Read tshwa Ezekieli 23 Bible Online

Ezekieli 23 - tshwa bible

Ezekieli 23

¹A gezu ga Jehova gi lota ka mina kambe, giku:

²Nʼwana wa munhu, ku wa hi ni vavasati vambiri vo pswaliwa hi nyine munwe.

³Va lo maha wuoswi le Gipite; va lo maha wuoswi wunhanyaneni gabye, va khomakhomiwa mavele, va pswhinyingetelwa tihlofu na va hi vatsongwani.

⁴A mavito yabye, loyi wa nhonzwa hi Ohola, a nzisana hi Oholiba. Va lo maha va mina, va beleka vafana ni vanhanyana. A mavito lawa, Ohola hi Samaria, na Oholiba hi Jerusalema.

⁵Ohola i lo maha wuoswi na hi wa mina; i lo ranzana nguvu ni zigangu zakwe a maAssiria lava a akeleneko navo, [72]

⁶va nga wa ambala a tinguwo ta wukuxe, a vafumeli ni vatongi, vontlhe va nga majaha ma ranzekako, a vakhileli va mahaxi.

⁷Wuoswini gakwe i lo ti nyikela nguvu ka vavanuna va hlawulekako xikari ka maAssiria vontlhe; a ti nyenyezisa hi vontlhe lava a va ranzako ni zontlhe zifananiso zabye.

⁸Ni wuoswi legi a nga gi maha ni va le Gipite a nga gi tsikengi; lava va nga wa etlela naye wunhanyaneni gakwe, va pswhinyingetela a tihlofu ta wuswa gakwe; va chulula a wubhayi gabye hehla kakwe.

⁹Hikwalaho nzi lo mu nyikela mandleni ya zigangu zakwe, a mandleni ya maAssiria va nga vona a nga va ranza nguvu.

¹⁰Va lo vumbulula a wumbyiri gakwe: va teka vafana ni vanhanyana vakwe, yena wutsumbu va lo mu daya hi supado. I lo maha a tsheketo xikari ka vavasati laha a nga lamuliwa ni ku tsayiswa.

¹¹A makabye wakwe Oholiba i zi wonile, hambu zi hi tano, i lo hunzeleta a kubiheni ka kunavela kakwe, ni wuoswi gakwe legi gi nga tlula a wuoswi ga makabye wakwe.

¹²I lo ranza nguvu a maAssiria, a vafumeli ni vatongi va nga hi vaakelane vakwe, lava va nga ti bombisa khwatsi nguvu, a vakhileli va mahaxi, vontlhe va wa hi majaha ma hlawulekako. [73]

¹³Nzi lo wona lezaku i ti nyenyezisile; hi wumbiri gabye va wa hi va hanyela ginwe.

¹⁴I lo enzelekisa a wuoswi gakwe, hakuva laha a nga wona a zifananiso za vavanuna va maKaldea na zi tsalilwe laha khurisini hi penda yo pswhuka,

¹⁵na va bohile tifunga ziwunwini zabye, ni zihuku za mavalavala tihlokweni tabye, na va hi tihosana, zifananiso za vanhu va Babuloni le Kaldea, a tiko gabye ga maheleko,

¹⁶zalezo a nga va wona i lo va ranza, a rumela mitsumi kabye le Kaldea.

¹⁷A maBabuloni ma lota ka yena sangweni ga liranzo, va mu nyenyezisa hi wubhayi gabye; loku yena a ti nyenyezisile navo a moya wakwe wu lo swihala ha vona.

¹⁸I lo maha wuoswi gakwe kubaseni a vumbulula a wumbyiri gakwe; ni moya wa mina wu lo swihala ha yena, khwatsi hilezi wu nga swihala ni makabye wakwe.

¹⁹Kasike i lo enzelekisa a wuoswi gakwe na alakanya a masiku ya wuswa gakwe, a xikhati lexi a nga maha wuoswi le tikweni ga Gipite;

²⁰a navela kambe a zigangu zakwe, lezi a nyama ya zona yi nga ku khwatsi i nyama ya timbongola, ni kuhiseka ka zona ku fanana ni ka mahaxi.

²¹Hilezo u lo khumbula a wubemba ga wuswa ga wena, laha a vaGipite va nga pswhinyingetela a tihlofu ta mavele ya wunhwana ga wena.

²²Hikwalaho wena Oholiba, Hosi Jehova i ngalo: Languta, nzi ta ku vuxela a zigangu za wena, lezi u hambeneko nazo, nzi ta va tisa va ku vukela matlhelo wontihe:

²³a maBabuloni, ni maKaldea wontihe, Pekode na Xoa na Koa, ni wontihe maAssiria, a majaha ma hlawulekako, a vafumeli ni vatongi vontlhe, a tihosana ni vanhu va dumileko, vontlhe na va khilele mahaxi.

²⁴Va tata va ku vukela hi matlhari, ni tikareta ta yimpi, ni maranzani, ni xidlemo xa vanhu. Va ta ku ranzela matlhelo wontihe hi tingenge ni zitlhangu ni zihuku za xiketse; nzi ta va nyika ntamu ku ku lamula, va ku lamula hi lamulela gabye.

²⁵Nzi ta ku vukela hi wukhuxu ga mina, nzi va maha va ku khoma hi tihanyi; va ta ku tsema a nhovu ni tindleve, ni misalela ya wena yi ta dawa hi supado. Va ta yisa kule a vafana va wena ni vanhwana va wena; ni misalela ya wena yi ta hiswa hi nzilo.

²⁶Va ta ku runzuwulela a tinguwo ta wena, va ku tekela a wubombi ga wena go saseka.

²⁷Zinghaho nzi ta ku maha u tsika a kubiha ga wena, a wubhayi ga wena ga le Gipite; u nga ta ha zi tlakusele mahlo, ge hambu ku alakanya Gipite kambe.

²⁸Hakuva Hosi Jehova i ngalo: Nzi ta ku nyikela mandleni ya lava u va vengako, lava a moya wa wena wu hambeneko navo.

²⁹Ya ta ku khoma hi tihanyi ta livengo, va susa a bhinzu ga mitiro ya wena, va ku siya na u hi ximbyiri u nga hi na nchumu; a wumbyiri ga wubhayi ga wena gi ta vumbululwa, a kubiha ka wena ni wubhayi ga wena.

³⁰A zilo lezi zi ta maheka ka wena, hakuva u mahile wuoswi ni vamatiko u ti nyenyezisa hi zifananiso zabye.

³¹U fambile hi ndlela ya makwenu, hikwalaho nzi ta ku nyika a gombe gakwe.

³²Hosi Jehova i ngalo: U tanwa hi gombe ga makwenu, legi go anama ni kueta; u tava xiruko ni xihlekiso, hakuva ga hombe.

³³U ta popiwa u bayiseka hi gombe ga makwenu Samaria legi ga kuhahlula ni ku mahiwa marumbi.

³⁴U ta gi minyeta, u tlhela u laza a zirengele za gona, u tlukulutela a mavele ya wena; hakuva mina nzi zi wulile, ku wula Hosi Jehova.

³⁵Hikwalaho Hosi Jehova i ngalo: Kota lezi u nzi riveleko, u nzi fularela, hikwalaho u ta tsayiswa hi wuoswi ga wena ni wubhayi ga wena. [74]

³⁶Jehova a engeta aku ka mina: Nʼwana wa munhu, u ta lamula Ohola na Oholiba ke? Loku zi hi lezo va tivisa a manyalataniso yabye.

³⁷Hakuva va bhayile, a nkhata wu namarela mandleni yabye, va bhayile ni zifananiso zabye; ni vana vabye lava va nga nzi belekela, va va nyikele, a kuva kuga ka zona,

³⁸Tlhatakumbiri va nyenyezisile a yindlu ya mina yo basa, va nyenyezisa ni masabado ya mina,

³⁹hakuva a siku gwalego va nga wa dayele zifananiso a vana vabye, va lota ndlwini ya mina yo basa va ta yi nyenyezisa; hizalezo va nga mahisa zona ndlwini ya mina.

⁴⁰Hehla ka lezo va vitanisile a vavanuna va le kule; loku mitsumi yi chikele kabye vona va lota, a vavanuna lava u nga hlamba hi kota ya vona, u penda mahlo ya wena, u ti bombisa hi zingwavila;

⁴¹zonake u lo tshama laha mubhedini wo saseka, na ku hi ni meza yi longisilweko mahlweni ka wona, laha u nga veka a libani la mina ni mafura ya mina.

⁴²Ku lo zwala a guwa ga xidlemo xa vanhu va teku tinjha zinwe naye. Ku wa vitanilwe a vanhu va nyalidede va nga zidakwa za le xiwuleni. Va lo boha manayila mawokweni yabye ni zidlodlo zo saseka tihlokweni tabye.

⁴³Zonake nziku ka wasati loyi a nga hi xibhayi xa kale: Ina yaloyi wa ha ta bhaya navo ke?

⁴⁴Hakuva va lo enghena kakwe a kukotisa loku va enghena ka xibhayi; zinghaho va lo enghena ka Ohola na Oholiba, a vavasati va wuoswi.

⁴⁵A vanhu va lulamileko va ta va lamula hi malamulelwa ya zibhayi ni malamulelwa ya vavasati laʼva halatako nkhata: hakuva vona zibhayi, ku na ni nkhata mandleni yabye. [75]

⁴⁶Hakuva Hosi Jehova i ngalo: Nzi ta va nehela a hlengeletano yi ta va vukela, nzi va nyikela a ku khomiwa hi tihanyi ni kuphangiweni.

⁴⁷A hlengeletano leyi yi ta va gandla hi maribye, yi va daya hi supado; yi ta daya a vafana vabye ni vanhanyana vabye, va hisa tiyindlu tabye hi nzilo.

⁴⁸Nzi ta fuvisisa lezo kontlhe kubiha lomu tikweni, kasi vontlhe vavasati va ta gonza a ku nga lanzeli a kubiha ka nwina.

⁴⁹Va ta mu tlhelisela a kubiha ka nwina, mu tava ni nanzu wa zionho za zifananiso za nwina; zonake mu ta zi tiva lezaku hi mina Hosi Jehova,