Read tshwa Joeli 2 Bible Online

Joeli 2 - tshwa bible

Joeli 2

¹Banani mpunzu le Zioni, banani tinyandayeyo xitsungeni xa mina xa kubasa! A va rurumele vontlhe vaaki va tiko, hakuva a siku ga Jehova gata, gi laha kusuhani. [1]

²I siku ga munyama ni kuphuma, a siku ga marefu ni munyama wu phumileko, gata khwatsi wuronga gi wonekako xitsungeni. Vata a vanhu va tiko ga hombe ga ntamu, legi ni kale a ku na ngava kona go fanana nago, ge hairibu ni nzhako ka gona ku nga ta kuva kona go fanana nago, kala ka malembe ni malembe ya zizukulwana.

³Va rangelwa hi nzilo wu khadamulako, ni lenzhako kabye ku na ni langavi gi hisako. Le mahlweni kabye a tiko gi fanana ni simu ga Edeni, kanilezi lenzhako kabye ku na ni xiwula; loku va hunza a ku sali nchumu.

⁴Va woneka kota mahaxi, va tsutsuma kukotisa vakhileli va mahaxi.

⁵A guwa ga kutlula tlula kabye gi fanana ni ga tikareta ta yimpi ti fambako hehla ka zitsunga, gi fanana ni guwa ga nhova yi hisako byanyi; va fanana ni vanhu va ntamu va hlomileko kulwa.

⁶Hi ku va woneni kabye a matiko ma chava, a tinghohe tontlhe ti hunzuka ti kwalala.

⁷Va tsutsuma kukotisa tinhenha, va kanziha makhurisi khwatsi vanhu va yimpi; munwe ni munwani i famba hi ndlela yakwe, na va nga hambuki.

⁸A va manyani, munwe ni munwani i famba hi ndlela yakwe; va ti susumeta hehla ka matlhari, a va tsiki tixaxa tabye.

⁹Va hangalaka mutini, va tsutsuma hi makhurisi, va enghena lomu tindlwini hi tinjhanela khwatsi makhamba.

¹⁰A misava yi rurumela mahlweni kabye, a matilo ma tsekatseka; a gambo ni hweti za pfhupeliswa, a tinyeleti ta timeka.

¹¹Zonake Jehova wa zwata a gezu gakwe mahlweni ka yimpi yakwe, hakuva a wugovelo gakwe ga hombe nguvu, hakuva i na ni ntamu loyi a mahako kulaya kakwe. A siku ga Jehova ga hombe, ga chavisa nguvu; himani a nga gi tiyelako?

¹²Kasike, hambu nyamutlha, ku wula Jehova, wuyani ka mina hi timbilu ta nwina tontlhe, ni kuyila, ni kurila, ni ku maha hlomulo.

¹³Hanzulani a timbilu ta nwina, na ku nga hi tinguwo ta nwina, mu wuya ka Jehova a Nungungulu wa nwina. Hakuva yena i na ni tipswalo ni kuhawukela, wa nonoka ku zangara na a tele hi wuxinji, wa xaniseka loku a rumele makhombo. [2]

¹⁴Himani a tivako aku kutani a nga ta tlhela a hunzuluka, a siya xikatekiso lenzhako kakwe, kasi muva ni minyikelo ya tinzhoho ni ya kunwa ka Jehova Nungungulu wa nwina ke?

¹⁵Banani a mpunzu le Zioni, mu yimisa a siku ga kuyila, mu ramba a hlengeletano ya ximuse. [3]

¹⁶Tsombanyisani vanhu, mu maha a hlengeletano yo basa; tsombanyisani a zikhosana ni zivanana ni tisana ta ha anwako. Ngha muyeni a huma nhangeni yakwe ni makoti a huma tsawini gakwe.

¹⁷A vapristi va nga malanza ya Jehova, a va rile laha xikari ka ligumbagumba ni alati, vaku: Rivalela a vanhu va wena Jehova, u nga nyikeli a tshomba ya wena a kuva yi tseketselwa, yi hlekiwa hi vamatiko. Ku ta wulelwa yini xikari ka matiko, vaku: I kwihi a Nungungulu wabye?

¹⁸Zonake Jehova i lo pangamela a tiko gakwe, a hawukela a vanhu vakwe.

¹⁹Jehova i to hlamula aku ka vanhu vakwe: Langutani, nzi ta mu rumela mavele ni vinya ni mafura, mu ta xura ha zona. Nzi nga ta ha mu maha a xiruko xikari ka matiko. [4]

²⁰Kanilezi a yimpi ya le Nwalungu nzi ta yi hlongola kule, yiya tikweni ga chuwa; a ntlawa wa yona loʼwo ranga wu taya bimbini ga Muhuma-gambo, ni wa le nzhako wuya bimbini ga Muhlwa-gambo. A kunuha ka yona ku ta hangalaka, hakuva yi mahile zilo za hombe.

²¹U nga chavi wena tiko! Tsaka u nengela, hakuva Jehova i mahile a zilo za hombe.

²²Na nwina zihari za khwati, mu nga chavi, hakuva a wuriselo ga lomu xiwuleni ga hluka; a tisinya ta pswala mihanzu, a mikuwu ni mivina za humesa a ntamu wa zona.

²³Tsakani nwina vanana va le Zioni, mu tsakela Jehova a Nungungulu wa nwina; hakuva i ta mu nyika a vula hi gi eneleko, a mu nisela a vula ya tsangela nguva ni vula ya xikubya kota kusanguleni. [5]

²⁴A magomba ma ta tala hi mavele, ni maphiso ma ta halakela a vinya ni mafura.

²⁵Nzi ta mu tlhelisela a malembe lawa ma nga giwa hi humbi, ni zidodwani, ni ziwungwani, ni bhanzala, zi nga hi yimpi ya mina leyi nzi nga yi rumela xikari ka nwina.

²⁶Mu taga mu xura, mu dumisa a vito ga Jehova a Nungungulu wa nwina, loyi a mu maheleko zihlamaliso. A tiko ga mina cima gi nga ta ha kuva ni tingana.

²⁷Mu ta zi tiva lezaku nzi lomu xikari ka Israeli, ni lezaku hi mina Jehova a Nungungulu wa nwina, ku hava munwani handle ka mina. A tiko ga mina cima gi nga ta kuva ni tingana. Nungungulu i ta chulula a Moya wakwe.

²⁸Anzhako ka lezo nzi ta chulula a Moya wa mina hehla ka nyama yontlhe; a varisanyana va nwina ni vanhanyana va nwina va ta profeta, a zikhosana za nwina zi ta lora miloro, ni majaha ya nwina ma wona ziwoniso, [6]

²⁹Nzi ta chulula a Moya wa mina kambe hehla ka malanza ya mina ya xinuna ni ya xisati masikwini lawo.

³⁰Nzi ta wonisa zihlamaliso le tilweni nilaha misaveni: a nkhata ni nzilo ni timhinga ta musi.

³¹A gambo gi ta pfhupeliswa, a hweti yi hunzuka yi maha nkhata, na gi nga se nga chikela a siku lego ga hombe go tshisa ga Jehova.

³²Ku ta maheka lezaku ni wihi a ta nga khongela vitweni ga Jehova i ta hanyiswa; hakuva le xitsungeni xa Zioni ni le Jerusalema ku tava kona lava va ponileko, khwatsi hilezi Jehova a wulileko zona, xikari ka lava va seleko ku tava ni lava va ta nga vitanwa hi Jehova. [7]