Read tshwa Amosi 6 Bible Online

Amosi 6 - tshwa bible

Amosi 6

¹I khombo ka lava va te ku tikatika le Zioni, ni ka vona va te ku nja le xitsungeni xa Samaria, a tihosana ta tiko go ranga xikari ka matiko, lava a yindlu ya ka Israeli yi tako kabye.

²Fambani le Kalne mu ya wona, kusukela laho yanani Hamate wa hombe, zonake mu relela muya le Gate wa maFilistia: a miti leyo yi sasekile ku hunza a miti ya nwina ke? Kutani a tiko gabye gi anamile ku hunza ga nwina ke?

³Nwina lava mu nge hi ku tshineta kule a masiku ya khombo, kasi lezo mu ramba a xitshamu xa zanga xi tshinela kusuhani.

⁴Va etlela mibhedini yi mahilweko hi timhonzo ta tindlovu, va ti nawula zitheveni zabye; vaga tiyivana ta mitlhambi, ni marole ma nonileko ya lomo rangeni.

⁵Va polomba a tisimu hi pfumawulo wa mihambi, va ti mahela a zitende zo yimbelela ha zona khwatsi hi Davida.

⁶Va nwela vinya lomu mingelweni, va tola mafura ya lisima; kanilezi a va khataleli a hlokiselelo wa Josefa.

⁷Makunu va taya wukhumbini va rangela vanwani va yiswako kona, ku mbheta a kupolomba ka lava va nga wa ti nawula.

⁸Hosi Jehova i hlambanyile hi wutsumbu gakwe, aku: Jehova a Nungungulu wa tiyimpi i ngalo; Nza swireka hi matshanza ya Jakobe, nza venga a ziluvelo zakwe, hikwalaho nzi ta nyikela kulobyisweni a muti ni zontlhe zi nga ka wona.

⁹Loku ku sala khume ga vavanuna ka yindlu yinwe, va tafa vontlhe.

¹⁰Laha a rarutsongwani wa munhu a tako ku ta teka xirumbi lezaku xi hiswa, loku a humesa marambu lomu ndlwini i taku ka loyi a nga lomu xikari ka yindlu: Ka ha hi ni munwani wa wena ke? Yena i taku: Ahihi! Zonake yena i taku: Miyela! Hakuva a hi faneli ku kumbuka a vito ga Jehova.

¹¹Hakuva Jehova wa leletela; a yindlu ya hombe yi ta khungumulwa yi maha marumbi, a xiyinalwana xi ta fayetelwa.

¹²A mahaxi ma ta tsutsuma maribyeni ke? Kutani ku nga rimiwa kona hi tihomu ke? lezi mu hunzulako a nongameto wu maha nyongwa, ni mihanzu ya kululama yi maha manonwe.

¹³Nwina lava mu tsakelako za hava, muku: A hi ntamu wa hina wutsumbu lowu hi nga hlula ha wona ke? [26]

¹⁴Langutani, nzi ta mu vuxela mufumo, nwina va yindlu ya ka Israeli, ku wula Jehova, a Nungungulu wa tiyimpi; wu ta mu xanisa kusukela le Hamate kala le Congweni wa Araba.