Read tshwa Danieli 8 Bible Online

Danieli 8 - tshwa bible

Danieli 8

¹Hi lembe ga wunharu ga kufuma ka hosi Belxazzare, mina Danieli nzi lo wona muwoniso anzhako ka lowu wo ranga.

²A muwonisweni lowu nzi waku khwatsi nzi le Xuxani, xi nga xiluvelo xa hosi lomu tikweni ga Elami, nzi wona muwoniso na nzi hi laha Congweni wa Ulai.

³Nzi lo tlakusa a mahlo ya mina, nzi wona a hamba yi nga hi ni timhonzo timbiri na yi yimile mahlweni ka congo. A timhonzo leti timbiri ti wa lehile, kanilezi a linwe li wa lehile ku hunza linwani, na li kulile nzhako ka leli lo koma.

⁴Nzi lo wona a hamba leyi na yi dumela tlhelo go Muhlwa-gambo ni le Nwalungu ni le Dzongeni. Ku wa hi hava xihari xi nga yi tiyela, ge hambu munhu loyi a nga zi kota ku ponisa ntanwini wa yona. Kanilezi yi wa maha ni xihi hi kuranza ka yona, yi ti kulisa.

⁵Makunu na nza ha yi cuwukela, nzi lo wona a mhongo na yita hi Muhlwa-gambo yi tsemakanya misava yontlhe, kanilezi yi wa nga kanziheli lahasi. A mhongo leyi yi wa hi ni: limhonzo la hombe laha xikari ka mahlo ya yona.

⁶Yi lota ka hamba leyi yi nga hi ni timhonzo timbiri nzi yi wonileko na yi hi le mahlweni ka congo, yita hi ku yi dumela hi kuleva ka ntamu wa yona.

⁷Nzi lo yi wona na yi tshinela ka hamba na yi zangarile nguvu, yi yi dlina, yi tshova a timhonzo ta yona ta timbiri, kasi a hamba yi nga hi na ntamu wo yimekelana nayo. Yi lo wisa a hamba lahasi yi yi kanzihelele; ku wa nga hi kona ni munwe a nga zi kota ku ponisa a hamba ntanwini wa yona.

⁸A mhongo yi lo maha mitiro ya hombe, kanilezi laha yi nga kumile ntamu wa hombe, a limhonzo lelo la hombe li lo tshoveka. Wutshanwini ga lona ku lo mila mune wa timhonzo to leha, ti kula ti cuwukana ni mune wa matlhelo ya tilo.

⁹Laha ka linwe la tona ku lo mila a limhonzwana, li nga kula li lehela tlhelo ga Dzonga ni le Muhuma-gambo ni le tikweni go saseka.

¹⁰Li lo kula kala li ya chikela yimpini ya le tilweni; zonake yi lo wisa lahasi a tinyeleti tinwani ta le hehla yi ti kanzihelele.

¹¹Ina, li lo ti kulisa ni mahlweni ka Nduna ya yimpi leyo, li yi tekela a munyikelo wa kuhiswa wa simasima, ni wutshamu ga yona ga kubasa gi lo khungumulwa. [19]

¹²A butho go kari gi lo nyikelwa ka lona zinwe ni munyikelo wa kuhiswa wa simasima hi kota ya zihambunyeto; li lo chulula a zinene lahasi, li vuvuma mitirweni ya lona.

¹³Zonake nzi lozwa a ngelosi na yi wulawula, ni yinwani ngelosi yi lo wutisa leyi yi nga kari yi wulawula, yiku: Zi ta simama masiku mangani lezi hi zi wonako muwonisweni hi tlhelo ga munyikelo wa kuhiswa wa simasima ni xihambunyeto lexi xi hahlulako, ni lezaku a wutshamu ga kubasa ni butho zi nyikelwa ku kanzihelelwa hi mikonzo?

¹⁴Aku ka mina: Ma tava 2,300 wa masiku, loku ku hlayiwa a mixo ni gambo, zonake a wutshamu ga kubasa gi ta basiswa.

¹⁵Laha mina Danieli na nzi wonile muwoniso lowu, na nzi hlota ku wu pimisisa, nzi lo wona munwe wo fanana ni munhu na a yimile mahlweni ka mina.

¹⁶Nzi lozwa a gezu na gi humela laha Congweni wa Ulai, na gi vitana, giku: Gabrieli, tlhamusela inaloyi a muwoniso lowu a wu wonileko.

¹⁷I lo tshinela laha nzi nga yimile, laha a ngata nzi lo chava, nziwa hi nghohe ya mina. Kanilezi aku ka mina: Xiyisisa, nʼwana wa munhu, hakuva a muwoniso wu xungeta a xikhati xa kugumesa.

¹⁸Laha a nga wulawula na mina, nzi lo titivala, a nghohe ya mina na yi hi lahasi. Kanilezi i lo nzi khumba a nzi yimisa.

¹⁹Aku: Nzi ta ku byela lezi zi ta nga humelela magumo ka xikhati xa zanga, hakuva a muwoniso wu xungeta a xikhati xa magumo.

²⁰A hamba leyi u yi wonileko ya timhonzo timbiri, hi tihosi ta maMedi ni maPersia.

²¹A mhongo hi hosi ya maGreki. A limhonzo leli li nga xikari ka mahlo ya yona hi hasi yo sangula.

²²A mune wa timhonzo leti ti nga mila wutshanwini ga leli li tshovekileko, ti komba mune wa mifumo yi ta nga huma tikweni lego, kanilezi na yi nga hi na ntamu wa gona.

²³A xikhatini xo gumesa xa mifumo yabye, laha a vahambunyeti va ta nga tala, ku ta huma a hosi ya nghohe yo tshisa ni ya wutlhari go tlhamusela mifihlakalo.

²⁴A ntamu wa yona wu ta kula, kanilezi na ku nga hi ntamu wa yona; yi ta hahlula hi ku hlamalisako, yi vuvuma yi maha kuranza ka yona. Yi ta lovisa tinhenha ni tiko ga vobasa.

²⁵Hi kota ya kutlhariha ka yona yi ta humelela hi mano ya yona; i ta ti kulisa mbilwini yakwe, a lovisa vanyingi lava va tshamekileko. Kambe i ta vukela a hosi ya tihosi, kanilezi i ta tshobyiwa na ku nga hi woko ga munhu.

²⁶A muwoniso lowu wu wulilweko wa mixo ni gambo ngwa lisine; kanilezi wu hlayise, hakuva ngwa masiku ma ha tako.

²⁷Makunu mina Danieli nzi lowa nzi mbhela ntamu, nzi babya masiku yo kari; zonake nzi lo vuka nzi tira mitiro ya hosi. Nzi lo hlamaliswa hi muwoniso lowu, kanilezi ku wa nga hi na munhu a nga wu pima.