Read tshwa Ezekieli 1 Bible Online

Ezekieli 1 - tshwa bible

Ezekieli 1

¹Hi lembe ga 30, hi siku ga wuntlhanu ga hweti ya wumune, khwatsi hilezi nzi nga hi xikari ka lava va nga hi wukhumbini, le congweni wa Kebare, a matilo ma lo vululeka, nzi wona a miwoniso ya ka Nungungulu.

²Hi siku ga wuntlhanu ga hweti, a ka lembe ga wuntlhanu ga wukhumbi ga hosi Jehoiakinu,

³a gezu ga Jehova gi lota ka mupristi Ezekieli, nʼwana Buzi, lomu tikweni ga maKaldea, laha congweni wa Kebare; ni canja ga Jehova gi wa hi hehla ka yena.

⁴Nzi lo cuwuka nzi wona a mheho ya xipupuri na yita hi Nwalungu, ni refu ga hombe gi nga hi ni nzilo wa hombe wu nga woninga matlhelo wontihe, ku huma hi lomu xikari ka wona a kungangamela ko fanana ni ka suku.

⁵Ku lo huma xikari ka wona a zilo zo fanana ni mune wa zivangwa zi hanyako, na zi hi ni xiwumbeko xa vanhu. [1]

⁶A xinwe ni xinwani xi wa hi ni mune wa tinghohe, ni xinwe ni xinwani xi wa hi ni mune wa tipapa.

⁷A milenge ya zona yi wa lulamile, ni mikonzo ya zona yi wa fanana ni zinyonzwani za role, na zi kwezima ku fanana ni suku wu kutlilweko.

⁸Zi wa hi ni mawoko yo fanana ni ya munhu lahasi ka tipapa ta zona matlhelweni ya zona ya mune; hi wumune ga zona zi wa hi ni tinghohe ta zona ni tipapa ta zona kotisa lezo:

⁹a tipapa ta zona ti wa tlhangana a linwe ka linwani, ni loku zi famba zi wa nga hunzuluki, zontlhelele zi wa famba zi lulama mahlweni.

¹⁰A xinwe ni xinwani xi wa hi ni nghohe ya munhu, ni nghohe ya nghala hi tlhelo ga xinene, ni nghohe ya homu hi tlhelo ga xibhabha, ni nghohe ya gama kambe.

¹¹A tinghohe ta zona ni tipapa ta zona ti wa tsawukene le hehla; a xinwe ni xinwani xi wa hi ni tipapa timbiri ti tlhangeneko, ni tipapa timbiri leti ti nga khubunyeta a mimiri ya zona.

¹²Zona zontlhe zi lo komama mahlweni loku zi famba; laho a moya wu nga zi yisa zi wa famba; kufambeni ka zona zi wa nga hunzuluki.

¹³A zivangwa zi hanyako zi wa woneka kota a makhala ma vurako, ni kuwoninga ka minwenge; a nzilo na wu fambafamba xikari ka zivangwa zi hanyako; a nzilo lowu wu wa kwezima ni lomu nzilweni ku huma tihlahle.

¹⁴A zivangwa zi hanyako zi lo tsutsuma, na zi tlhela zi wuya a ku fanana ni kukwezima ka xingwalangwanza.

¹⁵Khwatsi hilezi nzi nga cuwuka a zivangwa lezo, nzi lo wona a ranzani na gi yimile misaveni kusuhi na zona, a ginwe ka nghohe yinwe ni yinwani ya zona.

¹⁶A tshamela ga maranzani lawo ni xiwumbeko xa wona, ma wa hi ku khwatsi hi krisolite. Ma wa fanana hi wumune ga wona, na ma wonekisa ku khwatsi hi loku a ranzani ginwe gi mehelwe xikari ka ginwani.

¹⁷Loku ma famba ma wa famba hi matlhelo ya wona ya mune, ma wa nga hunzuluki kufambeni ka wona.

¹⁸A maranzaveti ya wona ma wa tlakukile, ma hi yo tshisa; hi wumune ga wona a maranzaveti ma wa pomelwe hi mahlo matlhelweni wontihe.

¹⁹Laha a zivangwa zi nga wa famba, a maranzani na wonawu ma wa famba mareveni ya zona; laha a zivangwa zi nga wa ti tlakusa hehla, a maranzani ma wa ti tlakusawu.

²⁰Ni kwihi laha a moya wu nga zi fambisa, zi wa famba; ni maranzani ma wa ti tlakusa na wonawu a reveni ga zona; hakuva a moya wa zivangwa wu wa hi ka maranzani.

²¹Laha a zivangwa zi nga famba, na wona maranzani ma lo famba; laha zi nga yima, wonawu ma lo yima; laha zi nga wa ti tlakusa hehla ka misava, wonawu ma lo ti tlakusa a mareveni ya zona, hakuva a moya wa zivangwa wu wa hi lomu ka maranzani.

²²Le hehla ka tihloko ta zivangwa ku wa hi ni xo fanana ni mpfuka wa tilo, wu nga hi ni muvala kukotisa kristali yo hatima nguvu, wu andlelweko hehla ka tihloko ta zona.

²³A tipapa ta zona ti wa tshambulutile lahasi ka mpfuka, a tipapa ta xinwe ni xinwani ti gumulana. A xinwe ni xinwani xi wa hi ni tipapa timbiri ti nga fenengeta a miri wa xona.

²⁴Laha zi nga wa famba nzi lozwa a guwa ga tipapa ta zona, gi fanana ni guwa ga mati ya hombe, kukotisa a gezu ga Nyamintamu, a huwa ya yimpi. Loku zi yima zi wa dzeleta a tipapa ta zona lahasi.

²⁵Ku lo zwakala a gezu hehla ka mpfuka lowu wu nga hehla ka tihloko ta zona; loku zi yima zi wa dzeleta a tipapa ta zona lahasi.

²⁶Le hehla ka mpfuka wu nga hi hehla ka tihloko ta zona, ku wa hi ni xo fanana ni xitshamu xa wuhosi xi nga ku khwatsi hi ribye ga safira; ni hehla ka lexi xi nga fanana ni xitshamu xa wuhosi ku wa hi ni xe fanana ni munhu. [2]

²⁷Nzi lo wona xo fanana ni kungangamela ka suku, ku woneka ku khwatsi i nzilo lomu xikari kusukela xiwunwini xakwe kuya hehla; ni kusukela xiwunwini xakwe kuya hasi nzi lo wona xilo xo fanana ni nzilo, na ku hi ni kuvangamela matlhelowontihe.

²⁸A kuvangamela matlhelweni wontihe ku wa fanana ni kungangamela ka wura ga nyazimu, legi gi wonekako refini hi siku ga vula. Zi wa wonekisa lezo leʼzi nga fanana ni kungamela ka Jehova. Laha nzi nga zi wona nzi lowa hi nghohe ya mina, na nzi kari nzizwa a gezu ga munwe loyi a wulawulako.