Read tshwa Danieli 7 Bible Online

Danieli 7 - tshwa bible

Danieli 7

¹Hi lembe go sangula ga kufuma ka Belxazzare a hosi ya Babuloni. Danieli na hi sangweni gakwe i lo lora na wona miwoniso. Zonake i lo tsala a noro wa kona, a hlawutela a tihloko ta wona.

²Danieli i te ngalo: A norweni wa mina wa wusiku nzi lo wona a mune wa timheho ta tilo ti huma hi ntamu hehla ka bimbi ga hombe.

³A mune wa zihari za hombe zi lo huma hi lomu bimbini, na zi nga hi zo fanana.

⁴A xo ranga xi wa fanana ni nghala, na xi hi ni tipapa ta gama. Nzi lo xi cuwuka kala a tipapa ta xona ti tsuwuliwa, xi tlakuswa misaveni, xi yitniswa hi milenge ya xona kukotisa munhu, xi nyikiwa a mbilu ya munhu.

⁵Nzi lo wona a xihari xa wumbiri xo fanana ni urso na xi yimile hi tlhelo ginwe, na xi hi ni timbambo tinharu nonwini wa xona xi ti lumile hi meno ya xona. Vaku ka xona: Suka u khadamula a nyama yo tala.

⁶Anzhako ka lezo nzi lo wona xinwani xo fanana ni yingwe, xi nga hi ni mune wa tipapa laha hlanini wa xona, xi wa hi ni mune wa tinghohe kambe. Xi lo nyikwa wuhosi.

⁷Anzhako ka lezo nzi lo wona lomu miwonisweni ya wusiku a xihari xa wumune xo tshisa, xingonzomu xa ntamu wa hombe; xi wa hi ni meno ya xiketse. Xi wa khadamula xi phura, xi ganyetela a misalela hi mikonzo ya xona. Xi wa nga fanani ni zontlhe zihari leʼzo ranga; xi wa hi ni khume ga timhonzo.

⁸Na nzi cuwuka timhonzo leto, nzi lo wona linwani la li tsongwani na li huma xikari ka leti tinwani, zonake li kunula a timhonzo tinharu leʼto ranga. A limhonzo leto li wa hi ni mahlo ya munhu, ni nomu wu nga wulawula magezu ya matshanza.

⁹Na nzi kari nzi cuwuka ku lo vekiwa zitshamu za wuhosi, a wakale ka masiku i lo tshama. A tinguwo takwe ti wa basile ku fana ni gapongo, a misisi yakwe yi wa basile ku fana ni woya gi hlazilweko ga yivu. A xitshamu xakwe xa wuhosi xi wa fana ni malangavi ya nzilo, ni maranzani ya xona ma wa hi ya nzilo wu vurako. [15]

¹⁰Ku lo huma a congo wa nzilo hi le mahlweni kakwe, a mazana ya mazana ma lo mu khozela, ni 10,000 ma wuyetilweko hi 10,000 ma lo yima mahlweni kakwe. Ku wa hi ni hubye yo lamula, ku vululiwa mabhuku. Kuv. 5:11; 20:12

¹¹Nzi wa kari nzicuwukela hi kota ya magezu ya matshanza ma nga wuliwa hi limhonzo; nzi cuwuka kala a xihari xi dawa, a miri wa xona wu lobyiswa hi ku hoxwa nzilweni.

¹²A zihari zinwani zi lo tekelwa a wuhosi ga zona, kanilezi a wutomi ga zona gi lo engetelwa a xikhati nixikhatanyana.

¹³Lomu miwonisweni ya wusiku nzi lo wona a munwe loyi a fananako ni nʼwana wa munhu na ata hi marefu ya tilo, ata ka wakale hi masiku, a yisiwa mahlweni kakwe. [16]

¹⁴I lo nyikwa kufuma, ni wukosi, ni mufumo, kasi a va matiko wontihe ni tixaka ni tirimi va fela ku mu tirela. A kufuma kakwe ka simasima, ku nga ta hunza, ni mufumo wakwe cima wu nga ta mbhetiswa. [17]

¹⁵Mina Danieli, a moya wa mina wu lo xaniseka xikari ka mina, nzi karateka hi kota ya miwoniso ya mina.

¹⁶Nzi lo tshinela ka munwe wa lava va nga yimile kwalaho, nzi mu wutisa a lisine la zontlhe lezi. I lo nzi byela a tlhamuselo wa zona, aku:

¹⁷A zihari lezi za hombe za mune, mune wa tihosi ti ta nga huma laha misaveni.

¹⁸Kanilezi a vobasa va Loyi a Hunzeleleko Kutlakuka va ta nyikwa mufumo va fuma kala kupinzuka ni kupinzuka.

¹⁹Zonake nza nga navela ku tiva lisine la xihari xa wumune xi nga wa hambene ni zontlhe zinwani, xo tshisa nguvu, xa meno ya xiketse ni zikamba za suku, lexi xi nga khadamula xi phura, xi ganyetela misalela hi mikonzo ya xona.

²⁰Nzi wa navela ku tiva kambe hi timhonzo ta xona ta khume, ni limhonzwana leli li nga huma xikari ka tona, kuwa tinharu mahlweni ka lona, na li hi ni mahlo ya munhu ni nomu wu nga wulawula magezu ya matshanza, na li hi ni ntamu ku hunza vanghana va lona.

²¹Nzi lo wona a limhonzo lelo na hiwa ni vobasa, li va hlula,

²²kala ata leyi wakale hi masiku, a ta lamulela a vobasa va Loyi a Hunzeleleko Kutlakuka; ku lo chikela a xikhati lexi a vobasa va nga hiwa mufumo.

²³I te ngalo: A xihari xa wumune wu tava mufumo wa wumune laha misaveni, wu ta hambana ni yontlhe mifumo, wu ta khadamula misava yontlhe wu yi kanzihelele wu yi phurusela.

²⁴A khume ga timhonzo ku wulwa a khume ga tihosi ti ta nga huma mufunweni lowu; ku wuya ku huma yinwani anzhako ka tona, yo hambana ni leʼto ranga, yi ta tsongahata a tihosi leti ta tinharu. [18]

²⁵I ta wulawula magezu yo vukela Loyi a Hunzeleleko Kutlakuka, a xanisa a vobasa va Loyi a Hunzeleleko Kutlakuka. I ta xuva ku hunzula a masiku ma basileko ni nayo; a vobasa va ta nyikelwa mandleni yakwe hi xikhati ni zikhati ni khihlanya ga xikhati.

²⁶Kanilezi a lamulelo wu tata, i ta tekelwa mufumo wakwe, wu hahlulwa wu lovela magumo.

²⁷A mufumo ni ntamu ni wukulu ga mifumo yontlhe lahasi ka tilo zi ta nyikiwa a tiko ga vobasa va Loyi a Hunzeleleko Kutlakuka. A mufumo wakwe ngwa simasima, a matiko wontihe ma ta mu tirela ma mu ingisa.

²⁸Hi wona magumo ya timhaka. Makunu mina Danieli nzi lo karateka maalakanyweni ya mina, a nghohe ya mina yi hunzuka; kanilezi nzi lo hlayisa timhaka leti mbilwini ya mina.