Read tshwa Ezekieli 43 Bible Online

Ezekieli 43 - tshwa bible

Ezekieli 43

¹Zonake i lo nzi yisa nyangweni ya tlhelo ga Mutsuwuka-gambo.

²Nzi lo wona a kungangamela ka Nungungulu wa ka Israeli na kuta hi le Mutsuwuka-gambo. A gezu gakwe gi wa ku khwatsi i guwa ga mati yo tala; a misava yi ngangamela hi wukosi gakwe.

³A muwoniso lowu wu wa fanana ni lowu nzi wu wonileko laha nzi ngata ku ta lovisa a muti; ni ku fanana ni lowu nzi nga wu wona laha congweni wa Kebare. Nzi lowa lahasi hi nghohe ya mina.

⁴A kungangamela ka Jehova ku lo enghena lomu ndlwini hi nyangwa ya tlhelo ga Mutsuwuka-gambo.

⁵Zonake a moya wu lo nzi tlakula wu nzi yisa hubyeni ya lomu xikari, nzi wona lezaku a kungangamela ka Jehova ku wa tatile a yindlu.

⁶Nzi lozwa wokari lomu ndlwini a wulawula ka mina, na ku yimile munhu a mahlweni ka mina.

⁷I te ngalo ka mina: Nʼwana wa munhu, hi laha ku nga ni xitshamu xa mina xa wuhosi, a wutshamu legi nzi yimileko hi mikonzo ya mina, lomu nzi ta nga tshama xikari ka vanana va ka Israeli kala kupinzuka. A yindlu ya ka Israeli yi nga ta ha nyenyezisa a vito ga mina ga kubasa, vona ni tihosi tabye, hi wubhayi gabye ni zirumbi za tihosi tabye a kufeni ka tona, [126]

⁸leti ti nga veka a xipimbitsi xabye kusuhani ni xa mina, ni timhanze ta livati labye kusuhani ni timhanze ta livati la mina, ku hi ni khurisi ntsena xikari ka mina ha vona; va nyenyezisa a vito ga mina ga kubasa hi manyalataniso yabye lawa va nga ma maha, nzi kala nzi va lovisa hi zanga ya mina.

⁹Makunu a va suse kule na mina a wubhayi gabye, ni zirumbi za tihosi tabye, zonake nzi ta aka xikari kabye kala kupinzuka.

¹⁰Wena nʼwana wa munhu, hlawutela hi yindlu leyi ka va yindlu ya ka Israeli, kasi va fela kuzwa tingana hi zigoho zabye loku va pima a tipimo ta yona.

¹¹Loku vazwa tingana hi lezi va zi mahileko, u ta va tlhamusela a xiyimo xa yindlu leyi ni maakela ya yona, ni tinyangwa ta yona to huma ha tona ni to enghena ha tona, a matirela ya yona wontihe ni milayo yontlhe ya yona, ni mitiro yontlhe ya yona ni zileletelo zontlhe za yona, u zi tsala kuwoneni kabye, kasi va fela ku hlayisa a xiwumbeko xa yona ni milayo yontlhe ya yona, va zi maha.

¹²A nayo wa yindlu hi lowu: A wutshamu gontlhe ga xixungwe xa xitsunga gi tava legi gi hunzeleleko kubasa. Lowu hi nayo wa yindlu.

¹³Leti hi tipimo ta alati hi mikono (a nkono wa kona hi nkono munwe ni xicanja). A xiseketelo xa kona xi tava nkono munwe a kutlakuka, ni nkono munwe a kuanama, a nomu wa gona wu ranzelekeleko matlhelo wontihe hi canja ginwe; lego hi gona a tshako ga alati.

¹⁴Kusukela lomu hasi ka xiseketelo ku chikela wukanzihelweni ga lahasi ku tava mikono mimbiri, a kuanama ku tava a nkono munwe; a kusukela wukanzihelweni ga lahasi kuya chikela ka legi ga le hehla ku tava mune wa mikono, ni kuanama ku tava nkono munwe.

¹⁵A kutlakuka ka khombari ga alati ku tava mune wa mikono, lomu ka khombari ku ta huma mune wa timhonzo.

¹⁶A kuleha ka khombari ga alati ku tava 12 wa mikono, ni kuanama kambe ku tava 12 wa mikono, a matlhelo wontihe ya mune ma hi yo ringana.

¹⁷A wukanzihelo gi wa hi 14 wa mikono a kuleha ni 14 wa mikono kuanama a matlhelweni ya gona ya mune, ni marimba ya kona ma wa hi khihlanya ga nkono; ni wukanzihelo ga kona gi tava nkono munwe matlhelo wontihe. A zikanzihelo zi ta cuwuka Mutsuwuka-gambo.

¹⁸Yena aku ka mina: Nʼwana wa munhu, Hosi Jehova i ngalo: Leyi hi milayo ya alati a siku lego gi ta nga akiwa, va mahela kona a minyikelo yo hiswa, ni ku nwatsekela a nkhata hehla ka gona.

¹⁹U ta nyika a vapristi va ka Levi va nyimba va Zadoke, lava va tshinelako mahlweni ka mina kasi ku nzi tirela, ku wula Hosi Jehova, u va nyika a honwana a kuva a munyikelo wa kuonha.

²⁰U ta teka a nkhata wa yona u wu tota laha ka timhonzo ta mune ta alati, ni lomu magwitsini ya mune ya wukanzihelo ni laha ka marimba lawa ma gi renzetekelako. Lezo u ta basisa a alati, u gi mahela a nzhiho. [127]

²¹Zonake u ta teka a honwana ya munyikelo wa kuonha, u yi hisa lahandle ka yindlu ya: kubasa, laha wutshanwini gi yimisilweko ga yindlu. [128]

²²Hi siku ga wumbiri u ta maha munyikelo wa kuonha hi mhongo yi nga hiko na vala; yi ta basisa a alati khwatsi hilezi va nga gi basisa hi honwana.

²³Loku u mhhetile a ku gi basisa, u ta nyikela hi honwana yi nga hiko na vala, ni mhamba ya tlhambi yi nga hiko na vala.

²⁴U ta zi tshineta mahlweni ka Jehova, a vapristi va ta zi chela munyu, va maha ha zona a munyikelo wa kuhiswa ka Jehova. [129]

²⁵Siku ni siku u ta tlhava a mbuti yiva munyikelo wa kuonha kala ntlhanu wa masiku ni mambiri, kambe va ta tlhava a honwana ni mhamba ya tlhambi, zi nga hiko na vala.

²⁶Hi ntlhanu wa masiku ni mambiri va ta maha a nzhiho wa alati, va gi basisa ni ku gi nyikelisisa.

²⁷Loku va hetile a masiku lawo ni siku ga wuntlhanu ni manharu ni kuya mahlweni, a vapristi va ta mu mahela a minyikelo ya nwina ya kuhiswa ni minyikelo ya kurula laha ka alati; zonake nzi ta xalala ha nwina, ku wula Hosi Jehova. [130]