Read tshwa Ezekieli 26 Bible Online

Ezekieli 26 - tshwa bible

Ezekieli 26

¹Hi lembe ga wukhume ni ginwe, hi siku go sangula ga hweti, a gezu: ga Jehova gi lota ka mina, giku:

²Nʼwana wa munhu, kota lezi Tire a nga hlekula Jerusalema, aku: Ha-ha, a nyangwa ya matiko yi khungumulwe, Yi vululekile ka mina; Makunu nzi ta vuvuma hakuva i hahlulwe.

³Hikwalaho Hosi Jehova i ngalo: Nzi ta ku vukela wena Tire, Nzi ta ku vuxela a matiko yo tala, Ma ku khwatsi mabyandlati ya bimbi loku ma mbekuka. [83]

⁴Ma ta khungumula a tigingisi ta Tire, Ma hahlula a makhokhola yakwe; Nzi ta kukula a ntshuri wakwe, A sala a hi ribye gi nga hiko na nchumu.

⁵I ta maha wutshamu go anekela kona a tikoka xikari ka bimbi, Hakuva nzi zi wulile, ku wula Hosi Jehova; Yena i tava muphango wa matiko.

⁶A vanhanyana vakwe va nga lomu tikweni va ta dawa hi supado; Va ta zi tiva lezaku hi mina Jehova.

⁷Hakuva Hosi Jehova i ngalo: Nzi ta neha Nebukadrezzare le Tire, a hosi ya le Babuloni, a hosi ya tihosi, na a suka hi le Nwalungu, ata ni mahaxi ni tikareta ta yimpi, ni vakhileli va mahaxi, ni xidlemo xa vanhu vo tala.

⁸I ta daya hi supado a vanhanyana va wena va nga lomu tikweni; I ta ku akela makhokhola, a ku akela a tinhulu, A ku tlakusela zitlhangu.

⁹I ta bhoxa a makhurisi ya wena hi makina, A khungumula a makhokhola ya wena hi zihloka zakwe.

¹⁰Hi kota ya wunyingi ga mahaxi yakwe a ntshuri wa wona ma ta ku fenengeta; A makhurisi ya wena ma ta tsekataekiswa hi guwa ga vakhileli va mahaxi, Ni ga tikareta ni makaliji, Loku a enghena tinyangweni ta wena, Khwatsi hi vanhu va enghenako mutini lowu a ligingisi la wona li bhoxilweko.

¹¹A maphango ya wena wontihe ma ta kanzihelwa hi makhanzo ya mahaxi yakwe, I ta daya vanhu va wena hi supado, a timhinga ta ntamu wa wena ti tawa lahasi.

¹²Va ta phangaa titshomba ta wena, va wutla a wukwewu ga wena, Va ta khungumula a tigingisi ta wena ni tiyindlu ta wena to saseka; Va ta hoxa maribye ya wena, ni timhanze ta wena ni ntshuri wa wena lomu matini.

¹³Nzi ta miyeta a guwa ga kuyimbelela ka wena, Ni pfumawulo wa zitende za wena wu nga ta hazwiwa kambe. [84]

¹⁴Nzi ta ku maha a ribye ga likwembu, U ta maha wutshamu go anekela kona a tikoka; U nga ta ha akiwa kambe, Hakuva mina Jehova nzi zi wulile, ku wula Hosi Jehova.

¹⁵Hosi Jehova i ngalo ka Tire; Xana a zihlale zi nga ta tsekatsekiswa hi guwa ga kuwa ka wena, Ni kuketa ka lava va tlhabyilweko, Loku ku hihiritwa xikari ka wena ke?

¹⁶Zonake a tihosana tontlhe ta bimbi ti ta chika hi le xitshanwini za tona za wuhosi. Ti veka tinguwo ta tona tlhelweni, Ti runzuwula a tinguwo ta tona ta mavalavala; Ti ta ambala kuchava, Ti tshama lahasi hi kururumela xikhati xontlhe, Ti rewukiswa hi wena.

¹⁷Ti ta ku tlhavela nkosi, tiku: U lovisile kuyini, wena loyi u nga akilwe hi vanhu va le bimbini, Wena muti wu dumileko, lowu wu nga hi wa ntamu le bimbini, Wena ni vaaki va wena vontlhe va nga chabyiwa hi lava va fambako hi bimbi?

¹⁸A zihlale zi ta rurumela hi siku ga kuwa ka wena, A zihlale lezi zi nga le bimbini zi ta rurumela hi kugumelwa ka wena.

¹⁹Hakuva Hosi Jehova i ngalo: Laha nzi ta nga ku maha a rumbi, Ku fanana ni miti leyi yi nga hiko na vaaki, Laha nzi ta nga ku nehela a kueta ka bimbi, Kasi a mati manyingi ma ku fenengeta;

²⁰Zonake nzi ta ku hoxa uya lahasi zinwe ni lava va relelako nkeleni, A ka vanhu va kaleloko; Nzi ta ku akisa lehasi ka misava, A marumbini ya kale, Zinwe ni lava va relelako nkeleni, Kasi u nga ha akiwi, Na nzi kari nzi maha zile za hombe a tikweni ga vahanyako.

²¹Nzi ta ku maha xihoto, u ngave kona kambe. Hambu loku wo labyiwa, cima u nga ta ha kumiwa kambe, Ku wula Hosi Jehova,