Read tshwa Ezekieli 18 Bible Online

Ezekieli 18 - tshwa bible

Ezekieli 18

¹A gezu ga Jehova gi lota ka mina kambe, giku:

²Hiyini mu wulako a vingu legi ha Israeli, muku: A vadadani va gile a mauva laʼmambisi, a meno ya vanana ma na ni wureremeti?

³Nza hlambanya hi kuhanya ka mina, ku wula Hosi Jehova, mu nga ta ha gi wula kambe lomu ka Israeli.

⁴Langutani, yontlhe mihefemulo nja mina; kota lezi a muhefemulo wa dadani wu nga wa mina, ni wa nʼwana kambe ngwa mina. A muhefemulo lowu wu onhako wu tafa. [49]

⁵Kanilezi loku munhu a lulamile, a maha lezi zi nga za nayo ni nongameto,

⁶a nga geli le hehla ka zitsunga, ge hambu ku tlakusa a mahlo yakwe a cuwuka a zifananiso za yindlu ya ka Israeli, leyi a nga wisangiko tingana a sati wa muakelane wakwe, ge hambu ku tlhangana ni wasati loyi a nga xikhatini xo tsawuka;

⁷loyi a nga onhelangiko munhu, loyi a tlhelisileko a seve wa loyi a nga hi ni nanzu, loyi a nga wutliko nchumu, loyi a phamelako loyi a nga ni ndlala, a hanzulela loyi a nga ni wuna; [50]

⁸loyi a nga pembisiko hi ku bhinzula, loyi a canja gakwe gi nga enghenangiko kubiheni, a lamulako xikari ka vanhu hi nongameto;

⁹loyi a hlayisako milayo ya mina, a lanzela zileletelo za mina, a tsumbeka, yaloye i basile, hizinene i ta hanya, ku wula Hosi Jehova.

¹⁰Loku a pswala a mufana wa muphangi, a muhalati wa nkhata, kutani munwe a mahako zinwani za zontlhe lezi,

¹¹loyi a nga fambiko hi tindlela ta raru wakwe, kanilezi a gela lomu zitsungeni, a wisa tingana a sati wa muakelane wakwe,

¹²a onhela a nyakeke ni muvumali, a phanga, loyi a, nga tlhelisangiko a seye, loyi a tlakusileko mahlo yakwe a cuwuka zifananiso, loyi a mahileko manyala,

¹³loyi a pembisileko hi ku bhinzula; a nʼwana loyi i ta hanya ke? A nga ta hanya. I tafa futsi, hakuva i mahile wontihe lawa manyalataniso, a nkhata wakwe wu tava hehla kakwe. [51]

¹⁴Kanilezi loku a pswalile a mufana loyi a wonako a zionho zontlhe lezi a zi mahileko raru wakwe, a zi chava kasi a nga zi mahi,

¹⁵a nga geli zitsungeni, hambu ku tlakusa a mahlo yakwe a cuwuka a zifananiso za yindlu ya ka Israeli, a nga wisi tingana a sati wa muakelane wakwe,

¹⁶a nga onheli munhu, loyi a nga tekiko seve hambu ku phanga, kanilezi a phamela loyi a nga ni ndlala, a hanzulela loyi a nga ni wuna,

¹⁷loyi a nga onheliko lava va vumalako, a nga pembisi hi ku bhinzula, a lanzela zileletelo za mina ni ku hlayisa milayo ya mina; yena a nga tafa hi kota ya zigoho za raru wakwe, i ta hanya futsi.

¹⁸A raru wakwe i tafa hi kota ya zigoho zakwe, hakuva i tsimbeketile vanhu hi tihanyi, a phanga nakulobye, a maha mitiro yi bihileko xikari ka vanhu va ka kabye.

¹⁹Nwina mu ngalo: Hikuyini a nʼwana a nga rwaliko a kugoha ka raru wakwe? Loku a nʼwana a mahile lezi zi nga za nayo ni nongameto, a hlayisa a milayo ya mina a yi maha, yena i ta hanya futsi.

²⁰A muhefemulo, lowu wu onhako wu tafa; a nʼwana a nga ta rwala a kugoha ka raru wakwe, ge hambu raru ku rwala a kugoha ka nʼwana. A kululama ka loyi a lulamileko ku tava hehla kakwe, ni kubiha ka loyi a bihileko ku tava hehla ka yena, [52]

²¹Kanilezi loku a wakubiha a hunzuluka a tsika zontlhe a zionho lezi a zi mahileko, a hlayisa yontlhe milayo ya mina, a famba hi nayo ni nongameto, hizinene i ta hanya, a ngafi.

²²A nga ta hlayelwa ni xinwe xa zihambunyeto lezi a zi mahileko, i ta hanya hi kota ya kululama loku ai ku mahileko.

²³Nzi wa ta tsakela a kufa ka loyi wa kubiha ke? ku wula Hosi Jehova, nzi nga tsakeli lezaku a hunzuluka ndleleni yakwe a hanya ke?

²⁴Kanilezi loku a wakululama a tsika kululama kakwe a onha, a maha manyalataniso wontihe ya wakubiha, i ta hanya ke? A nga ta hlayelwa ni xinwe xa zimaho zi lulamileko lezi a zi mahileko. I tafa hi kota ya kuhluwuka kakwe ni zionho lezi a zi onhileko.

²⁵Nwina muku: A ndlela ya Jehova a yi lulamangi. Zwanani nwina va yindlu ya ka Israeli! A yi lulamangi a ndlela ya mina ke? a hi leti ta nwina ti nga lulamangiko ke?

²⁶Loku a wakululama a tsika kululama kakwe a onha, i ta fela kona, afa hi kota ya kugoha a ku mahileko.

²⁷Kambe, loku a wakubiha a hunzuluka a tsika a kubiha loku a ku mahileko, a maha lezi zi nga za nayo ni nongameto, a muhefemulo wakwe wu ta hanya.

²⁸Hakuva a ehleketako, a tsika zihambunyeto zakwe lezi a zi mahileko, hizinene i ta hanya, a ngafi.

²⁹A yindlu ya ka Israeli yiku: A ndlela ya Jehova a yi lulamangi. Nwina va yindlu ya ka Israeli, A ti lulamangi a tindlela ta mina ke? a hi leti ta nwina ti nga lulamangiko ke?

³⁰Hikwalaho nzi ta mu lamula, nwina va yindlu ya ka Israeli, munwe ni munwani kukotisa tindlela takwe, ku Wula Hosi Jehova. Wuyani, mu hunzuluka zihambunyetweni za nwina zontlhe, kasi a kugoha ka nwina ku nga mu lovisi.

³¹Cukumetani a zihambunyeto zontlhe za nwina lezi mu zi mahileko, mu ti kumela a mbilu yiswa ni moya muswa. Mu ta lova hikuyini, nwina va yindlu ya ka Israeli?

³²Hakuva a nzi tsakeli a kufa ka loyi a lovako, ku wula Hosi Jehova. Hikwalaho hunzulukani, mu hanya.