Read tshwa Mikosi 1 Bible Online

Mikosi 1 - tshwa bible

Mikosi 1

¹Hikuyini wu nga ni xiwunza a muti lowu wu nga tele hi vanhu! Loyi a nga hi wahombe xikari ka mifumo i mahile noni; Loyi a nga hi muzinza xikari ka matiko i mahile hlonga hikuyini?

²Wa rila ni wusiku, a mihloti yakwe yi xilila marameni yakwe; Xikari ka ziranzwa zakwe zontlhe a ku na munwe a nga mu tangalisako. A vanghana vakwe vontlhe va mu tsikile, va hunzukile va maha valala vakwe.

³Juda i yile matikweni hi kota ya kuxaniseka ni wunanza ga hombe; I tshama xikari ka vamatiko, a nga kumi kurula; A vaxanisi vakwe vontlhe va mu khamanyetile kubayisekeni kakwe.

⁴A magonzo ma yako Zioni ma rila, hakuva a nga kona a tako hlengeletanweni wa ximuse; A ku na vanhu tinyangweni takwe, a vapristi vakwe va hefemuteka. A vanhwana vakwe va xaniseka, yena wutsumbu i na ni xiviti.

⁵A vavengi vakwe va buma, ni valala vakwe va vuvuma; Hakuva Jehova i mu rumile makhombo hi kota ya kutala ka zigoho zakwe. A zivanana zakwe zi yile wukhumbini, na zi guliwa hi nala.

⁶A nhanyana wa Zioni i lahlekelwe hi wumbhuri gakwe gontlhe; A tihosana takwe ti khwatsi timhuti ti nga hiko na wugelo, Leti ti tsutsumako mahlweni ka muhlongoli na ti nga hi na ntamu.

⁷Masikwini ya hlomulo ni kuxaniseka Jerusalema wa alakanya A makatekwa yakwe wontihe ya kale ka matiko; Laha a vanhu vakwe va weleko canjeni ga nala, na ku nga hi na muvuni, A valala va mu hleka, va mu tseketsela kuhahlukeni kakwe.

⁸Jerusalema i onhile nguvu, hi kwalaho i mahile manyalataniso; Wa kanyiswa hi vontlhe lava va nga mu dzunza loku va wona wumbyiri gakwe. Ina, wa hefemuteka, a tlhelela nzhako.

⁹A minzhungo ya tinguwo takwe yi wa hi ni chaka, a nga alakanyangi a magumo yakwe; A kuwa kakwe ka rewukisa, a nga na mutangalisi. Jehova, cuwuka a hlokiselelo wa mina, hakuva a nala wa ti kulisa.

¹⁰A nala i wutlile a makatekwa yakwe wontlhe, I wonile vamatiko na va, enghena wutshanwini gakwe ga kubasa. Lava u va aleleko a ku enghena hlengeletanweni wa wena. [1]

¹¹A vanhu vakwe vontlhe va keta, va lava zakuga; Va humesile titshomba tabye kasi va xava zakuga, kasi ku vuxa wutomi gabye. Jehova, hi nga nzi wona, nzi mahile munhu wo nyenyeza.

¹²Xana a mu cheli kota ha zona, nwina vahunzi ke? A ha nga cuwukani, mu wona loku ku hi kona kuxaniseka kunwani ko ringana ni loku ku nzi weleko, Loku Jehova a nga nzi hlokisa ha kona hi siku ga khulo gakwe.

¹³I rumele a nzilo hi le hehla wuta marambyini ya mina, ma lobyiswa hi wona; I dembele mikonzo ya mina a ziyo, a nzi tlhelisela nzhako; I nzi nyikele kuonhekeni, nzi rereka siku gontlhe.

¹⁴A muyoka wa zihambunyeto za mina wu bohilwe hi canja gakwe, Zi bohene khatiginwe nhanwini ya mina, a mbheta ntamu wa mina. A Hosi yi nzi nyikele mandleni ya lava nzi nga zi kotiko kulwa navo.

¹⁵A Hosi a yi khatalelangi a tinhenha ta mina tontlhe, I rambile a yimpi a ku ta hlasela a majaha ya mina. A Hosi yi kanzihelele a nhanyana wa ka Juda khwatsi hi loku yi vuva vinya.

¹⁶Hi lezi zi nzi rilisako, mahlo ya mina ma halaka mihloti; Hakuva a muchaveleli loyi a nga te ngha a vuxa moya wa mina i le kule. A vana va mina va le kuxanisekeni hakuva a nala i hlulile.

¹⁷Zioni i nawulutile a mawoko yakwe, a nga kona a mu chavelelako; Jehova i leletela a valala va Jakobe lezaku va mu renzelekela xikari; Jerusalema i hunzukile manyalataniso ka vona.

¹⁸Jehova i lulamile, kanilezi nzi alile a zileletelo zakwe. Zwanani nwina nwentlhe matiko, mu wona a kuxaniseka ka mina! A vanhwana va mina ni majaha ya mina va yisilwe wukhumbini.

¹⁹Nzi vitanile a vanghana va mina, kanilezi va nzi kanganyisile; A vapristi va mina ni masingalakati ya mina va lovile le mutini, Na va kari va lava vakuga lezi zi nga hanyisako wutomi gabye.

²⁰Jehova, languta a hlomulo wa mina, a moya wa mina wa karateka, A mbilu ya mina yi hunzukile nzeni ka mina, hakuva nzi ti alisile; Le handle a supado yi nzi dayela a vana va mina, te kaya kufa ntsena. [2]

²¹Va zwile lezaku nzi hefumuteka, kanilezi a nga kona ni munwe a nzi chavelelako; A valala va mina vontlhe va zwile hi khombo ga mina, va tsakela lezi u zi mahileko; Va ta fanana na mina loku ku chikele a siku legi u nga kanela ha gona.

²²A kubiha kabye kontlhe a kute mahlweni ka wena, U maha kabye kota lezi u mahileko ka mina hi kota ya zihambunyeto za mina zontlhe; Hakuva nzi hefemuteka nguvu, ni mbilu ya mina yi na ni gome.