 40 - tshwa bible

Jeremia 40

¹A mhaka leyi yi tileko ka Jeremia hi ka Jehova anzhako ka kuva Nebuzaradani nduna ya vanyakasani a mu tlhatlhisile le Rama, laho a nga mu kuma kona na a bohilwe hi mangenje, na a hi xikari ka lava va khomilweko vontlhe va Jerusalema ni ka Juda, lavo va nga yiswa a wukhumbini le Babuloni.

²A nduna ya vanyakasani yi lo vitana Jeremia yiku kakwe: Jehova a Nungungulu wa wena i wulile a khombo legi hehla ka legi wutshamu;

³Jehova i gi nehile, a maha lezi a nga zi wula, hakuva mu wa gohele Jehova, mu nga ingisi a gezu gakwe, kala mu humelwa hi lexi xilo.

⁴Languta, nzi ku tlharihile a mangenje lawa ma nga hi mawokweni ya wena. Loku u ranza a ku famba na mina le Babuloni, ngone, nzi ta ku lonzowota. Kanilezi loku u nga zi ranzi a ku famba na mina le Babuloni, u nga sala. Hi nga wona, gontlhe tiko gi le mahlweni ka wena; ni kwihi ku ku xalalisako, laha u ranzako kuya kona, famba seyo.

⁵Kute na a ha hlwela ku famba, aku kakwe; Tlhelela ka Gedalia, nʼwana. Ahikamu nʼwana Xafani, loye hosi ya Babuloni yi mu mahileko a mufumeli hehla ka miti ya ka Juda, u tshama naye xikari ka vanhu; hambu a ku ti yela ni gihi tlhelo u gi ranzako. Zonake a nduna ya vanyakasani yi lo mu nyika timbuva ni xinyikiwo, yi mu tsika a famba.

⁶Zonake Jeremia i lo famba ka Gedalia nʼwana Ahikamu le Mizpa, a tshama naye a xikari ka vanhu lava va seleko lomu tikweni.

⁷A tinduna ta tiyimpi leti ti nga nkoveni zinwe ni vanhu va tona, loku va zwile lezaku a hosi ya le Babuloni yi vekile Gedalia nʼwana Ahikamu, akuva mufumeli lomu tikweni, ni lezaku i vekile; mandleni yakwe a vavanuna ni vavasati ni vanana ni zisiwana za lomu tikweni, lava va nga yisiwangiko kukhonweni le Babuloni,

⁸zonake va lota ka Gedalia le Mizpa. Ku wa hi Ixmaeli nʼwana Netania, na Johannani na Jonatani a vana va Karea, na Seraia nʼwana Tanhumete, ni vana va Efai a muNetofate, na Jezania a nʼwana wa muMaakate, zinwe ni vanhu vabye.

⁹Zonake Gedalia a nʼwana Ahikamu wa Xafani i lo hlambanya ka vona ni ka vanhu vabye, aku: Mu nga chaveni a ku tirela a maKaldea! Tshamani lomu tikweni, mu tirela a hosi ya le Babuloni, mu ta tshameka khwatsi.

¹⁰Mina, bo, nzi ya aka le Mizpa, kasi ku yima mahlweni ka maKaldea lawa ma ta ngata ka hina. Kanilezi nwina, hlengeletelani a vinya ni mihanzu ya ximumu ni mafura, mu zi veka lomu zibyeni za nwina, mu aka lomu mitini leyi mu yi tekileko.

¹¹Hizalezo ni vaJuda vontlhe lava va nga le tikweni ga Moabi, ni xikari ka vana va Amoni, ni le Edome, ni lava va nga hi matikweni wontihe, laha va ngazwa lezaku a hosi ya le Babuloni yi siyile a misalela le Juda, ni lezaku yi yimisile Gedalia a nʼwana Ahikamu wa Xafani akuva mufumeli wabye,

¹²zonake a vaJuda vontlhe va lo suka matshanwini wontihe lawa va nga hangalakile ka wona, va tlhelela tikweni ga ka Juda ka Gedalia le Mizpa, va ya hlengeletela a vinya ni mihanzu yo tala ya ximumu.

¹³Johannani a nʼwana Karea, ni tinduna tontlhe ta mabutho lawa ma nga hi lomu mikoveni, va lota ka Gedalia le Mizpa, va taku kakwe:

¹⁴Wa zi tiva lezaku Baalisi a hosi ya vana va ka Amoni i rumile Ixmaeli a nʼwana Netania a ku ta ku daya ke? Kanilezi Gedalia a nʼwana Ahikamu a nga va kholwangi.

¹⁵Zonake Johannani a nʼwana Karea i lo byela Gedalia le Mizpa xihundleni, aku: Nzi vumele nzi famba nzi ya daya Ixmaeli a nʼwana Netania, zi nga tibyiwi hi munhu. I ta ku dayela yini ke, kasi ku hangalasa a vaJuda vontlhe lava va tsombanako ka wena, ni ku lovisa a misalela ya ka Juda ke?

¹⁶Kanilezi Gedalia a nʼwana Ahikamu i te ngalo ka Johannani a nʼwana Karea: U nga mahi xilo xo nghaho, hakuva u hembela Ixmaeli.