Read tshwa Danieli 2 Bible Online

Danieli 2 - tshwa bible

Danieli 2

¹Hi lembe ga wumbiri ga kufuma ka Nebukadnezzare, yena i lo lora miloro leyi a moya wakwe wu nga karateka ha wona, a vumala ni wurongo.

²Zonake a hosi yi lo vitana a tinʼanga ni zitumbe ni vangoma ni titlhari, kasi ku ta tlhamusela a hosi a miloro ya yona. Zinghaho va lota va ta yima mahlweni ka hosi. [2]

³A hosi yiku ka vona: Nzi lorile, makunu a moya wa mina wa karateka hi ku lava ku tiva a noro lowu.

⁴Zonake a titlhari tiku ka hosi hi xiSiria: Hosi, hanya kala kupinzuka! Byela malanza ya wena a noro, hi ta wu tlhamusela.

⁵A hosi yi lo hlamula yiku ka titlhari: Nzi tiyisile ku ngalo: Loku mu nga nzi byeli a noro lowo ni tlhamuselo wa kona, mu ta phaphulelwa, a tiyindlu ta nwina ti mahiwa matala.

⁶Kanilezi loku mu nzi hlawutela a noro ni tlhamuselo wa kona, nzi ta mu nyika zinyikiwo ni nchachazelo ni wudzunzo ga hombe. Hikwalaho nzi hlawuteleni a noro lowo ni tlhamuselo wa kona.

⁷Va lo hlamula khati ga wumbiri, vaku: A hosi ngha yi byela malanza ya yona a noro, zonake hi ta wula a tlhamuselo wa kona.

⁸A hosi yiku: Nza zi tiva khwatsi lezaku mu lava ku engetelwa xikhati, hi kota ya lezi nzi zi tiyisileko.

⁹Kanilezi loku mu nga nzi byeli a noro, i nayo munwe wu mu yimeleko; hakuva mu polile mawunwa ni timhaka ta hava kasi ku nzi byela zona, na mu tsumba lezaku a zikhati zi ta hunzuka. Hikwalaho nzi hlawuteleni a noro, zonake nzi ta zi tiva lezaku ma zi kota ku wula a tlhamuselo wa kona.

¹⁰A titlhari tiku ka hosi: A nga kona ni munwe laha misaveni a nga zi kotako ku tshawutela a timhaka ta hosi; kambe a ku na ngava kona a hosi hambu loku yi hi ya hombe ni ya ntamu, yi nga nga wutisa a mhaka ya kunghahi ka tinʼanga, kutani ka vangoma, hambu ka titlhari.

¹¹I mhaka yo tsanza leyi yi labyiwako hi hosi, a ku na munhu a nga yi hlawutelako ka hosi, ahandle ka vanungungulu lava va nga tshamiko xikari ka vanhu.

¹²Kwalaho a hosi yi lo zangara nguvu, yi ruma lezaku ti dawa tontlhe a titlhari ta le Babuloni.

¹³Laha ku nga biwa nyiwo lezaku a titlhari a ti dawe, va lo lava na Danieli ni vanghana vakwe a kuva va dawa.

¹⁴Zonake Danieli i lo wulawula hi wusungukati ni kutlhariha na Arioki, a nduna ya vanyakasani va hosi, loyi a nga humele a ku ya daya a titlhari ta Babuloni;

¹⁵aku ka Arioki a nduna ya hosi: Hikuyini a hosi yi bileko a nyiwo ya tihanyi? Zonake Arioki i lo tlhamusela a mhaka ka Danieli.

¹⁶Danieli i lo enghena a kombela hosi lezaku yi mu nyika a xikhati xa ku ta yi tlhamusela.

¹⁷Zonake Danieli i loya ndlwini yakwe, a ya tivisa a vanghana vakwe Hanania na Mixaeli na Azaria a mhaka,

¹⁸lezaku va kombela a wuxinji ga Nungungulu wa le tilweni xungetano ni fihlakalo lowu, kasi Danieli ni vanghana vakwe va nga lobyiswi zinwe ni titlhari tinwani ta Babuloni.

¹⁹Zonake a fihlakalo wu lo wonekeliswa ka Danieli hi muwoniso wa wusiku. Danieli-ke a khesa Nungungulu wa le tilweni,

²⁰aku: A gi khesiwe a vito ga Nungungulu kala kupinzuka, hakuva a wutlhari ni ntamu zi hi zakwe.

²¹Hi yena a hunzulusako a zikhati ni tinguva; i susa tihosi ni ku ti yimisa; i nyika wutlhari ka titlhari ni wutivi ka vanhu va pimisisako.

²²Wa dlunyatisa lezi zi etileko ni mifihlakalo; wa tiva leʼzi nga munyameni, ni kuwonekela ku zinwe naye. [3]

²³Nza ku bonga, nzi ku dumisa wena Nungungulu wa vadadani va mina, hilezi u nzi nyikileko wutlhari ni ntamu, u nzi vululele lexi hi nga ku kombela ha xona; hakuva u hi tivisile a mhaka ya hosi.

²⁴Zonake Danieli i loya ka Arioki, loyi a hosi yi nga mu rumile ku ya daya a titlhari ta Babuloni, a yaku kakwe: U nga dzuki u daya a titlhari ta Babuloni! Nzi yise hosini, nzi ta ya yi tlhamusela a noro.

²⁵Arioki i lo yisa Danieli le hosini hi xihatla, a yaku ka yona: Xikari ka tikhumbi ta ka Juda nzi kumile munhu loyi a zi kotako ku byela hosi a tlhamuselo wa noro.

²⁶A hosi yiku ka Danieli, loyi a nga chulilwe a vito ga Beltexazzare: Wa zi kota a ku nzi hlawutela a noro lowu nzi nga lora, ni tlhamuselo wa kona ke?

²⁷Danieli i lo hlamula aku ka hosi: A fihlakalo lowu a hosi yi wu lavako a wu na ku hlawutelwa hi titlhari ni vangoma ni vavumbi.

²⁸Kanilezi i kona Nungungulu le tilweni loyi a tsetsulako a mifihlakalo, hi yena a tivisileko hosi Nebukadnezzare lezi zi ta nga maheka masikwini ma ha tako. A noro wa wena ni miwoniso leyi u yi wonileko sangweni ga wena, hi lezi:

²⁹Na u hi sangweni ga wena hosi, u lo telwa hi maalakanyo ya lezi zi ta nga maheka xikhatini za ha tako. Loyi a tsetsulako mifihlakalo i ku kombisile lezi zi ta nga maheka.

³⁰Kasike mina a hiku nzova ni wutlhari go hunza ga vontlhe lava va hanyako loku a fihlakalo lowu wu wonekelisilwe ka mina, kanilezi a xigelo hikuva a tlhamuselo wu tibyiwa hi hosi, kasi wa pimisisa a maalakanyo ya mbilu ya wena.

³¹Wena hosi, u lo wona a xifananiso xa hombe na xi yimile mahlweni ka wena. A xifananiso lexi xi wa hi xa hombe nguvu, ku wa hunzeleta a kuhatima ka xona, ni dzumba ga xona gi wa chaviseka.

³²A xifananiso lexi a hloko ya xona yi wa hi ya nzalama yi hlutilweko, a xifuva ni mawoko ya xona zi wa hi za siliva, a rumbu ni matshambukulu ya xona zi wa hi za suku;

³³a milenge ya xona yi wa hi ya xiketse, a mikonzo ya xona yi wa hi ya xiketse xi vuvilweko ni wumba.

³⁴Na wa ha xi cuwukisa, ku lo lemuka a ribye, na ku nga hi mandla ya munhu, gi ta wela hehla ka mikonzo ya xona, leyi ya xiketse xi vuvilweko ni wumba, gi yi fayetela fufanyi.

³⁵Zonake a xiketse, ni wumba, ni suku, ni siliva, ni nzalama zi lo fayetelwa zinwe, ziku khwatsi muhungu laha xihulweni xa ximumu. A mheho yi lo zi kukuleta lezaku zi nga ha kumeki. A ribye legi gi ngaba a xifananiso gi lo maha a xitsunga xa hombe, gi tatisa a misava yontlhe.

³⁶Hi noro wa kona lowo; makunu hi ta byela hosi a tlhamuselo wa wona.

³⁷Wena hosi u hosi ya tihosi, loyi a Nungungulu wa le tilweni a mu nyikileko a kufuma, a wukulu, ni ntamu, ni wudzunzo.

³⁸Ni kwihi laha a vanana va vanhu va akileko, a zihari za khwati ni tinyanyani ta tilo i zi vekile mandleni ya wena, a ku nyika ku fumela zona zontlhe. Hi wena a hloko ya nzalama.

³⁹Anzhako ka wena ku ta huma wunwani mufumo wa wutsongwani ka lowu wa wena, ni wunwani wa wunharu wa suku, lowu wu ta nga fumela misava yontlhe.

⁴⁰A mufumo wa wumune wu tava wa ntamu ku fanana ni xiketse, hakuva a xiketse xi tshova xi fayetela zontlhe; khwatsi hilezi a xiketse xi fayetelako zontlhe zinwani, wonawu wu ta tshoveletela wu fayetela.

⁴¹Wu tava mufumo wu avanyisilweko, kota lezi u nga wona a mikonzo ni titiho ta kona, a xipanze xa zona i wumba, a xipanze xinwani xiketse. Kanilezi wu tava ni ntamu wo fanana ni wa xiketse, hakuva u wonile a xiketse xi patsiwa ni wumba.

⁴²Lezi a titiho ta mikonzo ti nga hi ta xiketse xi patsilweko ni wumba, zinghaho a mufumo lowu wu tava wa ntamu, kanilezi a ginwani tlhelo wu tava ni gome.

⁴³A xiketse lexi u xi wonileko na xi patsene ni wumba, tixaka ta vanhu ti ta nga tlhanganyiswa hi kutekana; kanilezi va nga ta bohana, khwatsi hi xiketse ni wumba zi nga namarelanangiko.

⁴⁴A masikwini ya tihosi leto, Nungungulu wa le tilweni i ta vuxa a mufumo wu to kala wu nga lobyiswi, ni wuhosi ga wona cima gi nga ta nyikelwa ka ginwani tiko. Wu ta panza wu lovisa yontlhe mifumo leyi, wona wu ku tsonzoma kala kupinzuka. [4]

⁴⁵Lezi za komba a ribye legi u nga gi wona na gi lemuka laha xitsungeni, gi ta fayetela a xiketse, ni suku, ni wumba, ni siliva, ni nzalama. A Nungungulu wa hombe i tivisile hosi lezi zi ta nga maheka anzhako ka lezi. A noro wu tiyisile, ni tlhamuselo wa wona wu wula zinene.

⁴⁶Zonake hosi Nebukadnezzare i lowa hi nghohe yakwe, a khizamela Danieli, a leletela lezaku va mu phahlela ni ku mu hisela tibani. [5]

⁴⁷A hosi yiku ka Danieli: Hakunene, a Nungungulu wa nwina i Nungungulu wa vanungungulu ni Hosi ya tihosi; mutsetsuli wa mifihlakalo, kota lezi u zi kotileko ku tlhamusela a fihlakalo lowu.

⁴⁸Zonake a hosi yi lo kulisa Danieli, yi mu nyika a zinyikiwo za hombe, yi mu maha mufumeli wa tiko gontlhe ga Babuloni, yi tlhela yi mu maha a nduna ya titlhari tontlhe ta Babuloni.

⁴⁹Danieli i lo kombela ka hosi lezaku a yimisa Xadrake, Mexake, na Abed-nego akuva varangeli va tiko ga Babuloni; kanilezi Danieli i lo sala lomu hubyeni ya hosi.