Read tshwa Ezekieli 25 Bible Online

Ezekieli 25 - tshwa bible

Ezekieli 25

¹A gezu ga Jehova gi lota ka mina, giku:

²Nʼwana wa munhu, hunzulukela a vana va Amoni, u va profetela,

³uku ka vona; Zwanani a gezu ga Hosi Jehova! Hosi Jehova i ngalo: Lezi u teku ha-ha ka yindlu ya mina yo basa laha yi nga wa nyenyezisilwe; ni ka tiko ga Israeli laha gi nga wa mahilwe marumbi; ni ka yindlu ya ka Juda laha va nga yiswa wukhumbini,

⁴hikwalaho nzi ta ku nyikela akuva u fumelwa hi vana va Mutsuwuka-gambo, va ta gwimba matenda yabye xikari ka wena, va aka ka wena; va taga mihanzu ya wena, vanwa a masi ya wena.

⁵Rabba nzi ta mu maha a ranga ga makameli, ni tiko ga vana va Amoni giva a wugovelo ga mitlhambi: Nwina mu ta zi tiva lezaku hi mina Jehova.

⁶Hakuva Hosi Jehova i ngalo: Kota lezi u nga phakatela a mandla ya wena, u ganyetela hi mikonzo ya wena, a moya wa wena wu bhuma wu hlekula a tiko gaka Israeli;

⁷hikwalaho nzi ta nawuluta a canja ga mina hehla ka wena, nzi ku nyikela akuva muphango ka matiko; nzi ta ku fuvisa xikari ka vanhu, nzi ku lovisa matikweni; nzi ta ku hetisa, hi kona u ta nga zi tiva lezaku hi mina Jehova.

⁸Hosi Jehova i ngalo: Kota lezi Moabi na Seire va nge ngalo: Langutani, makunu a yindlu ya ka Juda yi fanana ni matiko wontihe; [80]

⁹hikwalaho nzi ta vulula a reve ga Moabi kusukela mitini yakwe leyi yi nga mimbhinganweni yakwe, yi nga wudumo ga tiko, Beth-jeximote, na Baal-meoni, na Kiriataime,

¹⁰nzi gi vululela a vana va le Mutsuwuka-gambo kasi ku ya vukela a vana va Amoni; nzi ta gi nyikela kabye, kasi a vana va Amoni va nga ha alakanyiwi xikari ka matiko.

¹¹Nzi ta lamula Moabi, va ta zi tiva lezaku hi mina Jehova.

¹²Hosi Jehova i ngalo: Kota lezi Edome a ti photeleko ka yindlu ya ka Juda, a ti vuxela zanga hi ku ti photela ha yece hehla kabye, [81]

¹³hikwalaho Hosi Jehova i ngalo: Nzi ta nawuluta a canja ga mina hehla ka Edome, nzi hihirita a vanhu ni zifuyo za gona. Nzi ta gi hahlula kusukela Temani, va ta dawa hi supado kala Dedani.

¹⁴Nzi ta ti photela ka Edome hi canja ga vanhu va mina va ka Israeli; va ta maha tikweni ga Edome kukotisa a zanga ya mina ni khulo ga mina. Va ta tiva a kuphota ka mina, ku wula Hosi Jehova.

¹⁵Hosi Jehova i ngalo: Kota lezi a maFilistia ma ti photeleko, va ti photela hi kutikisa hi kota ya wulala leʼgi nga timbilwini tabye, va xuva ku gi lovisa hi livengo leli li nga gumelwiko; [82]

¹⁶hikwalaho Hosi Jehova i ngalo: Nzi ta nawuluta a canja ga mina hehla ka maFilistia, nzi hihirita a maKerete, nzi lovisa a misalela ya le fungwini wa bimbi.

¹⁷Nzi ta ti photela hi kutikisa, nzi va tsayisa hi zanga; va ta zi tiva lezaku hi mina Jehova laha nzi ta nga ti photela hehla kabye.