Read tshwa Mikosi 4 Bible Online

Mikosi 4 - tshwa bible

Mikosi 4

¹Yi hunzulukisile kuyini a nzalama yi nga hatimako? A nzalama leyi yi ringilweko yi hunzulukisile kuyini? A maribye ya wutshamu ga kubasa ma hangalasilwe mahanzakanyeni wontlhe ya maruwa.

²A vana va zikududu va le Zioni va fananako ni nzalama yi hlutilweko, Hikuyini va hlayiwako kota maguwana ya wumba, wu nga ntiro wa mandla ya muwumbi?

³Hambu ni mahlolwa ma humesa mavele, ma anwisa a vanana va wona; Kanilezi a nhanyana wa tiko ga mina i na ni lunya khwatsi timbuwu ta lomu xiwuleni.

⁴A lirimi la xihlangana li namarele malakalakeni hi kota ya tora; A zisumbi zi kombela zakuga, kanilezi a nga kona ni munwe a zi phamelako.

⁵Lava va nga hanya hi malongo, vafa lomu maruweni, Lava va nga wundliwa hi tinguwo ta lisima, va ti khumbareta lomu mataleni.

⁶Hakuva a xionho xa nhanyana wa tiko ga mina xa hombe ku hunza xionho xa Sodoma, Loyi a nga lobyiswa hi xitshuketi, na a nga tlhatekiwangi mandla ya munhu.

⁷A vahombe vakwe va wa basile ku hunza gapongo, va hi vo basa ku hunza masi, A mimiri yabye yi wa pswhukile ku hunza makoral, a hlonge yabye yi wa ku khwatsi i safira.

⁸Makunu a tinghohe tabye ta ntima ku hunza khala, a va tibyiwi lomu maphangweni; A hlonge yabye yi namarele marambyini yabye, yi womile yi woma ku fanana ni lihunyi.

⁹Lava va nga dawa hi supado i chukwana ku hunza lava va fako hi ndlala. Hakuva va jomoloka hi ku vumala zakuga za lomu masinwini.

¹⁰Hambu ni vavasati va wuxinji va bhikile a vavana va vona venyi, Kasi va maha zakuga zebye xikhatini xa kulobyiswa ka nhanyana wa tiko ga mina. [14]

¹¹Jehova i mbhetisile a khulo gakwe, i chulule a zanga yakwe yo tshisa; I dzivele a nzilo le Zioni, lowu wu hisileko a ziseketelo za gona.

¹²A tihosi ni vaaki vontlhe va mi sava a va kholwangi Lezaku a valala ni vavengi va ta zi kota ku enghena tinyangweni ta Jerusalema.

¹³Zi mahekile hi kota ya zionho za vaprofeti ni zigoho za vapristi, Lava va nga halata a nkhata wa valulamileko xikari ka gona. [15]

¹⁴Va pepetseka lomu maruweni khwatsi zikhumu, va nyenyezisile hi nkhata, Laha kaku a vanhu a va zi koti ku khumba a tinguwo tabye.

¹⁵Sukani! ku wa wuliwa kabye. A mu hlazekangi! Sukani, sukani, mu nga va khumbi! Ina, va tsutsumile, va pepetseka; A vamatiko vaku ha vona: Ngha va nga kumi wuakelo! [16]

¹⁶A nghohe ya Jehova yi va hangalasile, a nga ha va khataleli; Va wa nga hi na xichavo ka vapristi, a va zwelangi wuxinji a zikhosana.

¹⁷A mahlo ya hina ma rerekela mahala hi ku cuwukela ku kutani hi ta kuma kuvuniwa, Kurinzeleni ka hina hi rinzele a tiko legi gi nga zi kotiko ku hi hanyisa.

¹⁸Va xiya kufamba ka hina, lezaku hi nga dzuki hi fambafamba maruweni ya hina. A kugumelwa ka hin, ku tshinele, a masiku ya hina ma mbhelile, hakuva a kugumelwa ka hina ku chikele.

¹⁹A vahlongolisi va hina va wa hatlisa ku hunza magama ya le tilweni. Va wa hi hlongolisa zitsungeni, va hi juma lomu xiwuleni.

²⁰Loyi a totilweko hi Jehova, loyi a nga hi kuhefemula ka hina, i phasilwe marinzini yabye; Loyi hi nga wula ha yena hiku: Hi ta hanyela nzhutini wakwe xikari ka matiko. [17]

²¹Tsaka u nengela, wena nhwana wa Edome, loyi u akileko tikweni ga Uzi; Wenawu u ta hiwa a gombe, u ta popiwa, u tirunzuwulela tinguwo u sala ximbyiri.

²²A tsayiso wa zigoho za wena wu hetekile, wena nhwana wa Zioni; A nga ta ha ku yisa wukhumbini. Wena nhwana wa Edome, a kugoha ka wena ku ta tsayisiwa; Jehova i ta vumbulula a zionho za wena.