Read tshwa Hosea 2 Bible Online

Hosea 2 - tshwa bible

Hosea 2

¹Vitanani a vanakuloni, Ammi, ni vamakwenu, Ruhama.

²Khongotelani a nyine wa nwina, hakuva yena a hi sati wa mina, minawu a nzi nuna wakwe. A suse wubhayi gakwe nghoheni yakwe, ni wuoswi gakwe maveleni yakwe.

³Loku a nga mahi lezo nzi ta mu tlomulela tinguwo, a sala ximbyiri khwatsi hi siku lego a nga belekwa, nzi mu maha a fanana ni xiwula, a tiko gi omileko, nzi mu daya hi tora.

⁴Nzi nga ta hawukela a vana vakwe, hakuva i vana va wubhayi.

⁵Hakuva a nyine wabye i mahile wuoswi, loyi a va belekileko i mahile zilo za tingana. I te ngalo: Nzi ta lanzela a zigangu za mina, lava va nzi phamelako va nziha mati, va nzi nyika a woya ga tiyivu, ni wukene, a mafura ya mina ni zakunwa.

⁶Hikwalaho nzi ta vala a ndlela yakwe hi mizwa, nzi mu vekela libhingo kasi a nga ha woni tisoko takwe.

⁷I ta lanzela a zigangu zakwe, kanilezi a nga va kumi. I ta va hlota, kanilezi a nga ta va kuma. Zonake i taku: Nzi ta tlhelela ka nuna wa mina wo ranga, hakuva zi wa hi chukwana ka mina ku hunza lezi.

⁸Hakuva a nga zi tivangi lezaku nzi mu hile zakuga, ni vinya, ni mafura, nzi mu anzisela a siliva ni nzalama leyi va nga maha ha yona zifananiso za Baali.

⁹Hikwalaho nzi ta mu tekela a mavele ya mina xikhatini xa yona, ni vinya ga mina nguveni ya gona, nzi mu wutlela a woya ga mina ni wukene ga mina, lezi zi nga te ngha zi fenengetile a wumbyiri gakwe.

¹⁰Makunu nzi ta funungula a tingana takwe mahlweni ka zigangu zakwe, a nga kona a ta nga mu ponisa canjeni ga mina.

¹¹Nzi ta mbhetisa a litsako lakwe lontlhe, ni mibuzo yakwe, ni mihlakano ya kuwoneka ka hweti, ni masabado yakwe, ni tihlengeletano takwe tontlhe ta ximuse.

¹²Nzi ta hahlula a zivina zakwe, ni mikuwu yakwe leyi a nga wula ha yona, aku: Leyi i hakhelo nzi nyikilweko hi zigangu za mina. Nzi ta zi hunzula zi maha khwati, zi giwa hi zivanza za khwati. [5]

¹³Nzi ta mu tsayisa hi kota ya masiku ya maBaali, lawa a va hiseleko ho wona a libani, laha a nga ti bombisa hi zingwavila zakwe ni tinzalama takwe, a lanzela zigangu zakwe, mina a nzi rivala, ku wula Jehova.

¹⁴Hikwalaho nzi ta mu kupeta nzi mu yisa xiwuleni, nzi wulawula ni mbilu yakwe.

¹⁵Nzi ta mu tlhelisela a zivina zakwe, nzi maha a nkova wa Akora wuva a nyangwa ya kutsumba. Kwalaho i ta yimbelela khwatsi hi masikwini ya wuswa gakwe, ni kukotisa a sikwini legi a nga huma tikweni ga Gipite. [6]

¹⁶Jehova i ngalo: Hi siku lego u ta nzi vitana ku: Nuna wa mina, u nga ha nzi vitani ku: Nwinyi.

¹⁷Hakuva nzi ta susa a mavito ya maBaali nonwini wakwe, cima va nga ha ta vitanwa hi mavito kambe. [7]

¹⁸Hi siku lego nzi ta va mahela a xivumelwano ni zihari za khwati, ni tinyanyani ta tilo, ni zikokakoka za misava. Nzi ta tshova a mawura ni tisupado, nzi fuvisa yimpi laha tikweni, nzi va maha va tshama hi kurula.

¹⁹Zonake nzi ta ku teka uva wa mina kala kupinzuka; nzi ta ku teka hi kululama, ni nongameto, ni tipswalo, ni wuxinji.

²⁰Nzi ta ku teka hi kutsumbeka, na wena u ta tiva Jehova.

²¹A sikwini lego nzi ta hlamula, ku wula Jehova; nzi ta hlamula matilo, wona ma ta hlamula misava.

²²Zonake a misava yi ta hlamula a mavele, ni vinya, ni mafura, na zonawu zi ta hlamula Jezreeli.

²³Nzi ta ti byalela yena lomu tikweni, Lo-ruhama nzi ta mu zwela wuxinji, nziku ka Lo-ammi: Nwina mu vanhu va mina. Vona va taku ka mina: Wena u Nungungulu wa hina. [8]