Read tshwa Jeremia 48 Bible Online

Jeremia 48 - tshwa bible

Jeremia 48

¹Xungetano na Moabi, Jehova wa tiyimpi, a Nungungulu wa Israeli, i ngalo: Khombo ka Nebo, hakuva i hahlulwe; Kiriataime i wile tingana, i hlulilwe; Misgaba i wile tingana, i khungumulwe.

²A wudumo ga Moabi a ga ha hi kona; Le Hexboni va mu bohele xikungo, vaku: Tanani, hi ta mu lovisa kasi a ngavi tiko. Na wena Madmeni u ta dawa, A supado yi ta ku lanzela.

³A tihuwa ti zwakala le Horona-ime, Kuhahlulwa ni kulobyiswa ka hombe.

⁴Moabi i lobyisilwe, Ka zwala a tihuwa ta vanana vakwe.

⁵Va kanziha Luhite na va kari va rila, Ni laha nzhelelweni wa Horona-ime ka zwala kurila hi kota ya kuhahlulwa.

⁶Tsutsumani, mu ti ponisa, Mu ku khwatsi mu xihlahla xo woma lomu xiwuleni.

⁷Hakuva kota lezi u tsumbako a mitiro ya wena, Ni titshomba ta wena, wenawu u ta hluliwa. Kemoxe i taya wukhumbini Zinwe ni vapristi vakwe ni tihosana takwe. [200]

⁸A muhlaseli i ta enghena mitini yontlhe, Ni munwe wu nga ta pona. A nkova wu ta lova, ni livala li onhiwa, Khwatsi hilezi Jehova a wulileko.

⁹Mu heni tipapa Moabi, Lezaku a puruma a suka. A miti yakwe yi tava marumbi, Yi nga hi na muaki.

¹⁰I rukatelwe loyi a nga ni mihoni ntirweni wa Jehova, I rukatelwe loyi a alisako a supado yakwe a nkhata.

¹¹Moabi i tshamile kuruleni kusukela wusweni gakwe, I tshamile hehla ka zisese zakwe, A nga chululiwangi ka xibya ni xibya, Ge hambu ku yiswa wukhumbini. Hikwalaho a kunanziha kakwe wa ha hi nako, Ni masema yakwe a ma hunzukangi.

¹²Hikwalaho, a masiku mata, Ku wula Jehova, Lawa nzi ta nga mu rumela ha wona a vahalati, Lava va ta nga mu byeketa; Va ta halata a tifuko takwe, Va faya a miphata yakwe.

¹³Moabi i tazwa tingana ha Kemoxe, Khwatsi hi yindlu ya ka Israeli yi ngazwa tingana ha Beteli, Loyi a nga hi kutsumba kabye.

¹⁴Mu wutisa kuyini muku: Hina hi tinhenha, Hi tinghwazi ta yimpi?

¹⁵Moabi i hahlulwe, a miti yakwe yi tuvika a musi, A majaha yakwe ma hlawulekako ma chikile maya kudaweni, Ku wula Hosi leyi a vito ga yona a nga Jehova wa tiyimpi.

¹⁶A khombo ga Moabi gi laha kusuhani, A hlokiselelo wakwe wuta hi xihatla.

¹⁷Mu rileni nwina lava mu mu ranzeleko, Nwina lava mu tivako a vito gakwe; Muku: Yi tshovekisile kuyini a nhonga leʼya ntamu, A nhonga yo saseka?

¹⁸Wena nhwana u tshamako Diboni, Chika wukosini ga wena, u tshama toreni; Hakuva a muhlaseli wa Moabi i ku chikelele, I khungumule a makhokhola ya wena.

¹⁹Wena muaki wa Aroera, yima laha ndleleni u languta; U wutisa loyi a tsutsumako ni loyi a ponako, Uku: Xini xi mahekileko?

²⁰Moabi i chelilwe tingana, haku va i tshobyilwe. Rilani, muba huwa. Tiyisani Amoni lezaku Moabi i mahile marumbi.

²¹A kulamula ku tile le tikweni ga livala; ku tile le Holoni, ni le Jaza, ni le Mefaate;

²²ni le Diboni, ni le Nebo, ni le Bet-Diblataime;

²³ni le Kiriataime, ni le Bet-gamula, ni le Bet-meoni;

²⁴ni le Keriote, ni le Bozra, ni lomu mitini yontlhe ya tiko ga Moabi, ya le kule ni ya kusuhani.

²⁵A limhonzo la Moabi li tsenwilwe, a woko gakwe gi tshobyilwe, ku wula Jehova.

²⁶Mu popiseni, hakuva i ti kulisile mahlweni ka Jehova. Moabi i ta puluwunza mahlateni yakwe, A maha xihlekiso na yenawu.

²⁷Israeli a ku mu mahangi xihlekiso ke? I lo kumiwa wukambeni lezi u ninginizako hloko Loku u wulawula ha yena?

²⁸Nwina vaaki lomu Moabi, Humani mitini mu ya aka maribyeni; Mu kotisa matuva ma akako zisaka laha nonwini wa khovo-khovo.

²⁹Hi zwile hi matshanza ya Moabi laʼya hombe, A kutikulisa kakwe ni matshanza yakwe, Ni manyanga ya mbilu yakwe.

³⁰Nza tiva a khulo gakwe, ku wula Jehova, Lezaku a hi ga nchumu. A kutikulisa kakwe a ku tirangi nchumu.

³¹Hikwalaho nzi ta mu rilela Moabi, Nzi rilela tiko gontlhe ga Moabi. Ku ta rilelwa a vanhu vontlhe va le Kir-heresi.

³²Nzi ta ku rilela ku hunza a xirilo xa Jazeri, Wena vina ga Sibma. A maravi ya wena ma tlhatukile bimbi, Kala ma ya chikela bimbini ga Jazeri. A muhlaseli i wele mihanzweni ya wena ya ximumu Ni le zivineni za wena.

³³A kutsaka ni kunengela zi susilwe lomu masinwini, Ni le tikweni ga Moabi. Nzi mbhetisile a vinya lomu maphisweni; A nga hi kona a to gi kamela hi tisimu, A kuyimbelela ku tava tihuwa.

³⁴A huwa ya le Hexboni yi zwala kala le Eleale, Yi zwakala yi chikela ni le Jahazi, Kusukela Zoari kala le Horona-ime ni le Eglat-xelixiya; Na wona mati ya le Nimrimu ma tapshwa.

³⁵Tlhatakumbiri, ku wula Jehova, Lomu Moabi nzi ta lovisa ni wihi a phahlelako matshanwini ma tlakukileko, Ni loyi a hiseleko vanungungulu vakwe a tibani.

³⁶Hikwalaho a mbilu ya mina ya vuma kota nanga hi kota ya Moabi, ni vanhu va le Kir-heresi. Hakuva lezi va nga zi hlengeletele zi lahlekile.

³⁷Hakuva a tihloko tontlhe ti halulwe, ni malevu wontihe ma cingilwe; a mawoko wontihe ma cekelelwe, na va ambele tisakwa ziwunwini.

³⁸Ku na ni xirilo hehla ka tontlhe tiyindlu ta Moabi ni lomu maruweni wontihe; hakuva nzi panzile Moabi kukotisa a xibya xi nga vuniko, ku wula Jehova. [201]

³⁹Lezi a nga tshobyiswazona! A mahela yakwe tihuwa! Lezi Moabi a nga fularelisa zona hi tingana! Zinghaho Moabi i tava xihlekiso a tlhela a dzukisa lava va mu ranzeleko.

⁴⁰Hakuva Jehova i ngalo: Munwe i ta puruma ku fana ni gama, a gwimbela Moabi a tipapa takwe.

⁴¹Keriote i hlulilwe, a makhokhola ma enghenilwe, ni timbilu ta tinhenha ta Moabi hi siku lego ti ta fanana ni mbilu ya wasati loyi a lunwako.

⁴²Moabi i ta lobyiswa, a nga havi tiko, hakuva i ti kulisile mahlweni ka Jehova.

⁴³A hlenekera, ni rinzi, ni ziyo zi rinzele wena muaki wa Moabi, ku wula Jehova.

⁴⁴Loyi a tsutsumako hi kota ya hlenekera i ta wela rinzini; loyi a humako rinzini i ta phasiwa ziyweni. Hakuva Moabi nzi ta mu nehela a lembe ga kutsayiswa, ku wula Jehova.

⁴⁵Lava va tsutsumileko va karele, va zumba nzhutini wa Hexboni; Hakuva a nzilo wu humile le Hexboni, Ni langavi gi humile xikari ka Sihoni, Wu hisile a gwitsi ga Moabi, Ni tihloko ta vana va madzolonga. [202]

⁴⁶Khombo ka wena Moabi! A tiko ga Kemoxe gi lovile; Hakuva a vafana ni vanhanyana va wena va yisilwe kukhonweni.

⁴⁷Hambu lezo, nzi ta tlhelisela Moabi a vakhonwilweko vakwe masikwini ya kugumesa, ku wula Jehova. Loko hi kona a kulamulwa ka Moabi.