Read tshwa Jeremia 50 Bible Online

Jeremia 50 - tshwa bible

Jeremia 50

¹A gezu legi Jehova a nga gi wula ha Babuloni ni tiko ga maKaldea hi nomu wa muprofeti Jeremia.

²Tlhatlhambutelani xikari ka matiko, muba nyiwo, mu yimisa a bandera. Mu nga fihli nchumu, va byeleni, muku: Babuloni i hlulilwe, Beli i wisilwe tingana, Merodake i khungumulwe; a zifananiso zakwe zi chelilwe tingana, a vanungungulu vakwe va khungumulwe.

³Hakuva hi le Nwalungu wata a mufumo lowu wu ta nga hahlula a tiko gakwe, laha kakuva ku ngavi na munhu wo tshama ka gona; a vanhu ni zifuyo zi sukile, zi tsutsumile.

⁴A masikwini ya xikhati lexo, ku wula Jehova, a vana va ka Israeli ni va ka Juda ya tata zinwe; na va rila va ta famba va hlota Jehova Nungungulu wabye.

⁵Va ta wutisa ha Zioni, a tinghohe tabye na ti cuwuka kona, vaku: Tanani mu ta boha zinwe na Jehova a xivumelwano xa pinzukelwa lexi xi to kala xi nga rivaliwi.

⁶A vanhu va mina va wa hi tiyivu leti ti lahlekileko. Va hambukisilwe hi varisi vabye, va va tsika lomu zitsungeni. Va pepetsekile lomu zitsungeni vaya migangeni, va kohlwa hi ranga gabye.

⁷Vontlhe lava va nga kumana na vona, va wo va khadamula. A valala vabye vaku: A hi na nanzu, hakuva va onhele Jehova, a wutshamu ga nongameto, a nga Jehova loyi a nga kutsumba ka vadadani vabye.

⁸Humani Babuloni mu tsutsuma, mu suka lomu tikweni ga maKaldea, muku khwatsi mu timhongo leti ti rangelako mitlhambi.

⁹Hakuva nzi ta vuxela Babuloni a tsombano wa matiko ya hombe ya tlhelo ga Nwalungu. Va ta hloma va mu vukela, va mu hlula. A tigalala tabye ti ta fanana ni ta nhenha ji tlharihileko, leyi yi nga tlheliko mahala.

¹⁰Kaldea i ta phangiwa, a vaphangi vakwe vontlhe va ta xura, ku wula Jehova.

¹¹Ina, hambu loku mu tsaka mu bhuma makunu, nwina vaonhi va tshomba ya mina, hambu loku mu khana ku fana ni role gi kanzihelako tirigo, mu yimba kukotisa a mahaxi ya ntamu,

¹²a mamani wa nwina i ta wiswa tingana, yena loyi a mu belekileko i ta kanganyiswa. I tava wo gumesa ka matiko wontihe, a maha xiwula, a tiko ga xikhwakhwa, ni zisapa.

¹³Hi kota ya zanga ya Jehova gi nga ta akiwa hi munhu, gi tava marumbi gontlhe. Ni wihi loyi a ta nga hunza hi le Babuloni, i ta rewuka, aba noti hi kota ya makhombo yakwe wontihe.

¹⁴Hlomani mu vukela Babuloni matlhelo wontihe, nwina nwentlhe mu kondlako mawura; mu fuleni, mu nga siyi ni ligalala linwe; hakuva i onhele Jehova.

¹⁵Kanyulukani, mu mu ranzela matlhelo wontihe. I tlakusile mawoko; a makhokhola yakwe ma wile, a makhurisi yakwe ma khungumukile! Loko hi ku ti photela ka Jehova! ti photeleni kakwe; lezi a nga maha ka nwina, mahaniwo zalezo kakwe.

¹⁶Hihiritani a varimi va le Babuloni, ni lava va khomako a sikela xikhatini xa kuhula. Hi kota ya ku chava a supado leyi yi dayako a munwe ni munwani a tlhelele ka va ka kabye, a tsutsumela tikweni gakwe.

¹⁷Israeli i yivu leyi yi lahlekileko, leyi yi hlongolisilweko hi tinghala. A ku ranga i lo giwa hi hosi ya le Assiria, ku gamela Nebukadrezzare a hosi ya le Babuloni i lo kutsa a marambu yakwe. [207]

¹⁸Hikwalaho Jehova wa tiyimpi, a Nungungulu wa Israeli i ngalo: Nzi ta tsayisa a hosi ya le Babuloni ni tiko ga yona, khwatsi hilezi nzi nga tsayisisa zona a hosi ya le Assiria.

¹⁹Nzi ta tlhelisa Israeli a wuya wuriselweni gakwe, i ta gela lomu Karmeli ni lomu Baxani, i ta xura lomu zitsungeni za Efraime ni Gileade. [208]

²⁰A masikwini ya xikhati lexo, ku wula Jehova, a kugoha ka Israeli ku ta labyiwa, kanilezi ku nga ha ta kuva kona; ni zionho za ka Juda zi nga ta kumiwa, hakuva nzi ta rivalela lava nzi ta nga va siya kota misalela.

²¹Kanziha uya tikweni ga Merata-ime, ulwa nago, u hlasela ni vaaki va le Pekode. Va daye, u va riza vaku bhi, ku Wula Jehova, u maha zontlhe lezi nzi ku leleteleko.

²²A guwa ga kulwa gi zwala tikweni, ga kulobyiswa ka hombe.

²³A hamela leyi yi ngaba tiko gontlhe yi tshovekisile kuyini! Babuloni i hahlulisilwe kuyini xikari ka matiko!

²⁴Nzi ku dembele ziyo, u phasilwe wena Babuloni na u nga zi tivi. U kumilwe ni ku khomiwa, hakuva u lwile na Jehova.

²⁵Jehova i vulule a mabako yakwe, a humesa a matlhari ya zanga yakwe, hakuva Hosi Jehova wa tiyimpi i na ni ntiro wo mahiwa lomu tikweni ga maKaldea.

²⁶Tanani, mu mu vukela matlhelweni wontihe, mu phanga a zihlangala zakwe. Mu vingereteleni aku khwatsi tinhulu, mu mu lovisa aku bhi, mu nga siyi nchumu.

²⁷Tlhavani tontlhe a tikuzi takwe, a tiye wuxinjelweni. Khombo ka vona, hakuva a siku gabye gi chikele, a xikhati xa kutsayiswa kabye.

²⁸A gezu ga lava va ponako tikweni ga Babuloni ga zwakala le Zioni, gi tlhatlhambutela, a ku ti photela ka Jehova, a Nungungulu wa hina, loyi a photelako a tempeli yakwe.

²⁹Vitaneni vontlhe a vaweleli va mawura va ta vukela Babuloni, mu goveleni matlhelo wontihe, ku nga poni ni munwe. Mu tlheliseleni hi mitiro yakwe; zontlhe lezi a nga wa zi maha, mahaniwo zalezo kakwe, hakuva i wa ti kulisa mahlweni ka Jehova, a vukela Loyi a Basileko wa ka Israeli.

³⁰Hikwalaho a majaha yakwe ma tawa maruweni yakwe, ni vanhu vakwe vontlhe va yimpi va ta mbhetwa hi siku lego, ku wula Jehova.

³¹Languta, nzi yimekelene na wena, nyamatshanza-nziwena, ku wula Hosi Jehova wa tiyimpi, hakuva a siku ga wena gi chikele, a xikhati xa kutsayiswa ka wena.

³²A wamatshanza i ta ti gumula awa, a nga kona a to mu vuxa. Nzi ta dzivela nzilo mitini yakwe, wu hisa zontlhe lezi zi mu ranzeleko.

³³Jehova wa tiyimpi i ngalo: A vana va ka Israeli ni vana va ka Juda va hlokiswa zinwe; vontlhe laya va nga va yisa wukhumbini va va khoma hi ntamu, a va vumeli ku va tlhatlha.

³⁴Kanilezi a mutiruli wabye ngwa ntamu, loyi a vito gakwe a nga Jehova wa tiyimpi. Hizinene i ta va yimela mhakeni yabye, kasi a vanga kurula laha misaveni, a vindlukisa a vaaki va le Babuloni.

³⁵A supado a yive hehla ka maKaldea, ku wula Jehova, ni le hehla ka vaaki va le Babuloni, ni hehla ka tihosana takwe, ni hehla ka titlhari takwe.

³⁶A supado a yive hehla ka lava va profetako mawunwa, va ta hunguka. A supado a yive hehla ka tinhenha takwe, kasi va tsemeka-hlana.

³⁷A supado a yive hehla ka mahaxi yakwe ni tikareta takwe, ni hehla ka valuveli vontlhe lava va nga xikari kakwe, kasi va tlhela vaku khwatsi mba vavasati. A supado a yive hehla ka titshomba takwe, lezaku ti phangiwa.

³⁸A ximumu xi ta balela hehla ka mati yakwe, kasi ma fela kupswha, hakuva gona i tiko ga zifananiso zi vatlilweko, vona va ti tsitsiritile ka zona.

³⁹Hikwalaho a mahlolwa ma ta tshama lomo zinwe ni zivanza za xiwula, ni timbuwu ti ta tshama lomo. Gi nga ta ha akiwa kambe kala kupinzuka, ku ta hunza zizukulwana ni zizukulwana na ku nga tshami munhu kona. [209]

⁴⁰Khwatsi hi xikhati lexi Nungungulu a nga lovisa Sodoma ni Gomora ni miti ya lomu kusuhani, ku wula Jehova, zinghaho a nga kona ni munwe a ta nga aka lomo, ge hambu a nʼwana wa munhu a ku luvela kona.

⁴¹Languta, a vanhu va tako hi le Nwalungu, a tiko ga hombe ni tihosi to tala ti ta vuka hi le magemetamusi ya misava.

⁴²Va ta welela mawura ni matlhari; va na ni lunya, a va na tipswalo. A guwa gabye gi khwatsi ga bimbi, va khilele mahaxi, na va hlomile a kulwa na wena nhwana wa Babuloni.

⁴³A hosi ya le Babuloni yi zwile hi wudumo gabye, hikwalaho a mawoko yakwe ma mbhela ntamu. Yi telwe hi hlenekera ni kubayisa ko kota wasati a lunwako.

⁴⁴Languta, i tata kota nghala yi humako hi lomu xihlahleni xa Jordani, yiya wugelweni go nyuka. Nzi ta mu hlongola xikanwe; ni wihi loyi nzi mu hlawulako, nzi ta mu yimisa hehla ka gona. Hakuva himani a kotako mina? Himani a ta nga nzi yimisela xikhati ke? Himani murisi a ta nga tiya mahlweni ka mina ke?

⁴⁵Hikwalaho zwanani a makungo ya Jehova, lawa a bohileko ha Edome, ni mixuvo yakwe leyi a xuvileko hi vaaki va le Babuloni. Futsi va ta rorovisela lava va tsongwani va thlambi; ni wugelo gabye gi ta onhiwa zinwe navo.

⁴⁶A misava ya rurumela hi guwa ga kuhlulwa ka Babuloni, ni nkosi wa zwala matikweni wontihe.