Read tshwa Joeli 3 Bible Online

Joeli 3 - tshwa bible

Joeli 3

¹Hakuva masikwini lawo, ni ka xikhati lexo nzi ta tlhelisela a vabohiwa va ka Juda ni va le Jerusalema.

²Nzi ta tsombanyisa wontlhe matiko, nzi ma yisa nkoveni wa Jehoxafate, nzi ta va ranisa hi kota ya Israeli, a vanhu va mina ni tshomba ya mina, lava va va hangalasileko xikari ka matiko, va avelana a tiko ga mina.

³Va avelene a vanhu va mina hi ku va hlahluvela; va humesa a mufana kuve a hakhelo ya xibhayi, va xava vinya hi nhanyana, va fela kunwa.

⁴I mhaka muni mu nga nayo na mina nwina Tire na Sidoni, na wena tiko gontlhe ga Filistia? Xana mu ta nzi tlhelisela ke? Loku mu lava ku ti photela ka mina, nzi ta mu tlhelisela hi xihatla hehla ka tihlolo ta nwina. [8]

⁵Lezi mu tekileko a siliva ya mina ni nzalama ya mina, mu yisa a zibya za mina za lisima lomu titempeleni ta nwina,

⁶mu tlhela mu teka ni vanana va ka Juda ni va le Jerusalema, mu va xavisa ka maGreki kasi va yiswa kule ni tiko gabye,

⁷langutani, nzi ta va humesa wutshanwini legi mu va xavisileko ka gona, nzi mu tlhelisela a mitiro ya nwina hehla ka tihloko ta nwina venyi.

⁸Nzi ta xavisa a vafana va nwina ni vanhanyana va nwina mandleni ya vana va Juda, vonawu va va xavisa mandleni ya va le Xeba, va nga va tiko ga le kule; hakuva Jehova i wulile lezo.

⁹Banani nyiwo xikari ka matiko lezaku va hloma yimpi, va vuxa tinhenha! Vontlhe vavanuna va yimpi a vate va tshinela!

¹⁰Fulani a tisupado hi zikomu za nwina, mu fula matlhari hi mibherana ya nwina. Loyi a nga ni gome ngha a wula, aku: Nzi nhenha! [9]

¹¹Hatlisani muta, nwina matiko ya matihelo wontlhe, mu ta tsombana. Jehova, relelisa a tinhenha ta wena ieyo!

¹²Ngha matiko ma vuka, mata nkoveni wa Jehoxafate; hakuva nzi ta tshama kona nzi lamula a matiko wontlhe ma gamekeneko.

¹³Khomani sikela hakuva a mavele ma buvile. Tanani mu kanzihela, hakuva xigowolo xi tele, ni maphiso ma halakela, hakuva a kubiha kabye ka hombe.

¹⁴Hi nga zwani a zidlemo zi tsombanako nkoveni wa kulamula! hakuva a siku ga Jehova gi tshinele le nkoveni wa kulamula.

¹⁵A gambo ni hweti zi pfhupelisilwe, ni tinyeleti ta timeka.

¹⁶Jehova wa dzuma le Zioni, a zwata a gezu gakwe hi le Jerusalema; a tilo ni misava zi tsekatseka. Kanilezi Jehova i tava wuchavelo ga vanhu vakwe, ni khokhola ga vana va ka Israeli. [10]

¹⁷Zinghaho mu ta zi tiva lezaku hi mina Jehova a Nungungulu wa nwina, loyi nzi tshamako le Zioni xitsungeni xa mina xo basa. Zonake Jerusalema gi ta basa, a vamatiko va nga ta ha hunza hi gona. [11]

¹⁸A xikhatini lexo a zitsunga zi ta dona a vinya, ni miganga yi ta khulunga masi, yontlhe micongwana ya ka Juda yi tava ni mati. Ku ta huma a xibuka hi ndlwini ya ka Jehova xi tsakamisa a nkova wa le Xittimu. [12]

¹⁹A Gipite gi tava marumbi, na Edome i tava xiwula, hikuva va vukeleko a vana va ka Juda hi tihanyi, va halata a nkhata wu nga hiko na nanzu a tikweni gabye.

²⁰Kanilezi Juda i ta tshama kala kupinzuka, na Jerusalema kala ka zizukulwana ni zizukulwana.

²¹Nzi ta fuvisa a milanzu yabye ya nkhata leyi nzi kalako nzi nga se ku yi fuvisa, hakuva Jehova i ta tshama le Zioni.