Read tshwa Mikosi 2 Bible Online

Mikosi 2 - tshwa bible

Mikosi 2

¹Hosi yi khubhunyetisile kuyini a nhanyana wa Zioni hi refuga zanga ya yona! A wudzunzo ga Israeli yi gi reletile hi le hehla, a gi wisa misaveni, A sikwini ga zanga yakwe a nga hlayisangi a xikhegetelo xa mikonzo yakwe. [3]

²A Hosi yi hahlula yontlhe a miti ya ka Jakobe, na a nga hi na kutsetsa. Hi zanga yakwe i khungumule a makhokhola ya nhanyana wa ka Juda, I ma wisile lahasi, a onha a mufumo ni tihosi ta kona.

³I tshovile a ntamu wontlhe wa Israeli hi zanga yakwe ya hombe, A khanyeta woko gakwe ga xinene mahlweni ka valala; A vura xikari ka Jakobe khwatsi i langavi ga nzilo lowu wu lovisako kontlhe.

⁴I kondlile a wura gakwe kukotisa a nala, a nawuluta canja gakwe ga xinene khwatsi hi nhenha, A lovisa zontlhe lezi zi nga tsakisa mahlo. Lomu tendeni ga nhanyana wa Zioni i chulule a zanga yakwe khwatsi i nzilo.

⁵A Hosi yi hunzukile yi maha nala, yi khadamule Israeli; Yi hahlule a tiyindlu takwe tontlhe ta wuhosi, yi khungumulela a makhokhola yakwe wontlhe; Xikari ka nhwana wa Juda yi anzisile a hlomulo ni mikosi.

⁶I hahlule a tabemakeli gakwe aku khwatsi gi wova simu; a fuvisa a wutshamu gakwe ga tihlengeletano. Jehova i mahile a va le Zioni va rivala a mitlhangano ya zimuse ni tisabado, Hi kota ya zanga yakwe a nyenya a tihosi ni vapristi.

⁷A Hosi yi tsikile a alati ga yona, yi swireka hi wutshamu gakwe ga kubasa; A makhurisi ya ziluvelo zakwe i ma nyikele mandleni ya nala; Va tlakusile magezu yabye lomu ndlwini ya Jehova khwatsi hi siku ga tlhangano wa ximuse.

⁸Jehova i xuvile ku khungumula a khurisi ga nhanyana wa Zioni; I tshambulutile a lingoti, a nga khanyetangi woko gakwe a tsika ku gi onha; Kanilezi i mahile a ligingisi ni khurisi ziba nkosi, zi onhekile khatiginwe. [4]

⁹A tinyangwa takwe ti wile lahasi, a tshoveletela zikwinyaro za kona; A hosi ni tihosana ta kona ti lomu matikweni, a ka ha hi na nayo; A vaprofeti vakwe a va ha kumi miwoniso hi ka Jehova.

¹⁰A masingalakati ya nhanyana wa Zioni ma tshamile lahasi, ma ti miyelela; Va ti cheletele khuma tihlokweni tabye, va ambele a tinguwo ta xirilo. A vanhwana va Jerusalema vazwa tingana, vo zi lahasi.

¹¹A mahlo ya mina ma mbhela hi mihloti, a mbilu ya mina ya karateka, A nyongwa ya mina ya halakela lahasi hi kota ya mbanga ya nhanyana wa tiko ga mina; Hakuva a zihlangana ni tisana za titivala lomu maruweni ya muti.

¹²Ve ngalo ka vanyine vabye: Zi kwihi a zakuga ni vinya? Va maha lezo na va titivala lomu maruweni ya muti khwatsi hi lava va tlhabyilweko, Na va kari va nyiketa mihefemulo yabye zifuveni za vanyine vabye.

¹³Nzi ta ku kustumunyela yini? nzi ta ku fananisa ni yini, wena nhwana wa Jerusalema? Nzi ta ku ringanisa ni yini, wena nhwana wa Zioni, kasi nza ku chavelela? Hakuva a mole wa wena ngwa hombe ku fana ni bimbi, himani a nga zi kotako ku ku chuma?

¹⁴A vaprofeti va wena va ku wonele a miwoniso yi nga nyawuliko ni ya wupumbu, A va tsetsulangi a zigoho za wena, kasi u pona u ngayi wukhumbini; Kanilezi va ku profetele zahava, lezi zi nga ku hambukisa.

¹⁵A vahunzi vontlhe va ku bela mandla yabye, Vaba miloti na va ninginizela tihloko tabye a nhanyana wa Jerusalema, vaku: Hi wona a muti wu nga vitanwa ku i mbhuri wu mbheleleko, a kutsaka ka misava yontlhe ke? [5]

¹⁶A valala va wena vontlhe va ku ahlamele a milomu yabye, Vaba miloti na va getsela meno, vaku: Hi mu mitile! Hi gona a siku legi hi nga wa gi langutele, hi gi kumile, hi gi wonile.

¹⁷Jehova i mahile lezi a zi xuvileko, I tatisile a mhaka yakwe leyi a nga yi leletela kaleloko; I khungumule, na a nga hi na kutsetsa; I tsakisile lava va ku vengako; a tlakusa a limhonzo la valala ya wena. [6]

¹⁸A timbilu tabye ti rilile ka Hosi: Khurisi ga nhanyana wa Zioni, a wusiku ni mumu a mihloti ngha yi khulunga ku fana ni congo; U nga dzuki u humula, a tihlo ga wena gi nga tsiki ku rila.

¹⁹Vuka, uba huwa ni wusiku, kusanguleni ka xikhati xa kurinzela; Chulula a mbilu ya wena ku fana ni mati mahlweni ka nghohe ya Hosi; Mu tlakusele a mandla ya wena hi kota ya wutomi ga vana va wena, Lava va fako hi ndlala laha magunweni ya maruwa wontlhe.

²⁰Jehova, languta loyi u mu maheleko a zakunghahi! A vavasati va taga a mbhanzu wabye, a vanana lava va va wukareleko mawokweni yabye ke? A vapristi ni vaprofeti va nga dawa lomu wutshanwini ga kubasa ga Hosi ke? [7]

²¹A vanana ni zikhosana va wile lahasi lomu maruweni, A vanhwana va mina ni majaha ya mina va delwe hi supado. U va dele hi siku ga zanga ya wena; u va hihiritile u nga va tsetsi.

²²U nzi rambele kuchavisa matlhelo wontlhe, khwatsi hi siku ga mutlhangano wa ximuse; A nga kona ni munwe wo pona, a nga sala hi siku ga zanga ya Jehova. Lava nzi nga va wukarela, nzi va wundla, a nala wa mina i va lovisile.