Read tshwa Danieli 6 Bible Online

Danieli 6 - tshwa bible

Danieli 6

¹Dariusi i lo zi wona na zi sasekile akuva a yimisa a 120 wa tihosana mufunweni wakwe wontihe.

²Hehla ka tona i lo yimisa a tinduna tinharu, leti Danieli a nga hi yinwe ya tona, lezaku a tihosana ti ta nyika mibiko ka tona tinduna, kasi hosi yi nga kanganyiswi hi nchumu.

³Na Danieli i wa hunza tontlhe tinduna ni tihosana, hakuva i wa hi ni moya wunene; ni hosi yi lo alakanya a ku mu yimisa hehla ka wontihe mufumo.

⁴Makunu a tinduna ni tihosana ti lo lava a xigelo xo bihisa Danieli ntirweni wa mufumo, kanilezi a va kumangi mhaka hambu ni nanzu; hakuva i wa tsumbekile, ku wa nga hi na xihoxo hambu xihoheto xi nga kumiwa kakwe.

⁵A vavanuna lavo vaku: Hi nga ta kuma mhaka yo kecara ha yona Danieli loku hi nga yi kumi nayweni wa Nungungulu wakwe.

⁶Hikwalaho a tihosana ni tinduna ta kona ti lo tsombana le hosini, vaku ka yona: Hosi Dariusi, hanya kala kupinzuka!

⁷A tinduna tontlhe ta mufumo, a vatongi ni tihosana, a masungukati ni vamwamangulu, va tlhangene va boha xikungo xaku a hosi ngha yi yimisa a nayo wu tiyileko, waku ni wihi a ta nga kumiwa na a khongela ka nungungulu munwani, kutani ka munhu munwani xikari ka 30 wa masiku, ahandle ko khongela ka wena hosi, i ta hoxwa nkeleni wa tinghala.

⁸Makunu wena hosi, tiyisa nayo lowu hi vito ga wena, lezaku wu nga hunzuki, kukotisa a nayo wa maMedi ni maPersia lowu wu nga zi kotiko ku hunzuluswa.

⁹Hikwalaho hosi Dariusi i lo tiyisa a nayo ni tsimbetelo hi vito gakwe.

¹⁰Laha Danieli a ngazwa lezaku a nayo wu tiyisilwe, i loya ndlwini yakwe, laha a tinjhanela ta kwaruto yakwe ya le hehla ti nga vululwe ngomama ni Jerusalema, a khizama hi madzolo a khongela makhati manharu hi siku, na a bonga Nungungulu wakwe khwatsi hi zikhati zi hunzileko. [13]

¹¹Zonake a vavanuna va lo tsutsuma va ya kuma Danieli a khongela ni ku koxa mahlweni ka Nungungulu wakwe.

¹²Zonake va lo enghena va wulawula ni hosi xungetano ni nayo lowu yi wu yimisileko, vaku: Kasi a ku yimisangi a nayo lowu wu nge ngalo: Ni wihi munhu loyi a ta nga kumiwa na a khongela ka nungungulu munwani, kutani ka munhu munwani xikari ka 30 wa masiku, ahandle ko khongela ka wena hosi, i ta hoxwa nkeleni wa tinghala ke? A hosi yi lo hlamula yiku: I mhaka yi tiyileko leyo, kukotisa hi nayo wa maMedi ni maPersia lowu wu nga zi kotiko ku hunzuluswa.

¹³Zonake vaku ka hosi: Kanilezi Danieli loyi a nga munwe wa tikhumbi ta ka Juda, a nga ku khataleli wena hosi, ge hambu a nayo lowu wena u wu yimisileko, o ti mahela mikhongelo yakwe makhati manharu hi siku.

¹⁴A hosi lokuyi zwile a mhaka leyi yi lo tsanwa nguvu, yi lo alakanyela lezi yi nga tlhatlhisisako zona Danieli. I lo tira nguvu kala gambo gi pela na lava tindlela to mu ponisa ha tona.

¹⁵Zonake a vavanuna lavo va lo enghena le hosini, vaku ka yona: Zi tiveke wena hosi lezaku i nayo wa maMedi ni maPersia waku a nayo hambu zileletelo lezi zi vekelweko hi hosi a zi na ku hunzulwa.

¹⁶A hosi yi lo rumisa lezaku Danieli a khomiwa a hoxwa nkeleni wa tinghala. A hosi yiku ka Danieli: A Nungungulu wa wena loyi u mu khozelako xontlhe xikhati ngha a ku ponisa!

¹⁷Ku lo nehiwa a ribye gi ta vekelwa laha nonwini wa nkele; a hosi yi lo gi vekela a xifungo xa yona ni zifungo za tihosana takwe, kasi ku nga hunzuluswi nchumu mhakeni ya Danieli. [14]

¹⁸Zonake a hosi yi lo tlhela ziluvelweni xa yona, yiya mbheta wusiku gontlhe na yi yila; a ku na nga yiswa vavasati mahlweni ka yona, ni wurongo yi wa nga gi kumi.

¹⁹A hosi yi lo vuka ni mpunzu, yi hatlisa yiya nkeleni wa tinghala.

²⁰Loku yi chikele nkeleni yi lo vitana Danieli hi gezu ga kukarateka, yi ku: Danieli, nanza ga Nungungulu a hanyako, a Nungungulu loyi u mu khozelako xontlhe xikhati i zi kotile ku ku ponisa tinghaleni ke?

²¹Danieli aku ka hosi: Hosi, hanya kala kupinzuka!

²²A Nungungulu wa mina i rumele a ngelosi yakwe yi ta vala milomu ya tinghala, hikwalaho a ti nzi bayisangi. Hakuva nzi kumekile nzi nga hi na nanzu mahlweni ka yena, ni le mahlweni ka wena hosi, a nzi gohangi nchumu.

²³A hosi yi lo tsaka nguvu, yi rumisa lezaku va humesa Danieli nkeleni wa tinghala. Zinghaho Danieli i lo humeswa nkeleni, a ku na nga kumiwa ni sakaveti ginwe ka yena hakuva i wa tsumbile a Nungungulu wakwe.

²⁴Zonake hi kulayiwa ka hosi ku lo nehiwa a vavanuna lava va nga ranisa Danieli, va ta hoxiwa lomu nkeleni wa tinghala, vona ni vanana vabye ni vasati vabye. Vaku va nga se chikela lehasi ka nkele, a tinghala ti va khamukela ti tshoveletela a marambu yabye wontihe.

²⁵Zonake hosi Dariusi i lo tsalela a va matiko wontihe ni tixaka ni tirimi, ka vontlhe lava va akileko laha misaveni, aku: A kurula a ku anze xikari ka nwina!

²⁶Nzaba nyiwo lezaku a matlhelweni wontihe ya mufumo wa mina, a vanhu a va rurumele va chava a Nungungulu wa Danieli. Hakuva i Nungungulu a hanyako a teku tsoma, ni mufumo wakwe a wu na magumo, ni kufuma kakwe ku ta simamisa kala kupinzuka.

²⁷Wa tlhatlhisa a ponisa, wa maha xikombiso ni zihlamaliso le tilweni ni laha misaveni. Hi yena a ponisileko Danieli ntanwini wa tinghala.

²⁸Zinghaho Danieli i lo vuvuma a kufumeni ka Dariusi ni kufumeni ka Kurusi a muPersia.