Read tshwa Ezekieli 41 Bible Online

Ezekieli 41 - tshwa bible

Ezekieli 41

¹Zonake i lo nzi yisa lomu tempeleni, a pima a timhanze ta yona; ti wa hi ntlhanu ni munwe mikono hi tlhelo ni tlhelo, ti ringana a kuanama ka tenda.

²A kuanama ka nyangwa ku wa hi 10 ga mikono, a matlhelo ya nyangwa ma wa hi ntlhanu wa mikono seno ni ntlhanu wa mikono seniya. I lo pima a kuleha ka yindlu ku wa hi 40 wa mikono ni kuanama ku wa hi 20 wa mikono. [125]

³Zonake i lo enghena lomu nzeni, a pima a timhanze ta wuengheno, a kudziva ka tona ku wa hi mikono mimbiri; a wuengheno gi wa hi ntlhanu wa mikono ni munwe; ni mareve ya wuengheno ma wa hi ntlhanu wa mikono ni mimbiri seno ni seniya.

⁴I lo pima a kuleha ka yindlu ku wa hi 20 wa mikono, ni kuanama ka yona 20 wa mikono, a mahlweni ka tempeli. Aku ka mina: Legi hi wutshamu gi hunzeleleko ku basa.

⁵Zonake i lo pima a khurisi ga yindlu, ntlhanu wa mikono ni munwe; ni matsawu ya laha tlhelweni, wona wontihe ma wa hi mune wa mikono, a matlhelo wontihe ya yindlu.

⁶A matsawu ya matlhelo ma wa yimile a manwe hehla ka manwani, ma maha zitezi zinharu, wontihe ma wa hi 30 wa wona. Ma wa bohilwe ni khurisi ga yindlu ma tiyisiwa hi gona, kanilezi ma wa nga patsanangi ni khurisi ga yindlu.

⁷A matsawu lawa ma wa engetelana ku anama ka zitezi za le hehla, hakuva a tixaxa linwe ni linwani li wa renzelekela yindlu a matlhelo wontihe; hikwalaho a kuanama ka yindlu ku wa engetelana ku kula ka lixaxa linwe ni linwani, zinghaho a kuya ka tsawu ga lehehla ku hunziwa hi ka tsawu ga laha xikari,

⁸Nzi lo wona lezaku ku wa hi ni matshamu ma tlakukileko matlhelo wontihe ya yindlu, hakuva a ziseketelo za matsawu zi wa tlakukile a ntlhanu wa mikono ni munwe.

⁹A kudziva ka khurisi ga lehandle ka matsawu ku wa hi ntlhanu wa mikono, ni wutshamu gi seleko ga ziseketelo za matsawu ya lomu matlhelweni ya yindlu.

¹⁰Ku wa hi ni wutshamu gi ranzelekeleko a matsawu wontihe ya yindlu, ma nga hi 20 wa mikono a kuanama.

¹¹A tivati ta matsawu ya lomu matlhelweni ti wa cuwukile tlhelo legi gi nga wa sele, a linwe li wa cuwukile tlhelo ga Nwalungu, a linwani li cuwuka tlhelo ga Dzonga. A kuanama ka xipanze lexi xi nga wa sele ku wa hi ni ntlhanu wa mikono matlhelo wontihe.

¹²A yindlu leyi yi nga wa hi mahlweni ka wutshamu ga xisirelo, ngomama ni tlhelo ga Muhlwa-gambo, yi wa hi ni 70 wa mikono a kuanama; a kudziva ka makhurisi ya yona ku wa hi ntlhanu wa mikono, a kuleha ka yona ku wa hi 90 wa mikono.

¹³Zonake i lo pima kuleha ka yindlu 100 wa mikono; ni wutshamu ga xisirelo ni yindlu, ni makhurisi ya yona, zi wa hi 100 wa mikono kuleha.

¹⁴Ni kuanama ka le mahlweni ka yindlu ni ka wutshamu ga xisirelo hi tlhelo ga Mutsuwuka-gambo ku wa hi 100 wa mikono.

¹⁵Zonake i lo pima a kuleha ka yindlu leyi yi nga wa gamekene ni wutshamu ga xisirelo legi gi nga hi lenzhako ka yona, ni tigumbagumba ta yona hi tlhelo ga seno ni ga seniya, zi wa hi 100 wa mikono; a pima ni tempeli ya lomu xikari ni tinyangwa ta hubye;

¹⁶a zipimbitsi, ni tinjhanela ti valekako, ni tihubyana ta matlhelo manharu ngomama ni xipimbitsi, zi wa mehelwe a mapulangu matlhelo wontihe, kusukela lahasi kala tinjhaneleni, ni tinjhanela ti wa fenengetilwe,

¹⁷kala lehehla ka livati, lomu nzeni ni lahandle ka yindlu, ni matlhelo wontihe ya khurisi lomu nzeni ni lahandle, zontlhe zi wa mahilwe hi lipimo.

¹⁸Zi wa hi ni mifananiso ya makerubima ni micinzu; xikari ka kerubima ginwe ni ginwani ku wa hi ni cinzu munwe, a kerubima ginwe ni ginwani gi wa hi ni tinghohe timbiri.

¹⁹A tlhelo ginwe ku wa hi nghohe ya munhu yi nga cuwuka a cinzu wa tlhelo ga seno, a ginwani tlhelo ku wa hi nghohe ya nghala yi cuwuka a cinzu wa tlhelo ga seniya, yindlu yontlhe yi wa renzelekelwe hi zona.

²⁰Kusukela lahasi kala hehla ka livati ku wa mehelwe makerubima ni micinzu; gi wa hi tano a khurisi ga tempeli.

²¹A timhanze ta livati la tempeli ti wa ringana matlhelweni ya mune; ni le mahlweni ka wutshamu ga ku basa ku wa hi ni xo khwatsi i alati ga mapulangu.

²²A alati gi wa mahilwe hi mapulangu, a kutlakuka ka gona ku wa hi mikono minharu ni mikono mimbiri kuleha, gi wa hi ni magwitsi. A xiseketelo xa gona ni makhurisi ya gona zi wa mahilwe hi mapulangu. Yena aku ka mina: Leyi hi meza yi nga mahlweni ka Jehova.

²³A tempeli ni yindlu ya ku basa zi wa hi ni tivati timbiri.

²⁴Hi wumbiri ga tona ti wa hi tivati ta mipatswa; hakuva a livati linwe ni linwani li wa hi mapulangu mambiri.

²⁵Laha ka tivati leti ku wa mehelwe a makerubima ni micinzu, a ku khwatsi hi lezi zi nga wa mehelwe lomu makhurisini; ku wa hi ni timhanze to dziva ta tisinya hi lahandle ka ligumbagumba.

²⁶Ku wa hi ni tinjhanela ti valekako ni micinzu ka tlhelo ga seno ni ga seniya lomu ligumbagumbeni, zi wa hi lezo kambe ni lomu matsawini ya matlhelo ni le timhanzeni.