Read tshwa Joeli 1 Bible Online

Joeli 1 - tshwa bible

Joeli 1

¹A mhaka ya Jehova yi tileko ka Joeli a nʼwana Petueli.

²Zwanani lezi nwina zikhosana! Kangatelani ndleve nwina nwentlhe vaaki va tiko! Ku na nga dzuka ku humelela a zilo za lixaka lolu masikwini ya nwina, hambu kutani masikwini ya vadadani va nwina ke?

³Zi hlawuteleni ka vanana va nwina, a vanana va nwina va zi hlawutela ka vabyewo, a vanana vabyewo ka xinwani xizukulwana.

⁴Lezi zi siyilweko hi bhanzala zi gilwe hi humbi, lezi zi siyilweko hi humbi zi gilwe hi zidodwani, ni lezi zi siyilweko hi zidodwani zi gilwe hi ziwungwani.

⁵Vukani mu rila, nwina zidakwa! Banani huwa nwina nwentlhe vanwi va vinya, hi kota ya vinya go tsombela hakuva gi susilwe milonwini ya nwina.

⁶Hakuva a mufumo wu hlasele a tiko ga mina, a mufumo wa ntamu wa vanhu va tsanzavahlayi. A meno ya wona ma fanana ni ya nghala, a makhwaha ya wona ma fanana ni ya pswele ga nghala.

⁷Wu onhile a xivina xa mina, wu kwamula mahati ya mikuwu ya mina, wu tlhatlha matluka ya yona, wu yi hangalasa lahasi; a maravi ya yona ma tshama ma basile.

⁸Rila khwatsi u nhwana a ambeleko a nguwo ya sakwa a rilelako a nuna wa wuswa gakwe.

⁹Minyikelo ya tinzhoho ni ya kunwa a ya ha hi kona ndlwini ya Jehova; a vapristi lava va nga zitiri za Jehova va rila.

¹⁰A masimu ma gohilwe, a tiko gontlhe gi le nkosini, hakuva a mavele ma gohekile, a vinya giswa gi pswhile, ni mafura ma womile.

¹¹A varimi va tsemeka hlana, ni vahlayisi va zivina vaba huwa, hi kota ya mavele ni sevada, hakuva a tshovelo wa masimu wu wonhekile.

¹²A mavina ma wunile ni mikuwu yi chomile, a sinya ya pomegranada, ni cinzu, ni sinya ya mamasa, ina ni tontlhe tisinya ta khwati ti womile: a kutsaka kontlhe ku mbhelile xikari ka vanhu.

¹³Nwina vapristi, ambalani a tinguwo ta tisakwa, mu rila; banani huwa nwina zitiri za alati; nwina malanza ya Nungungulu wa mina, etlelani gontlhe wusiku na mu ambele a tinguwo ta tisakwa, hakuva a minyikelo ya tinzhoho ni ya kunwa a za ha yiswi koha ndlwini ya Nungungulu wa nwina.

¹⁴Yimisani a siku ga kuyila, mu ramba a gotsovanyano wa ximuse. Tsombanyisani a zikhosana ni vontlhe a vaaki va tiko lomu ndlwini ya Jehova a Nungungulu wa nwina, mu rila ka Jehova.

¹⁵Yowe, a siku legi! hakuva a siku ga Jehova gi tshinele, gita kota lobyiselelo hi ka Nyamintamu.

¹⁶A zakuga a zi wutliwangi mahlweni ka hina ke? A kutsaka ni kunengela a ku fuviswangi ndlwini ya Nungungulu wa hina ke?

¹⁷A timbewu ta bola lahasi ka marukwani, a tshala a gi na nchumu, ni zigurumbu zi wile, hakuva a ku na mavele.

¹⁸A zifuyo za keta, a mitlhambi ya tihomu ti kanganyiseka, hakuva a ta ha hi na wuriselo, ni mitlhambi ya tiyivu yi le kubayisekeni.

¹⁹Jehova, nza rila ka wena, hakuva a wuriselo ga le xiwuleni gi swile, a nzilo wu hisile tontlhe tisinya ta khwati.

²⁰Ina, a zihari za khwati za keta ka wena, hikuva a mati ya micongo ma pswhileko, ni wuriselo ga lomu xiwuleni gi swile hi nzilo.