Read tshwa Ezekieli 4 Bible Online

Ezekieli 4 - tshwa bible

Ezekieli 4

¹Ma wena nʼwana wa munhu, teka a thayela u yi veka mahlweni ka wena, u tsala ka yona a xifananiso xa muti wa Jerusalema.

²U wu renzelekela hi zikhulekhule zo wu vimbezela, u aka makhokhola, u wu renzelekela hi magovelo, ni ku yimisa zo hahlula ha zona tigingisi ta wona.

³Zonake teka a barita ya simbi, u yi yimisa yi maha khurisi xikari ka wena ni muti; u ta cuwukana na wona, wu ta vimbezelwa, wena u ta wu vimbezela. Xi tava xikombiso ka yindlu ya ka Israeli.

⁴Zonake u ta etlela hi reve ga xibhabha, u veka kugoha ka yindlu ya ka Israeli ka wena. A ka masiku lawa u ta nga etlela ka gona, u ta rwala a kugoha kabye.

⁵Hakuva a tsengo wa malembe ya kugoha kabye, a ka wena nzi ta wu hunzula wu maha a tsengo wa masiku, ku tava 390 wa masiku. Zinghaho u ta rwala kugoha ka yindlu ya ka Israeli.

⁶Zonake loku ma mbhelile masiku lawo, u ta tlhela u etlela hi reve ga wena ga xinene, u ta rwala a kugoha ka yindlu ya ka Juda; ku nga 40 wa masiku, nzi ku ringanisela a kuva a siku ginwe gi hlayiwa kota lembe, ginwe. [4]

⁷U ta cuwuka ngomama ni Jerusalema lowo wu vimbezelweko, u nawuluta a woko ga wena ka wona gi nga fenengetwangiko, u profeta ha wona.

⁸Nzi ta ku boha hi magota, kasi u nga zi koti ku hunzuluka ka ginwani reve, kala u mbhetisa a masiku ya kuvimbezela ka wena.

⁹U ta teka a mavele, ni sevada, ni tinyawa, ni mahuva, ni mahila, u zi chela lomu ka xibya xinwe, u ti mahela zibaba ha zona, lezi u ta ngaga a ka masiku lawa ya 390 ya kuetlela ka wena.

¹⁰Lezi u ta ngaga zi ta kaliwa, ku ringaniswa 20 wa maxekeli hi siku; u ta nusa ka xipanze lexi kambe ni kambe.

¹¹U tanwa mati hi lipimo, a mabhikiri mambiri hi siku; u tanwa xikhati ni xikhati.

¹²U ta ziga ku khwatsi zikhekhetselo za sevada, u zi bhika kuwoneni kabye hi macimba ya vanhu.

¹³Jehova a engeta aku: A vana va ka Israeli va ta gisa lezo a zibaba zi nyenyezileko a matikweni lawa nzi ta nga va hlongolela kona.

¹⁴Zonake nzi te ngalo: Ha! Hosi Jehova! Cima a nzi ti nyenyezisangi; kusukela wusweni ga mina kala lezi a nzi ngagi a xilo xakuva xi ti feleko ha xoce, ge hambu lexi xi delweko hi zivanza; a nyama yo biha cima a yi se nga enghena nonwini wa mina. [5]

¹⁵Zonake i te ngalo ka mina: Cuwuka, nza ku nyika a macimba ya homu wutshanwini ga macimba ya vanhu; u ta bhika ha wona a zibaba za wena.

¹⁶Aku ka mina kambe: Nʼwana wa munhu, nzi ta susa a zakuga lomu mutini wa Jerusalema. Va taga zibaba hi ku pimelwa na va rurumela, va tanwa mati hi lipimo na va dzuka. [6]

¹⁷Va ta vumala kuga ni mati, vontlhe na va kari va dzuka, va kweveka kugoheni kabye.