Read tshwa Jeremia 7 Bible Online

Jeremia 7 - tshwa bible

Jeremia 7

¹A mhaka ya Jehova yi ngata ka Jeremia, yiku:

²Yima lomu nyangweni ya yindlu ya Jehova, na uba hungu laho hi mhaka leyi, uku: Zwanani a mhaka ya Jehova, nwina nwentlhe va ka Juda mu enghenako hi tinyangwa leti a ku ta khozela Jehova.

³Jehova wa tiyimpi, a Nungungulu wa Israeli, i ngalo: Chukhwatisani a mahanyela ya nwina ni mitiro ya nwina, zonake nzi ta mu vumela ku simamisa mu aka ka wutshamu legi.

⁴Mu nga tsumbi timhaka ta mawunwa, taku: Tempeli ya Jehova, tempeli ya Jehova, a tempeli ya Jehova hi yaleyi!

⁵Hakuva loku mu chukhwatisa a mahanyela ya nwina ni mitiro ya nwina, loku mu lamula hi kululama xikari ka munhu ni muakelwani wakwe,

⁶loku mu nga xanisi a muluveli, a xisiwana ni noni, loku mu nga halati a nkhata wa va nga hiko na nanzu ka legi wutshamu, hambu ni ku lanzela vanwani vanungungulu, muva ni makhombo hi kota ya vona; [46]

⁷zonake nzi ta maha nwina mu aka ka wutshamu legi, a tikweni nzi nyikileko a vararu va nwina kala kupinzuka.

⁸Kanilezi nwina mu tsumba a timhaka ta mawunwa ti nga mu vuniko nchumu.

⁹Xana ma ha ta yiva, mu daya, mu bhaya, mu hlambanya mawunwa, mu hisa miphahlo yo nuhela ka Baali, ni ku lanzela vanwani vanungungulu lavo mu nga va tiviko?

¹⁰Zonake mu ta yima; mahlweni ka mina a ndlwini leyi, yi vitanwako hi vito ga mina, muku: Hina hi ponile! na kasi ma ha engeta mu maha wontihe manyala lawo.

¹¹Xana a yindlu leyi yi vitanwako hi vito ga mina, yi mahile a bako ga vaphangi a mahlweni ka nwina ke? Kunene, na minawo nzi zi wonile, ku wula Jehova. [47]

¹²Fambani makunu a wutshanwini ga mina gi nga hi le Xilo, laho gi nga zumbile kona a vito ga mina kusanguleni, mu ya wona lezi nzi gi mahileko zona hi kota ya kubiha ka vanhu va mina va ka Israeli. [48]

¹³Makunu na mu mahile a zimaho lezi zontlhe, ku wula Jehova, nzi wulile a ka nwina na ga hi mixo, nzi mu byela, kanilezi a mu ingisangi; nzi lo mu vitana kanilezi a mu hlamulangi.

¹⁴Hikwalaho nzi ta maha ka leyi yindlu yi vitwako hi vito ga mina, yaloyi mu yi tsumbako, ni ka wutshamu legi nzi gi nyikileko ka nwina ni ka vararu va nwina, kotisa lezi nzi mahileko ka Xilo. [49]

¹⁵Nzi ta mu hlongola mahlweni ka mina, kota lezi nzi sinako nzi hlongole a vamakabye vontlhe va nwina, a lixaka lontlhe la ka Efraime. [50]

¹⁶Hikwalaho u nga va kombeleli lava vanhu, u nga dzuki u tlakusa gezu ha vona hi mikombelo, u nga nzi kombeli nchumu, hakuva nzi nga ta ku ingisa.

¹⁷Xana a ku woni lezi va zi mahako lomu mitini ya ka Juda ke? ni lomu maruweni ya Jerusalema?

¹⁸A vanana va wungeletela tihunyi, a vararu va dzivela nzilo, ni vavasati va vuva mapa, kasi ku maha zikhekhetselo ka muzinza wa tilo; na va nyikela minyikelo ya zakunwa a ka vanwani vanungungulu, kasi ku nzi vuxela zanga.

¹⁹Kasi hi mina va nzi zangarisako ke? ku wula Jehova. A va ti vuxeli wutsumbu gabye a tingana ke?

²⁰Hikwalaho Hosi Jehova i ngalo: Nzi ta chulula a zanga ya mina ni khulo ga mina wutshanwini legi, a hehla ka vanhu ni hehla ka zihari, ni hehla ka tisinya ta khwati ni mihanzu ya misava; zi ta vura zi nga kotekiku timiwa.

²¹Jehova wa tiyimpi, a Nungungulu wa Israeli i ngalo: Patsani a minyikelo ya nwina ya kuhiswa ni miphahlo ya nwina,: muga nyama ya zona.

²²Hakuva a nzi byelangi a vararu va nwina, hambu a ku va laya hi tlhelo ga minyikelo ya kuhiswa ni miphahlo, a ka siku lego nzi nga va humesa tikweni ga Gipite. [51]

²³Kanilezi lezi nzi va layileko hi lezaku: Ingisani a gezu ga mina, zonake nzi tava Nungungulu wa nwina, nwina mu tava vanhu va mina; fambani hi tindlela leti nzi mu layileko ha tona, lezo mu ta tshameka khwatsi. [52]

²⁴Kanilezi a va ingisangi, hambu ku riya tindleve; kanilezi va lo famba lomu makungweni yabye ni lomu ka kunonoha ka timbilu tabye ta kubiha, va lo tlhelela nzhako, a va yangi mahlweni.

²⁵A kusukela a siku legi a vararu va nwina va nga suka le tikweni ga Gipite kala lezi a siku ni siku na ga hi mixo nzi rumele ka nwina a malanza ya mina wontihe, va nga vaprofeti. [53]

²⁶Kanilezi a va ingisangi, hambu ku riya tindleve; va lo nonohisa a tinhamu tabye, va maha kubiha ku hunza ni vararu vabye.

²⁷Hikwalaho u ta va byela tontlhe timhaka leti, kanilezi va nga ta kuzwa; u ta va vitana, va nga ku hlamuli.

²⁸Zonake wena u ta wula kabye, uku: Legi i tiko gi nga ingisiko a gezu ga Jehova a Nungungulu wabye, hambu ku amukela a ziluleko. A kutsumbeka ku hava, ku susilwe a milonwini yabye.

²⁹Halula a misisi ya hloko ya wena, u yi cukunyeta, o Jerusalema, u ya maha nkosi le zitsungeni, hakuva Jehova i alile ni ku tsika a xizukulwana lexi xi vuxileko a zanga yakwe.

³⁰Hakuva a vanana va ka Juda va mahile kubiha a mahlweni ka mina, ku wula Jehova; va enghenisile a manyalataniso yabye lomu ndlwini yi vitanwako hi vito ga mina, va yi nyenyezisa.

³¹A matshamu ma tlakukileko ya Tofeti va ma akile lomu nkoveni wa nʼwana wa Hinome, kasi ku hisela kona a vafana ni vanhanyana vabye hi nzilo; lezo cima na nga layangiko, ne ni ku zi alakanya. [54]

³²A masiku ma tata, ku wula Jehova, a ka wahi cima ku nga ta ha vitanwa Tofeti, hambu a nkova wa nʼwana wa Hinome, kanilezi ku ta vitanwa aku i Nkova wa ku hihirita; hakuva ku ta lahlelwa laho Tofeti, hi ku vumala wutshamu ginwani.

³³A zirumbi za lava vanhu zi ta giwa hi tinyanyani ta tilo ni zihari za khwati; a nga kona a to zi hlongola.

³⁴A mitini ya ka Juda ni lomu maruweni ya Jerusalema nzi ta miyeta a gezu ga kutsaka ni kuhlakana, a gezu ga muteki ni mutekiwa; hakuva a tiko gi ta maha rumbi. [55]