Read tshwa Jeremia 41 Bible Online

Jeremia 41 - tshwa bible

Jeremia 41

¹Makunu hi hweti ya wuntlhanu ni timbiri, Ixmaeli a nʼwana Netania wa Elixama, wa yindlu ya wuhosi, a nga nduna ya hombe ya hosi, i lota ka Gedalia a nʼwana Ahikamu le Mizpa na hi ni khume ga vavanuna, va ta tshama kugeni vontlhe kwale Mizpa. [186]

²Zonake Ixmaeli a nʼwana Netania ni khume ga vavanuna lava a nga hi navo, va lo suka va yima, va gwaza Gedalia a nʼwana Ahikamu wa Xafani hi supado, va mu daya, yaloye a hosi ya le Babuloni yi nga mu vekile kuva mufumeli lomo tikweni.

³Ixmaeli i lo daya ni vaJuda lava va nga hi na Gedalia ta Mizpa, ni maKaldea lawa ma nga hi laho, ti nga tinhenha.

⁴Hi siku ga wumbiri anzhako ka kudawa ka Gedalia, na zi nga se tibyiwa hi munhu,

⁵ku lo chikela a vanhu va le Xekemi ni le Xilo ni le Samaria, va wa hi 80 wa vavanuna, na va cingile malevu yabye, a tinguwo tabye na ti hanzulwe, na va ti tsemelele, na va welele minyikelo ya tinzhoho ni pepo, va zi neha ndlwini ya Jehova. [187]

⁶Ixmaeli nʼwana Netania i lo huma ku va khinga, na a kari a rila. Loku a tlhangene navo, i te ngalo kabye: Tanani ka Gedalia a nʼwana Ahikamu!

⁷Loku va chikele xikari ka muti, Ixmaeli a nʼwana Netania i lo va daya a va hoxa lomu rinzini, na a hi zinwe ni vavanuna vakwe.

⁸Kanilezi ku wa hi ni khume ga vavanuna xikari kabye, va ngaku ka Ixmaeli: U nga hi dayi; hakuva hi na ni mabako ya Zakuga hi ma fihlileko le nkoveni, a mavele ni sevada ni mafura ni wulombe. Hikwalaho i lo va tsika a nga va dayi zinwe ni vamakabye vabye.

⁹Makunu a rinzi legi Ixmaeli a nga hoxa ka gona a zirumbi za vanhu lava a nga va daya zinwe na Gedalia, hi legi hosi Asa a nga gi mahile hi ku chava Baaxa a hosi ya ka Israeli, hi gona Ixmaeli nʼwana Netania a nga gi tata hi zirumbi. [188]

¹⁰Zonake Ixmaeli i lo famba ni misalela ya vanhu lava va nga hi lomu Mizpa, a vanhanyana va hosi, ni vontlhe vanhu lava va nga sele le Mizpa, lava Nebuzaradani a nduna ya vanyakasani a nga va nyikile ka Gedalia a nʼwana Ahikamu. Ixmaeli nʼwana Netania i lo va khomelaa famba navo ka vana va Amoni.

¹¹Kanilezi Johannani nʼwana Karea ni tinduna tontlhe ta mabutho lawa ma nga hi naye, loku va zwile a kubiha kontlhe loku a ku mahileko Ixmaeli nʼwana Netania,

¹²va lo teka vontlhe vavanuna va yalwa na Ixmaeli a nʼwana Netania, va lo ya mu kuma laha kusuhani ni tiva ga hombe gi nga hi le Gibeoni. [189]

¹³Makunu laha a vanhu vontlhe lava va nga hi na Ixmaeli va nga wona Johannani nʼwana Karea ni tinduna tontlhe ta mabutho lawa a nga hi nawo, va lo tsaka.

¹⁴Zinghaho a vanhu vontlhe lava Ixmaeli a nga va khomele le Mizpa va lo hunzuluka va tlhela vaya ka Johannani, nʼwana Karea.

¹⁵Kanilezi Ixmaeli nʼwana Netania i lo tsutsuma Johannani, na hi ni ntlhanu wa vavanuna ni vanharu, vaya ka vana va Amoni.

¹⁶Zonake Johannani nʼwana Karea ni tinduna tontlhe ta mabutho lawa a nga hi nawo va lo teka a misalela ya vanhu vontlhe lava Ixmaeli nʼwana Netania a nga va humesile le Mizpa anzhaho kakuva a dele Gedalia nʼwana Ahikamu, va nga hi vavanuna va yimpi, a vavasati ni vanana ni mithenwa, lava va nga va tlhelisile hi le Gibeoni;

¹⁷va lo andlamuka va ya tshama le Gerute Cimhame, ngomama ni Betlehema, kasi kuya le Gipite hi kota yo chava maKaldea. [190]

¹⁸Hakuva va wa va chava hilezi Ixmaeli nʼwana Netania a nga dele Gedalia nʼwana Ahikamu, loyi a hosi ya le Babuloni yi nga mu vekile kuva mufumeli lomu tikweni.