Read tshwa Hosea 9 Bible Online

Hosea 9 - tshwa bible

Hosea 9

¹Israeli, u nga bhumi hi kutsaka khwatsi hi matiko; hakuva u fularele a Nungungulu wa wena wubhayini, u ranzile a nzhiho wa wubhayi matshanwini wontihe ya kuhula.

²A masimu ni zivina zi nga ta mu gisa, ni vinya gi nga tave kona.

³Va nga ta tshama lomu tikweni ga Jehova, kanilezi Efraime i ta tlhelela Gipite, ni le Assiria va taga kuga ku nga hlazekangiko, [24]

⁴Va nga ta maha minyikelo ya vinya ka Jehova, ge hambu ku mu tsakisa hi miphahlelo yabye. A miphahlelo yabye yi taku khwatsi zibaba za xirilo, vontlhe lava va ta nga ziga va ta nyenyeziswa ha zona; hakuva a kuga kabye ku tave ko enela vona voce, zi nga ta enghena ndlwini ya Jehova.

⁵Mu ta maha yini sikwini ga gotsovanyano wa ximuse, ni sikwini ga mubuzo wa Jehova ke?

⁶Va ta panzanyeka hi kota ya lobyiselelo; Gipite i ta va tsombanyisa, Memfisi a va lahla. A zibya zabye za siliva lezi va zi ranzako zi ta fenengetiwa hi feha, ni mizwa yi ta mila matendeni yabye.

⁷A masiku ya kutsayiswa ma chikele, a masiku ya nchachazelo ma chikele! Israeli i ta zi tiva! A muprofeti i hunzukile xipumbu, a munhu wa moya i hungukile hi kota ya wunyingi ga zigoho za wena ni wukulu ga kuhluwuka ka wena.

⁸Efraime i wa hi nala a nga xiyelela Nungungulu wa mina. A muprofeti a dembelwa tizinga tindleleni takwe tontlhe, va mu venga ni lomu ndlwini ya Nungungulu wakwe.

⁹Va ti wisile kuonheni ka hombe a ku khwatsi hi masikwini ya le Gibea. I ta alakanya a zigoho zabye a vaba hi kota ya zionho zabye.

¹⁰Nzi thumbile Israeli khwatsi mauva ya lomu xiwuleni; nzi wonile a vadadani va nwina khwatsi mihanzu yo sangula ya nkuwu wa ha tewulako. Kanilezi vona va lota le Baal-peora, va ti nyikela ka nungungulu wa tingana, vave manyalataniso ku fanana ni loyi va nga mu ranza. [25]

¹¹A wukulu ga Efraime gi ta hahela kule kota xinyanyani. Ku nga tava kona kubeleka, hambu kuva ni nyimba, ge hambu ku xurwa nyimba.

¹²Hambu loku va wundla vanana, nzi ta va tekela vona, ku nga sali munhu. I khombo ka vona loku nzi va tsika.

¹³Efraime i khwatsi hilezi nzi nga wonisa zona Tire, a byalilweko wutshanwini go saseka; kanilezi Efraime i ta heleketa vana vakwe ka mudayi.

¹⁴Va nyike, Jehova! U ta va nyika yini? Va nyike a kuva va handla, ni mavele ma omileko.

¹⁵A kubiha kabye kontlhe ku le Gilgale, hakuva hi laho nzi va vengeleko kona. Hi kota ya kubiha ka zimaho zabye, nzi ta va hlongola lomu ndlwini ya mina. Nzi nga ta ha va ranza; a tihosana tabye tontlhe ta nzi vukela.

¹⁶Efraime i bilwe, a mitsu yakwe yi womile, a nga ta ha pswala mihanzu kambe. Ina, hambu loku vo pswala, nzi ta daya a mihanzu yo ranzeka ya tinyimba tabye.

¹⁷A Nungungulu wa mina i ta va hlongola, hakuva a va mu ingisangi; va tava vanyapepe xikari ka matiko.