Read tshwa Jeremia 44 Bible Online

Jeremia 44 - tshwa bible

Jeremia 44

¹A gezu legi gi ngata ka Jeremia xungetano ni vaJuda vontlhe lava va nga wa akile tikweni ga Gipite le Migdoli, ni le Tahpanhesi, ni le Nofe, ni lomu tikweni ga Patrosi, giku:

²Jehova wa tiyimpi a Nungungulu wa Israeli, i ngalo: Mu wonile a makhombo wontihe lawa nzi ma nehileko hehla ka Jerusalema ni miti yontlhe ya ka Juda. Hi nga wonani, inyamutlha yi mahile marumbi, a ka hi na munhu ka yona,

³hi kota ya kubiha loku va ku mahileko va vindlusa a zanga ya mina hi ku hisa tibani ni ku tirela vanwani vanungungulu, lava va nga kala va nga va tivi, hambu nwina ni vadadani va nwina.

⁴Nzi lo khanzakanya nzi mu rumela a malanza ya mina, va nga vaprofeti, va taku ngalo: Mu nga maheni a manyalataniso lawa nzi ma vengako!

⁵Kanilezi a va ingisangi, ge hambu ku phumunha ndleve yabye, kasi ku huma kubiheni kabye, va nga ha hiseli tibani a vanwani vanungungulu.

⁶Hikwalaho a khulo ga mina ni zanga ya mina zi lo chululeka zi vura lomu mitini ya ka Juda ni lomu maruweni ya Jerusalema; inyamutlha lezi zi hahlulwe zi maha marumbi.

⁷Hikwalaho Jehova, a Nungungulu wa tiyimpi tlhelo Nungungulu wa Israeli, i ngalo: Hikuyini mu ti mahelako a khombo legi ga hombe, kala ku lobyiswa a vavanuna; ni vavasati, ni vanana ni zihlangana xikari ka Juda, ku nga sali ni munwe wa nwina?

⁸Mu vindlusela yini a zanga ya mina hi mitiro ya mandla ya nwina, mu hisela vanwani vanungungulu a tibani lomu tikweni ga Gipite, lomu mu tileko mu ta luvela, kasi mu fela ku susiwa mu mahiwa xiruko, mu tseketselwa xikari ka matiko wontihe ya misava ke?

⁹Kasi mu rivele a kubiha ka vakoko va nwina, ni kubiha ka tihosi ta ka Juda, ni kubiha ka vasati vabye, ni kubiha ka nwina wutsumbu, ni kubiha ka vasati va nwina loku va ku mahileko lomu tikweni ga ka Juda ni lomu maruweni ya Jerusalema ke?

¹⁰Kala nyamutlha a va se nga ti tsongahata, ge hambu ku chava, kutani ku famba hi milayo ya mina ni zileletelo lezi nzi nyikileko nwina ni vakoko ya nwina.

¹¹Hikwalaho Jehova wa tiyimpi, a Nungungulu wa Israeli, i ngalo: Nzi ta mu nonohisela a nghohe ya mina nzi mu mahela kubiha, nzi hihirita gontlhe Juda. [192]

¹²Nzi ta khoma a misalela ya ka Juda,, lava va phikelelako a kuya tikweni ga Gipite va ya luvela; va ta lova vontlhe va dawa le tikweni ga Gipite. Va ta lobyiswa hi supado ni ndlala, a vatsongwani ni vahombe va tafa hi supado ni ndlala. Va tava xiruko ni xirewukiso, vava nzhukano va xanziwa.

¹³Hakuva nzi taba lava va akileko tikweni ga Gipite, khwatsi hilezi nzi ngaba Jerusalema hi supado ni ndlala ni ntungu.

¹⁴Kasi ku nga poni hambu ku sala ni munwe wa misalela ya ka Juda lava va yileko ku ya luvela tikweni ga Gipite, na va ranza ku tlhelela tikweni ga ka Juda legi va xuvako ku ta aka ka gona. Va nga ta tlhelela kona saseka vanwani va ta nga pona.

¹⁵Zonake vontlhe vavanuna lava va nga zi tiva lezaku a vasati vabye va hisele vanwani vanungungulu a tibani, ni vavasati vontlhe lava va nga yimile laho xi nga xidlemo xa hombe, vontlhe lava ya nga akile tikweni ga Gipite le Patrosi, va lo hlamula Jeremia,

¹⁶vaku; Xungetano ni mhaka leyi u nga hi byela yona vitweni ga Jehova, hi nga ta ku ingisa. [193]

¹⁷Kanilezi hi ta maha zontlhe lezi hi zi wulileko hi milomu ya hina, hi ta hisela a muzinza wa tilo a libani, ni ku mu mahela miphahlo ya kunwa khwatsi hilezi hi mahileko hina ni vadadani va hina, ni tihosi ni tihosana ta hina lomu mitini ya ka Juda ni lomu maruweni ya Jerusalema. Hakuva xikhatini lexo hi wa hi ni kuga ku eneleko, hi wa humelela, hi nga woni kubiha.

¹⁸Kanilezi cima ha nga tsika ku hisela a muzinza wa tilo a libani, ni ku mu phahlela hi zakunwa, ha vumala zontlhe, hi lobyiswa hi supado ni ndlala.

¹⁹A xikhati lexo hi nga hisela a muzinza wa tilo a tibani, hi mu phahlela hi zakunwa, xana hi lo mu mahela a zikhekhetselo hi mufananiso wakwe, hi mu phahlela hi zakunwa, a vanuna va hina na va nga zi vumeli ke? [194]

²⁰Zonake Jeremia a wulawula ka vontlhe vanhu, a vavanuna ni vavasati, ni ka vontlhe lava va nga mu hlamule, aku:

²¹Jehova a nga ti alakanyangi a tibani leti mu nga hisa lomu mitini ya ka Juda ni lomu maruweni ya Jerusalema, nwina ni vadadani va nwina, a tihosi ni tihosana ta nwina, ni vanhu vontlhe va tiko; Jehova a nga zi khumbulangi ke?

²²Jehova i wa nga zi koti ku timisela hi kota ya kubiha ka zimaho za nwina, ni manyalataniso lawa mu nga ma maha. A tiko ga nwina gi hahlukile hi kota ya zona, giva marumbi ni xiruko, gi kala gi vumala ni muaki nyamutlha.

²³Hikuva mu hisile tibani, mu onhela Jehova, mu nga ingisi a gezu ga Jehova, mu nga hlayisi milayo yakwe ni zileletelo zakwe ni ziyimiso zakwe, hikwalaho mu welwe hi khombo legi kota lezi zi nga zona nyamutlha.

²⁴Jeremia i lo engeta aku ka vanhu vontlhe ni ka vavasati vontlhe: Nwina nwentlhe va ka Juda mu nga lomu tikweni ga Gipite, zwanani a gezu ga Jehova!

²⁵Jehova wa tiyimpi, a Nungungulu wa Israeli, i ngalo: Nwina ni vasati va nwina mu tatisile hi mandla ya nwina lezi mu nga wulile hi milomu ya nwina, muku: Futsi hi ta tatisa a zifungo za hina lezi hi zi fungileko, za ku hisela a muzinza wa tilo a libani, hi mu phahlela hi zakunwa. Tiyisanike a zifungo za nwina, mu zi tatisa!

²⁶Makunu zwanani a mhaka ya ka Jehova, nwina nwentlhe va ka Juda lava mu akileko lomu Gipite! Langutani, nzi hlambanyile hi vito ga mina ga hombe, ku wula Jehova, lezaku a vito ga mina gi nga ta ha kumbukwa hi nomu wa ni wihi wa va ka Juda lava va akileko lomu tikweni ga Gipite, aku: Khwatsi hilezi Hosi Jehova a hanyako!

²⁷Nza va xiyelela kasi ku va mahela kubiha, na ku nga hi kusasa. A vanhu vontlhe va ka Juda va nga lomu tikweni ga Gipite va ta dawa hi supado ni ndlala, kala va mbhela.

²⁸Lava va ta nga pona supado, va nga hi va moyana, va ta huma lomu Gipite va tlhelela tikweni ga ka Juda. Hi kona a misalela yontlhe ya ka Juda, lava va tileko va ta luvela lomu tikweni ga Gipite va ta nga zi tiva aku a mhaka yo tiya hi ya mani, a yabye kutani ya mina.

²⁹A xikombiso xa nwina xo tiyisa lezaku nzi ta mu tsayisa wutshanwini legi, ku wula Jehova, kasi mu fela ku zi tiva lezaku a timhaka ta mina ti ta tatiseka hi khombo hehla ka nwina, hi lexi:

³⁰Jehova i ngalo: Nzi ta nyikela Faro Hofra a hosi ya Gipite mandleni ya valala vakwe, ni mandleni ya lava va hlotako wutomi gakwe, khwatsi hilezi nzi nga nyikela Zedekia a hosi ya ka Juda mandleni ya Nebukadrezzare a hosi ya le Babuloni a nala wakwe, loyi a nga hlota wutomi gakwe.