Read tshwa Ezekieli 44 Bible Online

Ezekieli 44 - tshwa bible

Ezekieli 44

¹Zonake i lo nzi wuyisa hi ndlela ya nyangwa lehandle ka wutshamu ga kubasa, leyi yi cuwukako Mutsuwuka-gambo; yi wa valilwe.

²Jehova aku ka mina: A nyangwa leyi yi ta valiwa, cima yi nga ta vululiwa, a ku na munhu a to enghena ha yona, hakuva Jehova a Nungungulu wa ka Israeli i enghenile hi yona; hikwalaho yi ta simamisa yi valilwe.

³A hosana yona yi ta tshama kona yi gela kona mahlweni ka Jehova; yi ta enghena hi ndlela ya ligumbagumba la nyangwa, a tlhela a huma hi ndlela leyo.

⁴Zonake i lo nzi yisa mahlweni ka yindlu hi ndlela ya nyangwa ya tlhelo ga Nwalungu, nzi lo wona a kungangamela ka Jehova na ku tatile a yindlu ya Jehova. Nzi lowa hasi nghoheni ya mina.

⁵Jehova aku ka mina: Nʼwana wa munhu, xiyisisa u wona hi mahlo ya wena, uzwa hi tindleve ta wena zontlhe lezi nzi ta nga ku byela xungetano hi milayo yontlhe ya yindlu ya Jehova, ni zileletelo zontlhe za yona; u xiyisisa khwatsi lezi va enghenisisako zona lomu ndlwini hi tinyangwa tontlhe ta wutshamu ga kubasa.

⁶U ta wula ka vahluwukwa, va nga va yindlu ya ka Israeli lezaku Hosi Jehova i ngalo: Nwina yindlu ya ka Israeli, mu nga ha engeti a manyalataniso wontihe ya nwina, [131]

⁷hakuva mu enghenisile a vamatiko, va nga makhuna timbilwini ni nyameni, a kuva ndlwini ya mina ya kubasa, va yi nyenyezisa laha mu nyikelako a mafura ni nkhata zi nga kuga ka mina; mu tshovile a xivumelwano xa mina hi manyalataniso ya kunghahi. [132]

⁸A mu hlayisangi a zibya za mina zi basileko nwina wutsumbu, kanilezi mu yimisile vanwani akuva va tira mitiro ya wutshamu ga mina ga kubasa.

⁹Hosi Jehova i ngalo: A ku na wamatiko xikari ka vanana va ka Israeli, loyi a nga khuna mbilwini ni nyameni, a ta nga enghena wutshanwini ga mina ga kubasa.

¹⁰Kanilezi a va ka Levi lava va nzi fulareleko a xikhati lexi a va ka Israeli va nga wa pengile, va lanzela a zifananiso zabye, va ta rwala zigoho zabye,

¹¹va ta maha malanza ntsena wutshanwini ga mina ga kubasa, va rinzela a tinyangwa ta yindlu ni ku tira lomu ndlwini; va ta tlhava a minyikelo ya kuhiswa ni miphahlo ya vanhu, va ta yima mahlweni kabye va va tirela.

¹²Hakuva va lo va tirela mahlweni ka zifananiso zabye, vave a xikhunguvanyiso xo biha ka yindlu ya ka Israeli; hikwalaho nzi lo hlambanya hi ku tlakusa a canja ga mina, ku wula Hosi Jehova, lezaku va ta rwala a zigoho zabye.

¹³Va nga ta tshinela ka mina, a ku ta tira a ntiro wa wupristi, ge hambu ni ku khumba a zibya za mina zo basa a wutshanwini gi hunzeleleko ku basa. Kanilezi va ta rwala a tingana tabye ni manyalataniso yabye lawa va ma mahileko. [133]

¹⁴Nzi ta va maha varinzeli va yindlu, va tira a ntiro wa malanza kona; ni zontlhe lezi zi faneleko ku tiriwa lomo.

¹⁵Kanilezi a vapristi va ka Levi, va nga vana va Zadoke, lava va nga hlayisa a ntiro wa wutshamu ga mina ga kubasa, a xikhati lexi a vanana va ka Israeli va nga nzi fularele, va ta tshinela mahlweni ka mina a ku ta nzi tirela; va ta yima mahlweni ka mina va nzi humesela a mafura ni nkhata, ku wula Hosi Jehova.

¹⁶Va ta enghena wutshanwini ga mina ga kubasa, va tshinela mezeni ya mina va nzi tirela, va tatisa tifanelo tontlhe.

¹⁷Loku va enghena tinyangweni ta hubye ya lomu xikari va ta ambala a tinguwo ta wukene, va nga ambali a tinguwo ta woya laha na va tira le tinyangweni ta hubye ya lomu xikari ni lomu ndlwini. [134]

¹⁸Va ta ambala zihuku za wukene tihlokweni tabye, va boha mabhuluku ya wukene lomu ziwunwini zabye; va nga ta ambala ni nguwo yinwe yi dzunukisako.

¹⁹Loku va huma vaya ka hubye ya lehandle, yi nga hubye ya vanhu, va ta tlhatlha a tinguwo tabye leti va nga ambele ntirweni, va ti siya lomu matsawini ya kubasa, va boha tinwani tinguwo kasi va nga basisi vanhu hi tinguwo tabye.

²⁰Va nga ta halula a tihloko tabye, ge hambu a ku tsika misisi yabye yi leha; va ta hungulela ntsena a misisi ya tihloko tabye.

²¹A ku na mupristi ni munwe a ta nganwa vinya loku a enghena hubyeni ya lomu xikari.

²²Va nga teki tinoni a kuva vasati vabye, ge hambu ni wasati a tsikilweko. Kanilezi va ta teka a vanhwana va lixaka la ka Israeli, kutani a noni yi nga hi sati wa mupristi. [135]

²³Va ta gonzisa a vanhu va mina a kuhambana ka zilo za kubasa ni za nyalidede, va va maha va tiva a zivi ni zilo zi hlazekileko.

²⁴Va ta maha valamuli va timhaka, va lamula maringano ni milayo ya mina. Va ta hlayisa a zileletelo za mina ni ziyimiso za mina mibuzweni ya mina yontlhe; va ta basisa a masabado ya mina. [136]

²⁵Va nga ta ti nyenyezisa hi ku khumba zirumbi; kanilezi a mupristi a nga khumba a xirumbi xa raru wakwe, ni nyine wakwe, ni nʼwana Wakwe, ni nhanyana wakwe, ni nakulobye, ni makabye loyi a kalako a nga se tekwa,

²⁶Anzhako na a basisilwe, i ta engetelwa a ntlhanu wa masiku ni mambiri.

²⁷A siku lego a ta ngaya wutshanwini ga kubasa, a hubyeni ya lomu xikari, a ku ya khozela wutshanwini ga kubasa, i ta nyikela a munyikelo wa kuonha, ku wula Hosi Jehova.

²⁸Va tava ni tshomba, a tshomba yabye hi mina. Mu nga va nyiki tiko lomu tikweni ga Israeli, a tiko gabye hi mina. [137]

²⁹Va taga a minyikelo ya tinzhoho, ni miphahlo ya kuonha ni ya milanzu; zontlhe a zilo zi yilisilweko ka Israeli zi tava zabye.

³⁰Leʼza chukwana za mihanzu yontlhe yo ranga, ni minyikelo yontlhe yi nyikwako Nungungulu yi tava ya vapristi. Kambe mu ta nyika vapristi a mapa ya nwina yo ranga, kasi ku tisa makatekwa ndlwini ya wena. [138]

³¹A vapristi va nga taga a nyama ya xihari xi ti feleko, hambu leyi yi tobyilweko, na nga kuva xinyanyani kutani xifuyo.