Read tshwa Jeremia 46 Bible Online

Jeremia 46 - tshwa bible

Jeremia 46

¹A mhaka ya Jehova leyi yi ngata ka muprofeti Jeremia xungetano ni matiko.

²Xungetano ni Gipite, hi yimpi ya Faro-Neko a hosi ya Gipite, leyi yi nga hi kusuhani ni congo wa Eufrate le Karkemixe, leyi Nebukadrezzare a hosi ya le Babuloni a nga yi hlula hi lembe ga wumune ga kufuma ka Jehoiakimu a nʼwana Josia, hosi ya ka Juda. [195]

³Longisani a tingenge ni zitlhangu, Muya kulweni.

⁴Gabhatselani mahaxi, mu khilela nwina vakhileli; Yimani na mu bohile tindlondla ta nwina; Kutlani matlhari, mu ambala zikatawu za xiketse.

⁵Hikuyini nzi va wonako na va rurumela, va tlhelela nzhako? A tinhenha tabye ti hluliwa, Ti tsutsuma ti nga cuwuki nzhako; Matlhelo wontihe ku kona kuchava, ku wula Jehova.

⁶A va mazambu va nga tsutsumi, ni tinhenha ti nga poni; Va retemukile vawa le Nwalungu a congweni wa Eufrate. [196]

⁷Himani loyi a kukumako ku fanana ni Nilo, Loyi a mati yakwe ma khulungako kukotisa micongo?

⁸Hi Gipite gi kukumukako ku fanana ni Nilo, A mati yakwe ma khulunga khwatsi micongo. Aku: Nzi ta kukumuka, nzi fenengeta misava; Nzi lovisa a miti ni vaaki va yona.

⁹Dlaladlalekani nwina mahaxi, Nwina tikareta tsutsumani mazambu! A tinhenha a ti range mahlweni: Kuxe na Pute lava va welelako zitlhangu, Na Ludima lava va kondlako mawura.

¹⁰Hakuva i siku ga Hosi, Jehova wa tiyimpi, A siku ga ku photela, a ti photela valala vakwe. A supado yi taga yi xura, yi tlhela yi popiwa hi nkhata wabye. Hakuva Hosi Jehova wa tiyimpi i na ni muphahlelo tikweni ga le Nwalungu Le congweni wa Eufrate.

¹¹Kanziha uya Gileade u ya teka muri, Wena nhwana, nʼwana wa Gipite! U tirisa a miri yo tala mahala, A ku na kuchumiwa.

¹²A matiko ma zwile hi tingana ta wena, A misava yi tele hi tihuwa ta wena, A nhenha yinwe yi khunguvanyiswa hi yinwani, Tiwa zinwe hi wumbiri ga tona.

¹³A mhaka leyi Jehova a nga yi wula ka muprofeti Jeremia, xungetano ni lezi Nebukadrezzare a hosi ya le Babuloni a ta nga tisa zona a ta hlasela a tiko ga Gipite.

¹⁴Tiyisani le Gipite, mu zi tlhatlhambutela le Migdole, Mu tlhatlhambutela le Nofe ni le Tahpanhesi, Muku: Yima u ti longisela, Hakuva a supado yi gile lava va ku ranzelekeleko.

¹⁵Hikuyini a tinhenha ta wena ti wadamiswako ke? A ti na nga yima, hakuva Jehova i ti papaxile.

¹⁶I khunguvanyisile vanyingi, Vawa, munwe hehla ka munwani; Vaku: A hi vukeni hi tlhelela tikweni ga hina, A tikweni ga hina ga maheleko, Hi tsutsuma a supado yi dayako.

¹⁷Laho vaba huwa, vaku: Faro a hosi ya Gipite i file, I hunzelwe hi xikhati xakwe.

¹⁸Nza hlambanya hi kuhanya ka mina, ku wula Hosi, Leyi yi tibyako Jehova wa tiyimpi, Hizinene wata, na a fanana ni Tabor xikari ka zitsunga, Aku khwatsi hi Karmeli hi laha bimbini.

¹⁹Wena nhwana u tshamako Gipite, Ti longisele a kuya wukhumbini, Hakuva Nofe i ta hahlulwa, I ta hiswa a vumala muaki.

²⁰Gipite i thokazi go saseka nguvu, Kanilezi a bhawani gata hi le Nwalungu.

²¹A masochwa yakwe lomu tikweni gakwe Me khwatsi marole ma nonileko; Hakuva vonawu va tlhela nzhako va tsutsuma zinwe, A va yimangi; Hakuva a siku gabye ga makhombo ga va tela, A xikhati xa kutsayiswa kabye.

²²A gezu ga Gipite gi khwatsi hi gezu ga nyoka; Hakuva vata ni yimpi, Va mu tela ni zihloka khwatsi vatsemi va tisinya.

²³Va hlahla a khwati gakwe, ku wula Jehova, Hakuva ga khwela; Va tele ku hunza humbi, mba tsanza-vahlayi,

²⁴A nhwana wa Gipite i ta wiswa tingana, I ta nyikelwa mandleni ya vanhu va le Nwalungu.

²⁵Jehova wa tiyimpi, a Nungungulu wa Israeli, i ngalo: Nzi taba Amoni na No, na Faro na Gipite ni vanungungulu vakwe, ni tihosi takwe, yena Faro ni lava va tsumbako yena. [197]

²⁶Nzi ta va nyikela mandleni ya lava va hlotako a wutomi gabye, ni mandleni ya Nebukadrezzare a hosi ya Babuloni, ni mandleni ya malanza yakwe. Kanilezi anzhako ka lezo Gipite gi ta akiwa ku fanana ni kaleloko, ku wula Jehova.

²⁷Kanilezi u nga chavi, wena Jakobe, nanza ga mina, U nga dzukiswi wena Israeli; Hakuva nzi ta ku humesa tikweni ga le kule, Ni vana va wena tikweni ga wukhumbi gabye. Jakobe i ta wuya, a ta tshameka khwatsi, Ku nga tava kona wo mu chavisa.

²⁸U nga chavi wena Jakobe, nanza ga mina, ku wula Jehova; Hakuva nzi zinwe na wena. Hakuva nzi ta mbhetisa wontihe a matiko Lawa nzi ku hangalasileko ka wona, Kanilezi wena nzi nga ta ku mbhetisa; Nzi ta ku laya hi nongameto, A nzi zi koti ku ku tsika na u nga biwangi.