Read tshwa Jeremia 51 Bible Online

Jeremia 51 - tshwa bible

Jeremia 51

¹Jehova i ngalo: Nzi ta vuxela Babuloni ni vaaki va lomu Leb-kamai a mheho yi lovisako.

²Nzi ta rumela a vamatiko le Babuloni, lava va ta nga mu hehera, va maha tiko gakwe gi sala gi hi phanga; hakuva hi siku ga khombo va ta gi vukela matlhelo wontihe.

³A muweleli wa wura a vukela loyi a kondlako wura kona ni loyi a tsumbako a xikatawu xakwe xa xiketse; mu nga hawukeli ni ginwe ga majaha yakwe. Rizani yiku bhi yontlhe yimpi yakwe.

⁴Vanhu va tawa na va file tikweni ga maKaldea ni lava va tlhabyilweko lomu maruweni ya kona.

⁵Hakuva Israeli na Juda a va tsikiwangi hi Nungungulu wabye, a nga Jehova wa tiyimpi, hambu lezo a tiko gabye gi goheleko Loyi wa ku Basa wa ka Israeli.

⁶Humani Babuloni mu tsutsuma, a munwe ni munwani a ponise wutomi gakwe, kasi mu nga lobyiswi hi kota ya xigoho xakwe; hakuva hi xona a xikhati xa kuphota ka Jehova, i ta muha a nchachazelo wakwe. [210]

⁷Babuloni i wa hi gombe ga nzalama canjeni ga Jehova, legi gi nga popisa matiko wontihe. A matiko ma nwile; a vinya gakwe, hikwalaho a matiko ma hungukile.

⁸Babuloni i wile hi xitshuketi a lobyiswa. Mu: rileleni, mu mu nehela a muri wa kubayiseka kakwe, kutani i ta hanya. [211]

⁹Hi ringile ku chuma Babuloni, kanilezi a nga banyangi. A hi mu tsikeni, hi ti fambela munwe ni munwani aya tikweni ga ka kabye, hakuva a kutsayiswa kakwe ku chikele le tilweni, ku tlakukile ku chikela le marefini.

¹⁰Jehova i yimele a mhaka ya hina. Tanani hi ta bikela Zioni a ntiro wa Jehova a Nungungulu wa hina.

¹¹Lotani a tigalala, mu khoma a zitlhangu. Jehova i vindlusile a moya wa tihosi ta vaMedi, hakuva a mixuvo yakwe njo vukela Babuloni a kuva a lobyiswa. Hakuva hi kona a kuphota ka Jehova, a photelako a tempeli yakwe.

¹²Yimiselani a makhurisi ya Babuloni a bandera, tiyisani varinzeli, mu veka varinzeli ni ku longisa a zijumani; hakuva Jehova i mahile xikungo, a tira lezi a nga zi wula hi vaaki va le Babuloni.

¹³Wena loyi u akileko lomu micongweni yo tala, u na nga ni titshomba tinyingi, a kugumelwa ka wena ku chikele, a wukamba ga wena gi mbhelile. [212]

¹⁴Jehova wa tiyimpi i hlambanyile hi wutsumbu gakwe, aku: Hizinene nzi ta ku tata hi vanhu, va tatela go khwa zidodwani; va ta ku bela huwa.

¹⁵I vangile misava hi ntamu wakwe, A seketela tiko hi wutivi gakwe, Hi kupima kakwe i tshambulutile tilo.

¹⁶Loku a tlakusa gezu gakwe A mati ma dzuma le matilweni, A maha marefu mata hi le magunweni ya misava. I rumela zingwalangwanza zinwe ni vula, Ni ku humesa mheho hi lomu mabakweni yakwe.

¹⁷Loku va zi wona a vanhu va yima vaku kaye, va nga pimi nchumu; Ni vafuli va nzalama va wisiwa tingana hi zifananiso zabye zi vatlilweko, Hakuva a zifananiso zabye mawunwa, a zi na muhefemulo.

¹⁸Zona a zi nyawuli, mitiro ya wukhohlisi; A xikhatini xa kutsayiswa ka zona zi ta lova.

¹⁹Loyi a nga xiavelo xa ka Jakobe a nga fanani na zona; Hakuva hi yena muvangi wa zilo zontlhe; Israeli lixaka la tshomba yakwe, Jehova wa tiyimpi hi vito gakwe.

²⁰Wena u wa hi xizeze xa mina ni matlhari ya mina ya kulwa; Nzi lo panza matiko ha wena, Ha wena nzi lo lovisa mifumo.

²¹Ha wena nzi lo panza a haxi ni mukhileli wa gona; Ha wena nzi lo panza a kareta ni mukhileli wa yona;

²²Ha wena nzi lo panza wanuna ni wasati; Ha wena nzi lo panza a xikhosana ni xinwanana; Ha wena nzi lo panza a jaha ni nhwana;

²³Ha wena nzi lo panza a murisi ni ntlhambi wakwe; Ha wena nzi lo panza a murimi ni tinkavi takwe; Ha wena nzi lo panza a vafumeli ni tinduna.

²⁴Nzi ta tlhelisela Babuloni ni vaaki vontlhe vo le Kaldea a kubiha kabye kontlhe loku va ku mahileko le Zioni a kuwoneni ka nwina, ku wula Jehova.

²⁵Languta, nza ku vukela wena xitsunga xi lovisako, ku wula Jehova, wena loyi u lovisako misava yontlhe. Nzi ta nawuluta a canja ga mina hehla ka wena, nzi ku wumbuluta le ribyeni uwa lahasi, nzi ku maha a xitsunga xi hisilweko,

²⁶lezaku ku nga tekiwi ka wena a ribye ga magumo, hambu a ribye go aka ha gona a ziseketelo; kanilezi u tava marumbi kala kupinzuka, ku wula Jehova.

²⁷Yimisani a bandera lomu tikweni, muba mpunzu xikari ka matiko; hlomisani a matiko ma mu vukela, tsombanyisani a mifumo ya Ararate, Minni, Axkenaze, mu yimisa a tinduna ta yimpi kulwa naye; mahani mahaxi ma kanziha ma mu talela kukotisa humbi.

²⁸Hlomisani matiko ni tihosi ta maMedi ni vamwamangulu va kona, a tinduna ta kona ni tiko gontlhe ga mufumo wakwe.

²⁹A misava ya rurumela, yi le kubayisekeni; hakuva a makungo ya Jehova ya ku hahlula a tiko ga Babuloni, gi ngavi na vaaki, ma maheka.

³⁰A tinhenha ta Babuloni ti tsikile a kulwa, ti tshamile lomu makhokholeni ya tona; ti mbhelelwe hi ntamu, va tlhela vaku khwatsi mbavasati. A miti yakwe ya hisiwa hi nzilo, a zikwinyaro zakwe zi tshobyilwe.

³¹A tsukano munwe wu ta tsutsuma wu tlhangaveta munwani, ni ntsumi munwe wu ta tlhangaveta munwani, na va ya byela a hosi ya le Babuloni lezaku a muti wakwe wu engheniwile matlhelo wontihe.

³²A mapelo ma tekilwe, va hisile a hlanga hi nzilo, ni vavanuna va yimpi va chava.

³³Hakuva Jehova wa tiyimpi, a Nungungulu wa Israeli, i ngalo: A nhwana wa Babuloni e khwatsi wuhulelo, a xikhatini va gi kanzihelelako; anzhako ka xikhatana a kutshovela ku ta chikela ka yena.

³⁴Nebukadrezzare a hosi ya le Babuloni i hi gile, i hi rizile; i hi mahile a zibya za maphanga, i hi mitile khwatsi i dragoni, i tatile khwiri gakwe hi malongo ya hina, i hi hlongole.

³⁵A muaki wa le Zioni i taku ngalo: A hlokiselelo lowu nzi mahelweko wona mirini wa mina a wuve hehla ka Babuloni; na Jerusalema i taku: A nkhata wa mina a wuve hehla ka vaaki va le Kaldea.

³⁶Hikwalaho Jehova! ngalo: Nzi ta ku yimela, nzi ku photela; Nzi ta maha bimbi gakwe gipswha, Nzi pswhisa ni hlowo yakwe.

³⁷Babuloni i tava tinhulu ta maribye, A wutshamu ga mahlolwa; Ava xirewukiso ni xihlekiso, A nga hi na muaki.

³⁸Va ta dzuma khatiginwe khwatsi tinghala, Va ngura khwatsi zinghalana.

³⁹Loku va kufumele nzi ta va mahela mubuzo; Nzi ta va popisa kasi va fela ku tsaka, Va etlela wurongo gi nga mbheliko, Va nga ha vuki, ku wula Jehova.

⁴⁰Nzi ta va yisa kutlhabyiweni ku kotisa tiyivana, Vaku khwatsi tihamba zinwe ni timhongo.

⁴¹Xexake i khomisilwe kuyini! I hlulisilwe kuyini loyi a nga hi wudumo ga yontlhe misava! Babuloni i mahisile kuyini marumbi xikari ka matiko!

⁴²A bimbi gi talele Babuloni, I khubhunyetilwe hi madla-mbyati ya gona yo tala.

⁴³A miti yakwe yi mahilwe marumbi, A tiko ga xikhwakhwa ni xiwula; A tiko gi nga hiko na munhu, Hambu a nʼwana wa munhu a hunzako ha kona.

⁴⁴Nzi ta tsayisa Beli le Babuloni, Nzi humesa nonwini wakwe zo ntlhe lezi a zi mitileko. A matiko ma nga ta ha hlengeletana ka yena kambe; Ina, a khurisi ga Babuloni gi ta khungumuka.

⁴⁵Vanhu vanga, humani ka wona, mu ti ponisa munwe ni munwani a zangeni yo tshisa ya Jehova.

⁴⁶Ngha timbilu ta nwina ti nga rereki, hambu ku chava a mahungu lawa ma zwalako lomu tikweni; hakuva a mahungu ma ta zwala lembe ginwe, ni lembe gi gamelako ku ta zwala mahungu manwani, ni pfilupfilu lomu tikweni, a hosi yi vukela yinwani hosi.

⁴⁷Hikwalaho mata a masiku lawa nzi ta nga tsayisa ha wona a zifananiso za Babuloni, a tiko gakwe gontlhe gi ta chelwa tingana, ni vontlhe vanhu vakwe va delweko va ta wela xikari kakwe.

⁴⁸Zonake a tilo ni misava, ni zontlhe zi nga ka zona, zi ta yimbelela hi kutsaka ha Babuloni, hakuva a vahlaseli va tata kakwe hi le Nwalungu, ku wula Jehova. [213]

⁴⁹Khwatsi hilezi Babuloni a wisileko a vatlhabyilweko va ka Israeli, hilezo a vanhu va tlhabyilweko va tiko ga Babuloni va tawa.

⁵⁰Nwina lava mu ponileko a supado, tsutsumani mu nga yimi; alakanyani Jehova na mu hi kule, mu alakanya Jerusalema timbilwini ta nwina.

⁵¹Hazwa tingana hakuva hi zwile a nzhukano, a tinghohe ta hina ti fenengetilwe hi kukanganyiseka, hakuva a vamatiko va enghenile matshanwini ya kubasa ndlwini ya Jehova.

⁵²Hikwalaho, a masiku mata, ku wula Jehova, lawa nzi ta nga tsayisa ha wona a zifananiso zakwe, kala lava va tlhabyilweko va ta keta lomu tikweni gakwe gontlhe.

⁵³Hambu loku Babuloni a nga tlakukela tilweni, hambu loku a tiyisa a khokhola gakwe gi tlakukileko, nzi ta mu rumela vahlaseli, ku wula Jehova.

⁵⁴Hi ngazwa a tihuwa ta Babuloni, ni kulobyiswa ka hombe le tikweni ga maKaldea!

⁵⁵Hakuva Jehova wa hahlula Babuloni, a mbhetisa a guwa gi nga lomu ka gona. A mabyandlati ya gona ma dzinza khwatsi i mati ya hombe, a guwa ga wona ga zwakala.

⁵⁶Hakuva a muhlaseli i tele yena Babuloni, a tinhenha takwe ti khomilwe, a mawura ya tona ma tshoveletelwe; hakuva Jehova i Nungungulu atlheliselako, futsi i ta phota.

⁵⁷Nzi ta popisa a tihosana ni titlhari takwe, a vamwamangulu ni tinduna takwe, ni tinhenha takwe. Va ta etlela wurongo gi nga mbheliko, va nga vuki kambe, ku wula Hosi, loyi a nga Jehova wa tiyimpi a vito gakwe.

⁵⁸Jehova wa tiyimpi i ngalo: A makhurisi laʼyo anama ya Babuloni ma ta khungumulwa, a tinyangwa takwe ti tlakukileko ti ta hiswa hi nzilo; a matiko ma tirela mahala, ni vamatiko va ti karata hi kota ya lezi zi hiswako hi nzilo, va rereka. [214]

⁵⁹A mhaka leyi muprofeti Jeremia a nga yi leletela ka Seraia a nʼwana Neria wa Maaseya, a xikhati lexi a nga famba na Zedekia a hosi ya ka Juda le Babuloni, hi lembe ga wumune ga kufuma kakwe. Seraia i wa hi nduna ya varinzeli va wugovelo.

⁶⁰Jeremia i lo tsala lomu bhukwini hi makhombo wontihe ma ta nga wela Babuloni, ti nga timhaka tontlhe leti ti xungetako Babuloni.

⁶¹Jeremia i te ngalo ka Seraia: Loku u chikela le Babuloni, u ta gonza tontlhe timhaka leti.

⁶²Uku; Jehova u wulawulile lezaku u ta lovisa a wutshamu legi, lezaku ku nga tshami ni xilo xinwe ka gona, hambu vanhu kutani zifuyo, giva xiwula kala kupinzuka.

⁶³Loku u mbhetile ku gonza bhuku legi, gi bohelele a ribye u gi hoxa lomu congweni wa Eufrate.

⁶⁴Zonake uku: Hi lezi a ta nga rikhisa zona Babuloni; a nga ha vuxiwi kambe hi kota ya makhombo lawa nzi ta nga mu nehela wona; va ta rereka. Lawa hi wona magumo ya timhaka ta Jeremia.