Read tshwa Jeremia 8 Bible Online

Jeremia 8 - tshwa bible

Jeremia 8

¹A ka lexo xikhati, ku wula Jehova, a marambu ya tihosi ni tihosana ta ka Juda, ni marambu ya vapristi ni marambu ya vaprofeti, ni marambu ya vaaki va le Jerusalema, ma ta vevulwa lomu minkeleni yabye;

²ma ta hangalaswa mahlweni ka gambo ni hweti, ni mahlweni ka butho gontlhe ga tilo, lezi va nga zi ranza ni ku zi tirela, ni lezi va nga zi lanzela, va zi wutisa ni ku zi khizamela; ma nga ta ha hlengeletiwa, hambu ku kelelwa; ma ta maha koho misaveni. [56]

³Ni lava va seleko ka lixaka lolu li bihileko va ta ranza kufa ku hunza a kuhanya, a matshanwini wontihe lawa nzi va hlongoleko ka wona, ku wula Jehova wa tiyimpi.

⁴Kambe u ta va byela, uku; Jehova i ngalo: Xana a munhu a ngawa a nga tlheli a vuka ke? A nga hambuka, a nga tlheli a wuya ke?

⁵Hikuyini lava vanhu va Jerusalema va hluwuka hi kusimamisilweko ke? Va tiyile kukhohlakaleni, va ala ku wuya.

⁶Nzi riyile ndleve, nzi ingisa, Kanilezi a va wuli zinene; A nga kona a hunzulukako kubiheni kakwe, Aku: Xini nzi xi mahileko? Vontlhe va tsutsuma kota mahaxi ma hatliselako kulweni,

⁷Hambu a gotomeni wa le mpfhukeni wa tiva tinguva takwe, A tuva ni nyawukolwe ni mbewulwani za tiva a xikhati xa ku tlhela ha xona; Kanilezi a vanhu va mina a va tivi a milayo ya Jehova.

⁸Hikuyini mu nge ngalo: Hina hi tlharihile, Hi na ni nayo wa Jehova? Languta a pena ya mawunwa ya vatsali Yi hembile wunwa yi goha nayo.

⁹A titlhari tite koyo tingana, Ta rurumela ni ku khomiwa. Ti kanetile a mhaka ya Jehova, Mbutivi muni ti nga nago ke? [57]

¹⁰Hikwalaho nzi ta nyikela a vasati vabye ka vanwani, Ni masimu yabye ka lava va ta nga ma wutla. Hakuva vontlhe va ti nyiketile kunaveleni, Kusukela ka ntsongwani kala ka wahombe. A vaprofeti ni vapristi vontlhelele va kanganyisa.

¹¹A va cheli kota ku chuma a mbanga ya nhwana wa vanhu va mina, Vaku: Ku rulile, ku rulile, kasi a ku na kurula.

¹²Va wa hi ni tingana hilezi va nga tirile manyala ke? A va na tingana, hambu ku pima lezaku xini ku wiswa tingana! Hikwalaho va tawa zinwe ni lava va wako: A xikhatini xa kutsayiswa kabye va ta khunguvanyeka, ku wula Jehova.

¹³Nzi ta va lovisa bhi, ku wula Jehova. A ku na mauva sinyeni ya vina, Hambu a makuwu nkuweni, Na wona matluka ma womile. Lezi nzi va nyikileko zi ta pswonyoka kabye. [58]

¹⁴Hikuyini ha ha tshamako laha ke? Tsombanani, hi ya enghena mitini ya makhokhola, Hi yafa kona; Hakuva Jehova a Nungungulu wa hina I lava ku hi lobyisa, Wa hi nwisa wutsulu, hakuva hi onhele Jehova.

¹⁵Hi wa lavelele kurula, kanilezi a ku tangi kusasa, Hi lavelele a xikhati xo chumiwa, kasi kuchava ku kona!

¹⁶A guwa ga mahaxi yakwe gi zwala le Dani; A tiko gontlhe gi rurumela hi kota ya kuyimba ka wona; Hakuva va tile va hetisa tiko ni zontlhe zi nga ka goha, A muti ni vontlhe va tshamako ka wona.

¹⁷Hakuva nzi ta rumela a tinyoka ni maphiri xikari ka nwina, Lezi zi nga hiko na ku fumbiwa, Zona zi ta mu luma, ku wula Jehova.

¹⁸Nzi ta ti chavelelisa kuyini a kubayisekeni ke? A mbilu ya mina ya xaniseka.

¹⁹Hi ngazwa a gezu ga xirilo ga nʼwana wa xisati wa vanhu va mina, Legi gi humako tikweni ga le kule, giku: Kasi Jehova a nga kona le Zioni ke? Xana a Hosi yakwe a yi kona kakwe ke? Hikuyini va vindlukisileko a zanga ya mina hi zifananiso zabye, Ni vanungungulu va vamatiko ke? [59]

²⁰A kutshovela ku hunzile, a ximumu xi gumelwe, Na hina a hi hanyiswangi!

²¹Nzi karateka hi kota ya mbanga ya nʼwana wa xisati wa vanhu va mina, Nzi na ni hlomulo, nzi khomilwe hi kuchava.

²²Xana a ku na muri le Gileadi, Ku hava nʼanga leyo ke? A mbanga ya nʼwana wa xisati wa vanhu va mina a yi holiswangi hikuyini ke?