Read tshwa Ezekieli 30 Bible Online

Ezekieli 30 - tshwa bible

Ezekieli 30

¹A gezu ga Jehova gi lota ka mina kambe, giku:

²Nʼwana wa munhu, profeta uku: Hosi Jehova i ngalo: Rilani! Yowe, a siku lego!

³Hakuva a siku gi tshinele, gona a siku ga Hosi gi laha kusuhani, a siku ga madzuvi: xikhati xa vamatiko. [94]

⁴A supado yi tata hehla ka Gipite, ni miketo yi ta kuva kona le Etiopia, laha a va delweko va ta ngawa le Gipite. Ku ta tekiwa a zidlemo za gona, ni ziseketelo za gona zi ta khungumulwa.

⁵Etiopia, na Pute, na Lude, hi vontlhe vanhu va xangeleneko; na Kube, ni vanana va tiko ga xivumelwano, va ta dawa hi supado zinwe navo.

⁶Jehova i ngalo: Lava kambe va yimelako Gipite va tawa, ni matshanza ya ntamu wakwe ma ta mbhela. Kusukela Migdole kala Sevene a vanhu va ta dawa hi supado, ku wula Hosi Jehova.

⁷Va tava marumbi xikari ka matiko lawa ma nga marumbi, a miti yakwe yi tava xikari ka miti leyi yi hahlulweko.

⁸Va ta zi tiva lezaku hi mina Jehova, laha nzi ta nga dzivela a nzilo le Gipite, ni vavuni vakwe vontlhe va lobyisilwe.

⁹Hi siku lego ku ta huma mitsumi hi ka mina, yi famba hi mataru a ku ya dzukisa a maEtiopia a kutshamekeni kabye. Ku tava kona a kubayiseka hehla kabye hi siku lego ga Gipite; hakuva gona gata!

¹⁰Hosi Jehova i ngalo: Kambe nzi ta lovisa bhi a wunyingi ga maGipite hi canja ga Nebukadrezzare a hosi ya le Babuloni.

¹¹Yena ni vanhu vakwe, a vanhu vo leva va le matikweni, va ta tisiwa ku ta lovisa a tiko. Va ta hlomula a tisupado tabye a ka Gipite, va tata a tiko hi zirumbi.

¹²Nzi ta maha micongo yipswha, nzi xavisa a tiko mandleni ya vanhu vo biha. Nzi ta gi hahlula ni zontlhe zi nga ka gona hi canja ga vamatiko; hi mina Jehova nzi zi wulileko.

¹³Hosi Jehova i ngalo: Kambe nzi ta khungumulela a zifananiso, nzi fuvisa a vanungungulu va hava tikweni ga Nofe; ku nga ha ta kuva kona ni hosana a tikweni ga Gipite, nzi ca chela hlanekera a tikweni ga Gipite.

¹⁴Patrosi nzi ta mu maha a rumbi, nzi hisa Zoane, nzi tsayisa a va le No.

¹⁵Nzi ta chulula a zanga ya mina hehla ka Sina, a khokhola ga le Gipite; nzi hihirita a xidlemo xa le No.

¹⁶Nzi ta dzivela a nzilo le Gipite; Sina i tava kuxanisekeni ka hombe nguvu, No i ta avanyeka, Nofe i ta putsuketwa hi valala ni hlikanhi.

¹⁷A majaha ya le Aveni ni ya le Pibesete ma ta dawa hi supado; ni va miti va ta yiswa wukhumbini.

¹⁸Le Tehafnehesi a hlikanhi wu ta phuma, laha nzi ta nga tshova a miyoka ya Gipite, ni matshanza ya ntamu wakwe ma ta mbhela; i ta fenengetwa hi refu, ni vanhwana vakwe va taya wukhumbini.

¹⁹Nzi ta lamulisa lezo xikari ka Gipite; na vona va ta zi tiva lezaku hi mina Jehova.

²⁰Hi lembe ga wukhume ni ginwe, hi hweti yo sangula, hi siku ga wuntlhanu ni mambiri ga hweti, a gezu ga Jehova gi lota ka mina, giku:

²¹Nʼwana wa munhu, nzi tshovile a woko ga Faro a hosi ya le Gipite; languta, a gi bohelelwangi ni ku cheliwa muri, a gi tsonzelelwangi miceka kasi ku gi maha giva ni ntamu wo khoma a supado.

²²Hikwalaho Hosi Jehova i ngalo: Nzi yimekelene na Faro a hosi ya le Gipite, nzi ta tshova mawoko yakwe, legi ga ntamu ni legi gi tshovekileko, nzi wisa a supado canjeni gakwe.

²³Nzi ta hangalasa a maGipite xikari ka matiko, nzi ma xwanya le matikweni.

²⁴Nzi ta tiyiseta a mawoko ya hosi ya le Babuloni, nzi veka supado ya mina canjeni gakwe; kanilezi nzi ta tshova a mawoko ya Faro, kasi a keta mahlweni kakwe a kufanana ni munhu loyi a tlhabyilweko.

²⁵Nzi ta seketela a mawoko ya hosi ya le Babuloni, a mawoko ya Faro ma tawa. Vona va ta zi tiva lezaku hi mina Jehova laha nzi ta nga veka a supado ya mina canjeni ga hosi ya le Babuloni, a gi nawuluta hehla ka tiko ga Gipite.

²⁶Nzi ta hangalasa a maGipite xikari ka matiko, nzi va xwanya le matikweni; va ta zi tiva lezaku hi mina Jehova.