Read tshwa Jeremia 43 Bible Online

Jeremia 43 - tshwa bible

Jeremia 43

¹Laha Jeremia a nga wa mhhetile ku byela tiko gontlhe a timhaka tontlhe ta Jehova a Nungungulu wabye, leti Jehova a Nungungulu wabye a ti rumeleko kabye ha yena,

²Azaria a nʼwana Hoxaia na Johannani a nʼwana Karea, ni vanhu vontlhe va matshanza va lo byela Jeremia, vaku: Wa hemba wunwa! Jehova Nungungulu wa hina a nga ku rumangi ku ta hi byela, uku: Mu ngayi Gipite mu ya luvela kona.

³Kanilezi hi Baruke a nʼwana Neria a ku kucetelako akuva u hi vukela, kasi ku hi nyikela mandleni ya maKaldea, va fela ku hi daya hambu ku hi yisa wukhumbini le Babuloni.

⁴Zinghaho Johannani nʼwana Karea ni tinduna tontlhe ta mabutho ni vanhu vontlhe a va ingisangi a gezu ga Jehova, gaku a va tshame tikweni ga ka Juda.

⁵Johannani nʼwana Karea ni tinduna tontlhe ta mabutho va lo teka a misalela yontlhe ya ka Juda, lava va nga wa wuyile hi lomu matikweni wontihe lawa va nga yile ka wona, kasi ku ta aka tikweni ga ka Juda;

⁶a vavanuna, ni vavasati, ni vanana, ni vanhanyana va hosi, ni vontlhe vanhu lava Nebuzaradani a nduna ya vanyakasani a nga va siyile na Gedalia nʼwana Ahikamu wa Xafani, zinwe na Jeremia na Baruke nʼwana Neria,

⁷ya loya tikweni ga Gipite hakuva a va ingisangi a gezu ga Jehova. Va lo ya chikela le Tahpanhesi.

⁸Zonake le Tahpanhesi a gezu ga Jehova gi lota ka Jeremia, giku:

⁹Teka a maribye ya hombe u ma mehela hi murongwa lomu lilonzeni laha nyangweni ya yindlu ya Faro le Tahpanhesi, u zi maha mahlweni ka vanhu va ka Juda,

¹⁰uku kabye: Jehova wa tiyimpi a Nungungulu wa Israeli, i ngalo: Nzi ta vitanisa Nebukadrezzare a hosi ya le Babuloni, a nanza ga mina, nzi ta yimisa a xitshamu xakwe xa wuhosi hehla ka maribye lawa nzi ma fihlileko; i ta gwimba a tenda gakwe ga wuhosi hehla ka wona.

¹¹I ta ta hlasela a tiko ga Gipite; lava va yimiselweko kufa va ta dawa, ni lava va yimiselweko wukhumbi va taya wukhumbini; lava va yimiselweko ku dawa hi supado va ta dawa hi supado.

¹²Nzi ta dzivela nzilo lomu tindlwini ta vanungungulu va Gipite; Nebukadrezzare i ta ti hisa a yisa zifananiso wukhumbini. I ta ti fenengeta hi tiko ga Gipite kukotisa a murisi a bohako nguwo yakwe; zonake i ta huma lomo hi kurula.

¹³I ta khungumula a timhinga ta maribye le Bete-xemexe lomu tikweni ga Gipite, a hisa hi nzilo a tiyindlu ta vanungungulu va Gipite.