Read tshwa Hosea 14 Bible Online

Hosea 14 - tshwa bible

Hosea 14

¹Israeli, tlhelela ka Jehova a Nungungulu wa wena, hakuva u wile hi kota ya kugoha ka wena. [39]

²Tekani timhaka, mu tlhelela ka Jehova, mu yaku kakwe: Susa kugoha kontlhe, u hi amukela hi wuxinji; zonake hi ta ku phahlela hi milomu ya hina wutshanweni ga tihonwana. [40]

³Assiria a nga ta hi hanyisa; hi nga ta khilele a mahaxi. Hi nga ta wula kambe ka mitiro ya mandla ya hina, hiku: Nwina mu vanungungulu va hina; hakuva a xisiwana xa kuma wuxinji ka wena.

⁴Nzi ta chuma a kutlhelela kabye nzhako, nzi va ranza hi mbilu yontlhe ya mina, hakuva a zanga ya mina yi sukile kabye.

⁵Nzi ta ku khwatsi nzi nzhokati ka Israeli; na yena i ta pfepfa ku fanana ni xitsangi, a tlhava mitsu ku fanana ni tisinya ta Lebanoni.

⁶A tiravi takwe ti ta nava, a wumbhuri gakwe gi ta fanana ni ga sinya ya oliva, ni masema ya yena ma ta fanana ni ya vinya ga Lebanoni.

⁷Lava va akileko nzhutini wakwe va ta tlhela va hluka kota mavele, va pfepfa ku fanana ni vina. A wudumo gakwe gi ta fanana ni ga vinya ga Lebanoni.

⁸Efraime, i mhaka muni nzi nga nayo ni zifananiso? Mina wutsumbu nzi mu hlamule, nzi ta mu khatalela. Mina nzi kota a sinya yo nyuka ya khuwu, a mihanzu ya wena u ta yi kuma ka mina.

⁹Himani a tlharihileko, a zi kotako ku pima lezi zilo ke? Loyi a khunguhileko i ta zi pima, hakuva a tindlela ta Jehova ti lulamile, lava va lulamileko va ta famba ha tona, kanilezi a vahambunyeti va ta khunguvanyeka ka tona. [41]