Read tshwa Danieli 10 Bible Online

Danieli 10 - tshwa bible

Danieli 10

¹Hi lembe ga wunharu ga kufuma ka Kurusi a hosi ya le Persia, a mhaka yi lo kombisiwa ka Danieli loyi a vito gakwe a nga hi Beltexazzare; a mhaka leyi yi tiyile, yi komba a khombo ga hombe. I lo xiyisisa a mhaka leyo, a pima khwatsi a muwoniso wa kona.

²A masikwini lawa mina Danieli nzi wa maha hlomulo maviki manharu.

³Nzi wa ngagi kuga ko nanziha, a nyama ni vinya a zi na nga enghena nonwini wa mina, ge hambu ku ti tota kala ma mbhela maviki lawo ya manharu.

⁴Hi siku ga 24 ga hweti yo sangula, na nzi hi laha mbhirini ya congo wa hombe wu vitwako Hiddekeli,

⁵nzi lo tlakusa a mahlo ya mina, nzi wona a wanuna loye a nga ambele tinguwo ta wukene, na a bohile tinyonga takwe hi bhandi ga nzalama ya le Ufazi. [24]

⁶A miri wakwe wu wa fanana ni krisolite, a nghohe yakwe yi wa hatima kukotisa xingwalangwanza, a mahlo yakwe ma ku khwatsi zihlahle zi vurako, a mawoko yakwe ni milenge yakwe zi wa ku khwatsi i suku wu kutlilweko, a gezu gakwe loku a wulawula gi wa ringana ni guwa ga xidlemo xa hombe.

⁷Hi mina Danieli nzoce nzi nga wona muwoniso lowu, hakuva a vavanuna lava nzi nga hi navo a va wu wonangi; va wa khomilwe hi kuchava ka hombe, va tsutsuma va ya fihlala. [25]

⁸Nzi wa sele nzoce nzi wona a muwoniso lowu wa hombe, nzi lo mbhela ntamu, a nghohe ya mina yi lo hunzuka hi kudzuka, nzi nga ha hi na ntamu.

⁹Hambulezo nzi lozwa pfumawulo wa timhaka takwe. Ni laha nzi nga wuzwa nzi lowa hi nghohe ya mina lahasi nzi titivala.

¹⁰Nzi lo khumbiwa hi canja, legi gi nga nzi khizamisa hi madzolo ya mina ni mandla ya mina.

¹¹Aku ka mina: Danieli, wena wanuna a ranzekako nguvu, pima a timhaka leti nzi ku byelako u yima uku tseka, hakuva nzi rumilwe ka wena makunu. Na a wulile lezo ka mina, nzi lo yima na nzi dzevatana.

¹²Zonake aku ka mina: Danieli, u nga chavi, hakuva kusukela a siku go ranga legi a mbilu ya wena yi nga pika ku pimisisa ni ku ti tsongahata mahlweni ka Nungungulu wa wena, a timhaka ta wena ti zwilwe; nzi tile hi kota ya timhaka ta wena.

¹³Kanilezi a hosana ya mufumo wa Persia yi lo nzi tsimbeta 21 wa masiku, kanilezi Mikaeli, a yinwe ya tihosana ta hombe, ata a ta nzi vuna; nzi wa nga ha laveki laho zinwe ni tihosi ta Persia. [26]

¹⁴Makunu nzi tile ku ta ku byela lezi zi ta nga maheka ka tiko ga wena masikwini yo gumesa, hakuva muwoniso wa masiku ya le kule.

¹⁵Na ha wulawula ka mina a timhaka leto, nzi lo cuwuka lahasi nzi si maha mbeveve.

¹⁶Languta a wo kari a fananako ni vana va vanhu i lo khumba a milomu ya mina; zonake nzi lo vulula a nomu wa mina nzi wulawula ka loyi a nga yimile mahlweni ka mina, nziku: Hosi yanga, a muwoniso lowu wu nzi bayisile, laha kaku a nza ha hi na ntamu.

¹⁷Hakuva a nanza ga hosi ya mina gi nga wulawulisa kuyini ni hosi ya mina? Hakuva nzi mbhelile ntamu, a nzi zi koti ku hefemula.

¹⁸Zonake nzi lo khumbiwa kambe hi loyi a fananako ni munhu, a nzi tiyiseta,

¹⁹aku: U nga chavi, wena wanuna a ranzekako nguvu! A kurula akuve na wena, tiyisa mbilu, kunene, tiyisa mbilu! Laha a nga wulawula na mina nzi lo kuma ntamu, nziku: Wulawula hosi yanga, hakuva u nzi nyikile ntamu.

²⁰Zonake yena aku: Wa zi tiva lezi nzi teleko zona ka wena ke? Nza tlhela makunu a ku yalwa ni hosana ya Persia. Ni loku nzi hetile a hosana ya maGreki yi tata.

²¹Kanilezi nzi ta ku byela lezi zi tsalilweko bhukwini ga zinene. A nga kona a nzi vunako kulwa ni lavaya, ahandle ka Mikaeli a hosana ya nwina.