Read tshwa Ezekieli 6 Bible Online

Ezekieli 6 - tshwa bible

Ezekieli 6

¹A gezu ga Jehova gi lota ka mina, giku:

²Nʼwana wa munhu, cuwuka ngomama ni zitsunga za ka Israeli, u profeta ha zona, uku:

³Nwina zitsunga za ka Israeli, zwanani a gezu ga Hosi Jehova! Hosi Jehova wa wula ka zitsunga ni miganga, ka milonga ya mati ni mikova, aku: Mina nzi ta mu nehela a supado, nzi ta hahlula a matshamu ya nwina yo tlakuka.

⁴A maganzelo ya nwina ma ta maha marumbi, ni zifananiso za nwina za gambo zi ta khungumulwa; a zirumbi za nwina nzi ta hoxa mahlweni ka zifananiso za nwina. [10]

⁵Nzi ta veka a zirumbi za vana va ka Israeli mahlweni ka zifananiso zabye, nzi hangalasa a marambu ya nwina laha maganzelweni ya nwina.

⁶Kontlhe lomu mu akileko kona, a miti ya nwina yi ta maha marumbi, ni matshamu ya nwina ma tlakukileko ma ta khungumulwa; kasi a maganzelo ya nwina ma hahluliwa, ni zifananiso za nwina zi fayetelwa zi mbhela, a zifananiso za nwina za gambo zi ta khungumulelwa, ni yontlhe a mitiro ya nwina yi fuvisiwa.

⁷Lava va delweko va tawa xikari ka nwina, kasi ma fela ku zi tiva lezaku hi mina Jehova.

⁸Ahembalokoke, nzi ta siya a misalela leyi yi ta nga pona a supado xikari ka matiko laha mu ta nga hangalaka xikari ka wona.

⁹Lava va ta nga huluka Xikari ka nwina, va ta nzi alakanya matikweni lawa va ta nga yiswa kona wukhumbini, laha na nzi tshovile a timbilu tabye leti ti nga tsumbekangiko, leti ti sukileko ka mina; ni mahlo yabye lawa ma mbilukelako a zifananiso zabye. Va ta ti nyenya wutsumbu gabye hi kota ya kubiha loku va ku mahileko ka wontihe manyalataniso yabye. [11]

¹⁰Va ta zi tiva lezaku nzi mina Jehova, ni lezaku a nzi wulangi mahala loku nzite nzi ta va mahela legi khombo.

¹¹Hosi Jehova i ngalo: Phakatela mandla, u ganyetela hi mikonzo ya wena, uku: Ehe! hi kota ya manyalataniso wontihe ya yindlu ya ka Israeli; hakuva va tafa hi supado, ni ndlala, ni ntungu.

¹²Loyi a nga le kule i ta dawa hi ntungu; loyi a nga kusuhani i tafa hi supado; loyi a ta nga sala a vimbezelwa, i ta dawa hi ndlala. A zanga ya mina yi ta tatisekisa lezo hehla kabye.

¹³Nwina mu ta zi tiva lezaku nzi mina Jehova, laha a vanhu vabye va delweko va mbambamela xikari ka zifananiso zabye, ni lomu matlhelweni ya maganzelo yabye, ni ka miganga yontlhe, ni lomu hehla ka zitsunga, ni lomu hasi ka tisinya to nyuka, ni hasi ka tisinya tontlhe ta mikuhlu, laho va nga mahela kona a minyikelo yo nuhela ka zontlhe zifananiso zabye.

¹⁴Nzi ta nawuluta a woko ga mina hehla ka vona, nzi hahlula tiko gabye gi maha xiwula, gi hunza a xiwula xa Dibla, a ka gontlhe wuakelo gabye. Va ta zi tiva lezaku nzi mina Jehova.