Read tshwa Hosea 7 Bible Online

Hosea 7 - tshwa bible

Hosea 7

¹Loku nziku hi ku chuma Israeli, zonake ku woneka a zigoho za Efraime ni kubiha ka Samaria, hakuva va tira kukhohlisa. A makhamba ma enghena ni ntlawa wa vaphangi wa phanga hi lahandle.

²A va khumbuli timbilwini tabye lezaku nza alakanya a kubiha kabye. Makunu a zimaho zabye zi va ranzele, zi le mahlweni ka mina.

³Va tsakisa a hosi hi kubiha kabye, ni tihosana hi mawunwa yabye.

⁴Vona vontlhe zirembi, va ku khwatsi i njalo wu hisilweko hi mukatingi; wa tsika ku hlanganyeta a nzilo loku a vuvile mapa ma kala ma kukumuka.

⁵Hi siku ga hosi ya hina a tihosana ti lo ti babyisa hi kuhisa ka vinya; yona yi lo nawuluta a canja ga yona ka vatseketseli.

⁶Hakuva va longisile a timbilu tabye kukotisa a njalo na va kari va rinzela. A mubhiki wabye i etlela gontlhe wusiku, ni mixo a njalo wu vura khwatsi i langavi ga nzilo.

⁷Vontlhe va hisa ku fanana ni njalo, vaga a Valamuli vabye; a tihosi tabye tontlhe ti wile, ku hava ni munwe a nzi khongelako.

⁸Efraime i ti tlhanganyisile ni vamatiko; Efraime xikhekhetselo xi nga hunzuluswangiko.

⁹A vamatiko va mhhetile a ntamu wakwe, kanilezi yena nwinyi a nga zi tivi; ina, i mitile wuvu na a nga zi tivi.

¹⁰A matshanza ya Israeli ma mu ranisa; kanilezi a va se nga hunzulukela ka Jehova a Nungungulu wabye, kambe a va mu lavi.

¹¹Efraime i fanana ni tuva ga manya, gi nga hiko na kupima; va vitana a maGipite, vaya le Assiria. [19]

¹²Laha va ta nga famba nzi ta va phasa hi likoka la mina, nzi va kokela ha lona khwatsi tinyanyani ta tilo; nzi ta va tsayisa khwatsi hilezi a hlengeletano yabye yi zi zwileko.

¹³I khombo ka vona, hakuva va nzi fularele. A va lobyiswe hakuva va nzi hluwukile! Va hembile wunwa ha mina hambu lezi nzi nga va tlhatlhisile.

¹⁴A va rili ka mina hi timbilu tabye, ntsena ku keta masangweni yabye. Va tsombanela mavele ni vinya, va nzi fularela.

¹⁵Hi mina nzi nga gonzisa, nzi tiyisa mawoko yabye, kanilezi va alakanyela kubiha ha mina.

¹⁶Va tlhela, kanilezi na ku nga hi kuya ka Loyi a nga Hehla-hehla. Va fanana ni wura gi khohlisako. A tihosana tabye ti ta dawa hi supado hi kota ya tinzhukano ta tirimi tabye. Va ta hlekulwa ha zona tikweni ga Gipite. [20]