Read tshwa Ezekieli 35 Bible Online

Ezekieli 35 - tshwa bible

Ezekieli 35

¹A gezu ga Jehova gi lota ka mina, giku:

²Nʼwana wa munhu, hunzuluka u cuwuka xitsungeni xa Seire, u xi profetela, [104]

³uku ka xona: Hosi Jehova i ngalo: Nzi yimekeiene na wena xitsunga xa Seire, nzi ta nawuluta a canja ga mina nzi ku vukela, nzi ku maha marumbi ni xirewukiso.

⁴Nzi ta hahlula a miti ya wena, na wena u tava xiwula; zonake u ta zi tiva lezaku hi mina Jehova.

⁵Hakuva u na ni livengo la simasima, ni kuva u nyikele a vanana va ka Israeli ntanwini wa supado xikhatini xa hlokiselelo yabye, xikhatini xa tsayiselelo wa magumo.

⁶Hikwalaho nza hlambanya hi kuhanya ka mina, ku wula Hosi Jehova, nzi ta ku longisela a nkhata, ni nkhata wu ta ku lanzela. Kota lezi u nga vengangiko a nkhata, hikwalaho a nkhata wu ta ku hlongolela.

⁷Zinghaho nzi ta hahlula a xitsunga xa Seire nzi xi maha xiwula; nzi daya lava va fambako kona ni ku wuya.

⁸Nzi ta tata a zitsunga zakwe hi zirumbi; lomu migangeni ya wena, ni lomu minzhelelweni ya wena, ni lomu micongweni ya wena, ku tawa lava va delweko hi supado.

⁹Nzi ta ku maha xiwula xa pinzukelwa, a miti ya wena yi nga ta ha aketwa; mu ta zi tiva lezaku hi mina Jehova.

¹⁰Hakuva wena u teku: A mifumo leyi yimbiri ni matiko lawa ya mambiri ma tava ya mina, hi ta ma fumela; kasilezo Jehova i wa hi konawu kwalaho;

¹¹hikwalaho nza hlambanya hi kuhanya ka mina, ku wula Hosi Jehova, nzi ta maha maringano ni zanga ya wena ni wukhuxu ga wena, lezi u zi kombisileko livengweni la wena ka vona; nzi ta ti tivekisa xikari kabye, laha nzi ta nga ku lamula.

¹²U ta zi tiva lezaku mina Jehova nzi zwile tontlhe a tinzhukano ta wena leti u nga ti wulawula ka zitsunga za ka Israeli, uku: Zi hahlulwe, zi nyikilwe ka hina a kuva hi zi khadamula.

¹³Mu ti kulisile ka mina hi milomu ya nwina, mu nzi tatela timhaka ta ku nzi vukela; nzi zi zwile.

¹⁴Hosi Jehova i ngalo: Laha misava yontlhe yi ta ngava kutsakeni, nzi ta ku hahlula.

¹⁵Khwatsi hilezi wena u nga tsaka hi kuhahluka ka tshomba ya yindlu ya ka Israeli, mina nzi ta maha lezo na wenawu. U ta hahluka, wena xitsunga xa Seire u maha xiwula, ni tiko gontlhe ga Edome; zonake va ta zi tiva lezaku hi mina Jehova.